ಬಹುಮತ ಸಾಬೀತುಪಡಿಸಲು ಗವರ್ನರ್​ ಸೂಚನೆ: ಜೈಪುರದಿಂದ ಭೋಪಾಲ್​ಗೆ ಹೊರಟ ಶಾಸಕರು

ಬಂಡಾಯವೆದ್ದ ಶಾಸಕರಿಂದಾಗಿ ಅಸ್ಥಿರ ಗೊಂಡಿರುವ ಮಧ್ಯಪ್ರದೇಶ ಸರ್ಕಾರಕ್ಕೆ ಗವರ್ನರ್​ ಬಹುಮತ ಸಾಬೀತುಪಡಿಸುವಂತೆ ಹೇಳಿದ್ದಾರೆ. ಇತ್ತ ಬಂಡಾಯ ಶಾಸಕರ ಮನವೊಲಿಸಿ ಬಹುಮತ ಸಾಬೀತುಪಡಿಸುವ ವಿಶ್ವಾಸದಲ್ಲಿ ಕಾಂಗ್ರೆಸ್​ ನಾಯಕರಿದ್ದಾರೆ.

ಭೋಪಾಲ್: ಮಧ್ಯಪ್ರದೇಶದಲ್ಲಿ ರಾಜಕೀಯ ಬಿಕ್ಕಟ್ಟು ಮುಂದುವರೆದಿದೆ. ಜೈಪುರದ ರೆಸಾರ್ಟ್​ ವೊಂದರಲ್ಲಿ ನೆಲೆಸಿದ್ದ ಕಾಂಗ್ರೆಸ್​ ಶಾಸಕರು ಇಂದು ಜೈಪುರದಿಂದ ಭೋಪಾಲ್​ಗೆ ಪ್ರಯಾಣ ಬೆಳೆಸಿದ್ದಾರೆ. ಇವರಿಗೆ ಹಿರಿಯ ಕಾಂಗ್ರೆಸ್​ ಮುಖಂಡ ಹರೀಶ್​ ರಾವತ್​ ಸಾಥ್​ ನೀಡಿದ್ದಾರೆ.

ಈ ವೇಳೆ ಮಾತನಾಡಿದ ಹರೀಶ್​ ರಾವತ್​, ನಾವು ಎದೆಗುಂದಿಲ್ಲ, ನಾಳೆ ಬಹುಮತ ಸಾಬೀತುಪಡಿಸಲು ಸಿದ್ಧರಾಗಿದ್ದೇವೆ ಹಾಗೂ ಇದರಲ್ಲಿ ಗೆಲ್ಲುವ ವಿಶ್ವಾಸ ನಮಗಿದೆ. ಬಂಡಾಯವೆದ್ದಿರುವ ಶಾಸಕರು ಕೂಡ ನಮ್ಮ ಜೊತೆಗಿದ್ದಾರೆ ಎಂದಿದ್ದಾರೆ.

ಸಿಎಂ ಕಮಲನಾಥ್​ ಭೇಟಿಯಾದ ಕಾಂಗ್ರೆಸ್ ನಾಯಕರು

ಇನ್ನೊಂದೆಡೆ ಭೋಪಾಲ್​ನಲ್ಲಿ ಕಾಂಗ್ರೆಸ್​ ನಾಯಕರಾದ ದಿಗ್ವಿಜಯ್​ ಸಿಂಗ್​ ಹಾಗೂ ಶೋಭಾ ಓಜಾ ಮಧ್ಯಪ್ರದೇಶ ಸಿಎಂ ಕಮಲನಾಥ್​ ನಿವಾಸಕ್ಕೆ ಆಗಮಿಸಿದ್ದಾರೆ. ಕಾಂಗ್ರೆಸ್​ ಶಾಸಕರು ಬಂಡಾಯವೆದ್ದಿರುವುದರಿಂದ ಅಸ್ಥಿರತೆ ಎದುರಿಸುತ್ತಿರುವ ಮಧ್ಯಪ್ರದೇಶ ಸರ್ಕಾರಕ್ಕೆ ಗವರ್ನರ್​ ಆಗಿರುವ ಲಾಲ್​​ಜಿ ಟಂಡನ್​ ನಾಳೆ ವಿಧಾನಸಭೆಯಲ್ಲಿ ಬಹುಮತ ಸಾಬೀತುಪಡಿಸುವಂತೆ ಹೇಳಿದ್ದಾರೆ.