ಮುಂಬೈ:''ಸುಶಾಂತ್ ನನಗೆ ಸಹೋದರನಿದ್ದಂತೆ, ಅವನ ಸಾವು ನಿಜಕ್ಕೂ ಆಘಾತಕಾರಿ. ಆತ ಅಂತರ್ಮುಖಿಯಾಗಿದ್ದು, ಊಹಿಸಲಾಗಷ್ಟು ಬುದ್ದಿವಂತನಾಗಿದ್ದ'' ಎಂದು ಬಾಲಿವುಡ್ ನಿರ್ದೇಶಕ ಮುಖೇಶ್ ಛಬ್ರಾ ನೆನೆದಿದ್ದಾರೆ.
ಸುಶಾಂತ್ ಸಿಂಗ್ರ ಕೊನೆಯ ಚಿತ್ರ ದಿಲ್ ಬೆಚಾರ ಸಿನಿಮಾದ ನಿರ್ದೇಶಕರಾಗಿರುವ ಛಬ್ರಾ ತಮ್ಮ ಟ್ವಿಟರ್ ಖಾತೆಯಲ್ಲಿ ಸುಶಾಂತ್ ಕೆನ್ನೆಗೆ ಮುತ್ತಿಡುತ್ತಿರುವ ಚಿತ್ರವೊಂದನ್ನು ಶೇರ್ ಮಾಡಿದ್ದು, ಸುಶಾಂತ್ ಸಾವನ್ನು ನಂಬಲು ಸಾಧ್ಯವಾಗುತ್ತಿಲ್ಲ ಎಂದು ಭಾವನಾತ್ಮಕ ಟಿಪ್ಪಣಿಯೊಂದನ್ನು ಬರೆದಿದ್ದಾರೆ.
ಸಿನಿಮಾ ಇಂಡಸ್ಟ್ರಿ ಅಪರೂಪದ ಮುತ್ತೊಂದನ್ನು ಕಳೆದುಕೊಂಡಿದೆ. ತುಂಬಾ ದುಃಖವಾಗುತ್ತಿದೆ. ಈಗಲೂ ಅವನ ಸಾವನ್ನು ನಂಬಲು ಆಗುತ್ತಿಲ್ಲ. ನಮ್ಮಿಬ್ಬರ ಕೊನೆಯಿಲ್ಲದ ಸಂಭಾಷಣೆ ಕೊನೆಯಾಗಿದೆ. ವಿ ಆಲ್ ಮಿಸ್ ಯೂ ಅಂಡ್ ಲವ್ ಯೂ ಎಂದು ಬರೆದುಕೊಂಡಿದ್ದಾರೆ.
ಜೊತೆಗೆ ಮುಂಬೈನ ವಿಲೆ ಪಾರ್ಲೆಯಲ್ಲಿ ನಡೆಸಿದ ಸುಶಾಂತ್ ಅಂತ್ಯಕ್ರಿಯೆಯಲ್ಲಿಯೂ ಕೂಡಾ ಮುಖೇಶ್ ಛಬ್ರಾ ಭಾಗಿಯಾಗಿದ್ದರು. ಛಬ್ರಾ ಸುಶಾಂತ್ ಅವರ ಕೊನೆಯ ಚಿತ್ರ ದಿಲ್ ಬೆಚಾರಾ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ಈ ಚಿತ್ರ ಜಾನ್ ಗ್ರೀನ್ ಎಂಬಾತ ಬರೆದ ಪ್ರಸಿದ್ಧ ಕಾದಂಬರಿ ದ ಫಾಲ್ಟ್ ಇನ್ ಅವರ್ ಸ್ಟಾರ್ಸ್ ಎಂಬುದನ್ನು ಆಧರಿಸಿದೆ.