ವಿಜಯವಾಡ : ಈ ಮೊದಲು ರಾಮಮಂದಿರ ನಿರ್ಮಾಣದ ಬಗ್ಗೆ ಮಾತನಾಡುತ್ತಿದ್ದ ಜನ ಈಗ ಅದರ ಚಕಾರವೆತ್ತುತ್ತಿಲ್ಲ ಎಂದು ನ್ಯಾಷನಲ್ ಕಾನ್ಫೆರೆನ್ಸ್ ಪಕ್ಷದ ಮುಖ್ಯಸ್ಥ ಫಾರೂಕ್ ಅಬ್ದುಲ್ಲಾ ಪರೋಕ್ಷವಾಗಿ ಬಿಜೆಪಿ ವಿರುದ್ಧ ಕಿಡಿ ಕಾರಿದರು.
ಆಂಧ್ರಪ್ರದೇಶಕ್ಕೆ ಭೇಟಿ ನೀಡಿದ ಅವರು, ಬಾಲಾಕೋಟ್ ದಾಳಿಗೂ ಮುನ್ನ ಕೆಲ ಮಂದಿ ರಾಮಮಂದಿರದ ಬಗ್ಗೆಯೇ ಮಾತನಾಡುತ್ತಿದ್ದರು. ಸದಾ ಮಂದಿರ, ಮಂದಿರ, ಮಂದಿರ ಎನ್ನುತ್ತಿದ್ದರು. ಆದರೆ, ಈಗ ಮಂದಿರದ ಬಗ್ಗೆ ಮಾತಿಲ್ಲ ಎಂದು ಬಿಜೆಪಿಗರನ್ನು ಪರೋಕ್ಷವಾಗಿ ಕಟುಕಿದರು.
ಇಲ್ಲೊಬ್ಬ ವ್ಯಕ್ತಿ (ನರೇಂದ್ರ ಮೋದಿ) ಹನುಮನಂತೆ ಪಾಕ್ ಅನ್ನು ಬಗ್ಗು ಬಡೆಯುತ್ತಾರೆ ಎಂದು ಬಿಂಬಿಸಿದ್ದಾರೆ. ಆದರೆ, ಅವರು ಪಾಕ್ ಅನ್ನು ಬಗ್ಗು ಬಡಿದರೇ? ಭಯೋತ್ಪಾದನೆ ನಿಂತುಹೋಯ್ತೇ? ಪಾಕ್ಗೆ ತಕ್ಕ ಪಾಠ ಕಲಿಸಿದರೇ? ನನಗಂತೂ ಹೀಗೆ ಅನ್ನಿಸುತ್ತಿಲ್ಲ ಎಂದರು.
ಬಾಲಾಕೋಟ್ ದಾಳಿಯಲ್ಲಿ 300 ಉಗ್ರರು ಸತ್ತಿದ್ದೇ ಆದರೆ ಅಂತಾರಾಷ್ಟ್ರೀಯಮಟ್ಟದಲ್ಲಿ ದೊಡ್ಡ ಸುದ್ದಿಯಾಗುತ್ತಿತ್ತು. ಆದರೆ, ಈ ಬಗ್ಗೆ ಯಾರಾದರೂ ಪ್ರಶ್ನಿಸಿದರೆ, ಅವರು ದೇಶದ್ರೋಹಿಗಳಾಗಿಬಿಡ್ತಾರೆ, ಪಾಕಿಸ್ತಾನಿಗಳಾಗಿ ಬಿಡ್ತಾರೆ ಎಂದು ಛೇಡಿಸಿದರು.
ಪ್ರಜಾಪ್ರಭುತ್ವದಲ್ಲಿ ಎಲ್ಲವನ್ನೂ ಪ್ರಶ್ನಿಸುವ ಹಕ್ಕಿದೆ. ಆದರೆ, ಈಗ ಪ್ರಶ್ನಿಸುವ ಹಕ್ಕನ್ನೇ ಹತ್ತಿಕ್ಕಲಾಗ್ತಿದೆ. ನಿಜವಾದ ಪ್ರಜಾಪ್ರಭುತ್ವ ನೆಲೆಸಿ, ಗಾಂಧಿ ಕಂಡ ಭಾರತವನ್ನು ಪುನರ್ಸ್ಥಾಪಿಸಬೇಕು ಎಂದು ಫಾರೂಕ್ ಅಬ್ಧುಲ್ಲಾ ಹೇಳಿದರು.
