ಮಕ್ಕಳಿಗೂ ನಕ್ಸಲ್​ ತರಬೇತಿ.. ಕೇಂದ್ರ ಗೃಹ ಸಚಿವಾಲಯದಿಂದ ಬೆಚ್ಚಿ ಬೀಳಿಸುವ ಮಾಹಿತಿ..

ಮಕ್ಕಳನ್ನೂ ತಮ್ಮೊಂದಿಗೆ ಸೇರಿಸಿಕೊಳ್ಳುತ್ತಿರುವ ನಕ್ಸಲರು, ಅವರ ಮೂಲಕ ಅನೇಕ ಕೆಲಸ ಮಾಡಿಕೊಳ್ಳುತ್ತಿದ್ದಾರೆ. ಅಲ್ಲದೆ, ಮಿಲಿಟರಿ ತರಬೇತಿಯನ್ನೂ ನೀಡುತ್ತಿದ್ದಾರೆ ಎಂದು ಲೋಕಸಭೆಯಲ್ಲಿ ಈ ಬಗ್ಗೆ ಗೃಹ ಇಲಾಖೆ ರಾಜ್ಯ ಖಾತೆ ಸಚಿವ ಜಿ. ಕಿಶನ್​ ರೆಡ್ಡಿ ಲಿಖಿತ ಉತ್ತರ ನೀಡಿದರು.

ನವದೆಹಲಿ: ಈಶಾನ್ಯ ರಾಜ್ಯಗಳಲ್ಲಿ ನರಮೇಧ ನಡೆಸುತ್ತಿರುವ ನಕ್ಸಲರು ಇದೀಗ ಮಕ್ಕಳಿಗೂ ವಿಧ್ವಂಸಕ ಕೃತ್ಯಗಳ ತರಬೇತಿ ನೀಡುತ್ತಿದ್ದಾರೆ ಎಂಬ ಆತಂಕಕಾರಿ ವಿಷಯವನ್ನು ಗೃಹ ಇಲಾಖೆ ಬಯಲು ಮಾಡಿದೆ.

ಲೋಕಸಭೆಯಲ್ಲಿ ಈ ಬಗ್ಗೆ ಗೃಹ ಇಲಾಖೆ ರಾಜ್ಯ ಖಾತೆ ಸಚಿವ ಜಿ. ಕಿಶನ್​ ರೆಡ್ಡಿ ಲಿಖಿತ ಉತ್ತರ ನೀಡಿದರು. ಮಕ್ಕಳನ್ನೂ ತಮ್ಮೊಂದಿಗೆ ಸೇರಿಸಿಕೊಳ್ಳುತ್ತಿರುವ ನಕ್ಸಲರು, ಅವರ ಮೂಲಕ ಅನೇಕ ಕೆಲಸ ಮಾಡಿಕೊಳ್ಳುತ್ತಿದ್ದಾರೆ. ಅಲ್ಲದೆ, ಮಿಲಿಟರಿ ತರಬೇತಿಯನ್ನೂ ನೀಡುತ್ತಿದ್ದಾರೆ ಎಂದು ಹೇಳಿದ್ದಾರೆ.ಜಾರ್ಖಂಡ್​, ಛತ್ತೀಸ್​ಗಢದ ಮಕ್ಕಳ ಮೂಲಕ ಆಹಾರ ತಯಾರಿಕೆ, ಅಗತ್ಯ ವಸ್ತುಗಳ ಸರಬರಾಜು ಹಾಗೂ ಭದ್ರತಾ ಪಡೆಯ ಚಲನವಲನಗಳ ಬಗ್ಗೆ ಮಾಹಿತಿ ಪಡೆದುಕೊಳ್ಳುತ್ತಿದ್ದಾರೆ ಎಂದು ಹೇಳಿದರು.

ನಕ್ಸಲರನ್ನು ಮುಖ್ಯವಾಹಿನಿಗೆ ತರಲು ಭದ್ರತೆ, ಅಭಿವೃದ್ಧಿ, ಸ್ಥಳೀಯರಿಗೆ ಅಗತ್ಯ ಹಕ್ಕು ಮತ್ತು ಸೌಲಭ್ಯ ಒದಗಿಸುವಂತಹ ಬಹು ಹಂತದ ಹೊಸ ಪ್ಲಾನ್​ಗಳನ್ನು ಮಾಡಲಾಗ್ತಿದೆ. ಸಿಎಪಿಎಫ್​​, ಯುಎವಿ, ಐಆರ್​ಬಿ ಪಡೆಗಳನ್ನು ಗೃಹ ಇಲಾಖೆ ನಕ್ಸಲಪೀಡಿತ ಪ್ರದೇಶಗಳಲ್ಲಿ ನಿಯೋಜಿಸಿದೆ ಎಂದರು.

2009ರಿಂದ 2018ರವರೆಗೆ ನಕ್ಸಲರಿಂದ 2258 ಹಿಂಸಾಚಾರ ಪ್ರಕರಣಗಳು ನಡೆದಿವೆ. ನಕ್ಸಲರ ದಾಳಿಯಿಂದ 2010ರವರೆಗೆ 1005 ಮಂದಿ ಸಾವಿಗೀಡಾಗಿದ್ದರೆ, 2018ರವರೆಗೆ 280 ಮಂದಿ ಬಲಿಯಾಗಿದ್ದಾರೆ ಎಂದು ಮಾಹಿತಿ ನೀಡಿದರು.