ಹಿಂದೂ ಮಹಿಳೆಯ ಅಂತ್ಯಕ್ರಿಯೆ ನಡೆಸಿ ಮಾನವೀಯತೆ ಮೆರೆದ ಮುಸ್ಲಿಂ ಯುವಕರು!

ಅನಾರೋಗ್ಯದಿಂದ ಸಾವಿಗೀಡಾದ ಹಿಂದೂ ಮಹಿಳೆಯ ಅಂತ್ಯಕ್ರಿಯೆಗೆ ಯಾರೂ ಭಾಗಿಯಾಗದ ಹಿನ್ನೆಲೆ ಮುಸ್ಲಿಂ ಯುವಕರೇ ಮುಂದೆನಿಂತು ಸ್ವಂತ ಖರ್ಚಿನಿಂದ ಹಿಂದೂ ಸಂಪ್ರದಾಯದಂತೆ ಅಂತ್ಯಕ್ರಿಯೆ ನಡೆಸಿ ಮಾನವೀಯತೆ ಮೆರೆದಿದ್ದಾರೆ.

ಹೈದರಾಬಾದ್​: ಹಿಂದೂ ಮಹಿಳೆಯ ಅಂತ್ಯಕ್ರಿಯೆ ನಡೆಸಿ ಈ ಮುಸ್ಲಿಂ ಯುವಕರು ಮಾನವೀಯತೆ ಮೆರೆದಿದ್ದಾರೆ.

ಕಿಶನ್ ರಾಜ್ ಗೌಡ್ ಮತ್ತು ಎಲ್ಲಮ್ಮ ಎಂಬ ದಂಪತಿ ತೆಲಂಗಾಣದ ನಿರ್ಮಲ್​ ಜಿಲ್ಲೆಯ ಗಜುಲಪೇಟ್‌ನ ಸಣ್ಣ ಗುಡಿಸಲಿನಲ್ಲಿ ವಾಸಿಸುತ್ತಿದ್ದರು. ಕಳೆದ ವರ್ಷ ನಡೆದ ಅಪಘಾತದಲ್ಲಿ ಯಲ್ಲಮ್ಮ ಕಾಲು ಕಳೆದುಕೊಂಡಿದ್ದರು. ಲಾಕ್ ಡೌನ್ ಸಮಯದಲ್ಲಿ ಯಲ್ಲಮ್ಮನ ತೊಂದರೆಯನ್ನು ಗಮನಿಸಿದ್ದ ಈ ಮುಸ್ಲಿಂ ಸಮುದಾಯದ ಯುವಕರು ಆವರಿಗೆ ಆಹಾರ ನೀಡುತ್ತಿದ್ದರು. ಆದರೆ, ಯಲ್ಲಮ್ಮ ನಿರ್ಜಲೀಕರಣಗೊಂಡಿದ್ದರಿಂದ ನಿಧನರಾಗಿದ್ದಾರೆ.

ಇನ್ನು ಯಲ್ಲಮ್ಮ ಅವರ ಅಂತ್ಯಕ್ರಿಯೆ ಮಾಡಲು ಯಾರೂ ಮುಂದೆ ಬರಲಿಲ್ಲವಾದ್ದರಿಂದ ಗೃಹರಕ್ಷಕ ಅಜರ್ ಎಂಬುವರು ಸ್ಥಳೀಯ ಕೌನ್ಸೆಲರ್​ ಇಮ್ರಾನ್ ಉಲ್ಲಾ ಅವರನ್ನು ಸಂಪರ್ಕಿಸಿದರು. ತಕ್ಷಣ, ಸಹಾರಾ ಮುಸ್ಲಿಂ ಯುವಕರು ಆಗಮಿಸಿ ತಮ್ಮ ಸ್ವಂತ ಖರ್ಚಿನಲ್ಲಿ ಹಿಂದೂ ಸಂಪ್ರದಾಯದಂತೆ ಯಲ್ಲಮ್ಮನ ಅಂತ್ಯಕ್ರಿಯೆ ನೆರವೇರಿಸಿದರು.