ನಿಲ್ದಾಣದಲ್ಲೇ ಹಳಿ ತಪ್ಪಿದ ಮುಂಬೈ ಲೋಕಲ್​ ಟ್ರೈನ್... ಆಮೇಲೇನಾಯ್ತು?

ಮುಂಬೈನ ಕುರ್ಲಾ ರೈಲ್ವೆ ನಿಲ್ದಾಣದ ಪ್ಲಾಟ್​​ಫಾರ್ಮ್​ ನಂ. 3ಕ್ಕೆ ಬಂದ ಕಲ್ಯಾಣ್​-116 ರೈಲು ಹಳಿತಪ್ಪಿತು. ಹೀಗಾಗಿ 50 ಸ್ಥಳೀಯ ರೈಲುಗಳು ರದ್ದಾದ ಘಟನೆಯೂ ನಡೆದಿದೆ.

ಮುಂಬೈ:ಇಲ್ಲಿನ ಕುರ್ಲಾ ರೈಲ್ವೆ ನಿಲ್ದಾಣ ಪ್ರವೇಶಿಸಿದ ಸ್ಥಳೀಯ ಟ್ರೈನ್​ವೊಂದು ಹಳಿ ತಪ್ಪಿದ ಪರಿಣಾಮ ಸಂಚಾರ ಅಸ್ತವ್ಯಸ್ತಗೊಂಡಿತು. ಇದರಿಂದ ಮುಂಬೈನಲ್ಲಿ ಸಂಚರಿಸುವ 50 ಸ್ಥಳೀಯ ರೈಲುಗಳು ರದ್ದಾದ ಘಟನೆಯೂ ನಡೆದಿದೆ.

ನಿನ್ನೆ ರಾತ್ರಿ 8:52ಕ್ಕೆ ಕುರ್ಲಾ ರೈಲ್ವೆ ನಿಲ್ದಾಣದ ಪ್ಲಾಟ್​ಫಾರ್ಮ್​ ನಂ3ಕ್ಕೆ ಬಂದ ಕಲ್ಯಾಣ್​-116 ರೈಲು ಹಳಿತಪ್ಪಿತು. ಇದಕ್ಕೂ ಮುನ್ನ ಮಹಿಳಾ ಬೋಗಿಯಲ್ಲಿ ಶಾರ್ಟ್​ಸರ್ಕ್ಯೂಟ್​ ಸಂಭವಿಸಿ, ನಿಧಾನವಾಗಿ ರೈಲು ಚಲಿಸುತ್ತಾ ಬಂದಿದೆ. ಈ ಬಗ್ಗೆ ಕೆಲ ಮಹಿಳೆಯರು ರೈಲ್ವೆ ನಿಲ್ದಾಣದ ಅಧಿಕಾರಿಗಳ ಗಮನಕ್ಕೂ ತಂದಿದ್ದರು ಎಂದು ತಿಳಿದುಬಂದಿದೆ. ಘಟನೆಯಲ್ಲಿ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ ಎಂದು ವರದಿಯಾಗಿದೆ.

ಇಲಾಖೆಯ ಪಿಆರ್​ಒ ಸುನಿಲ್​ ಉದಾಸಿ ನೀಡಿರುವ ಮಾಹಿತಿಯಂತೆ, ರೈಲಿನ ಐದನೇ ಬೋಗಿ ನಿಲ್ದಾಣ ಪ್ರವೇಶಿಸುತ್ತಿದ್ದಂತೆ ಹಳಿ ತಪ್ಪಿದೆ. ಈ ವೇಳೆ ರೈಲಿನ ಚಕ್ರ ಹಾಗೂ ಹಳಿಗೆ ಹಾನಿಯಾಗಿದೆ. ಘಟನೆ ಸಂಬಂಧ ತನಿಖೆ ನಡೆಸಲಾಗುತ್ತಿದೆ ಎಂದು ಹೇಳಿದ್ದಾರೆ.

ಹಲವು ಗಂಟೆಗಳ ನಂತರ ದುರಸ್ತಿ ಕಾರ್ಯ ಮುಗಿದಿದ್ದು, ರೈಲು ಮುಂದೆ ಚಲಿಸಿದೆ.