ಎಂಎಸ್​ಎಂಇ ಕೈಗಾರಿಕೆಗಳನ್ನು ಹುರಿದುಂಬಿಸಲು ಸರ್ಕಾರ ವಿಫಲವಾಗಿದೆ: ಅನಿಮೆಶ್ ಸಕ್ಸೇನಾ

ಲಾಕ್​ಡೌನ್​ನಿಂದಾಗಿ ಸೂಕ್ಷ್ಮ ಮತ್ತು ಸಣ್ಣ ಹಾಗೂ ಮಧ್ಯಮ ಕೈಗಾರಿಕೆಗಳು ಸಂಕಷ್ಟಕ್ಕೆ ಸಿಲುಕಿದ್ದು, ಈ ಕೈಗಾರಿಗಳ ಉತ್ತೇಜನಕ್ಕೆ ಸರ್ಕಾರದ ಸಹಾಯ ಹಸ್ತ ಅತ್ಯವಶ್ಯಕ, ಆದರೆ, ಕೇಂದ್ರ ಸರ್ಕಾರ ಈ ಕೈಗಾರಿಕೆಗಳನ್ನು ಹುರಿದುಂಬಿಸಲು ವಿಫಲವಾಗಿದೆ ಎಂದು ಫೆಡರೇಶನ್ ಆಫ್ ಇಂಡಿಯನ್ ಎಂಎಸ್​ಎಂಇ ಅಧ್ಯಕ್ಷ ಅನಿಮೇಶ್ ಸಕ್ಸೇನಾ ದೂರಿದ್ದಾರೆ.

ನವದೆಹಲಿ: ಸೂಕ್ಷ್ಮ ಮತ್ತು ಸಣ್ಣ ಹಾಗೂ ಮಧ್ಯಮ ಕೈಗಾರಿಕೆಗಳಿಗೆ ಕೇಂದ್ರ ಸರ್ಕಾರದಿಂದ ಘೋಷಿಸಲಾದ 3 ಲಕ್ಷ ಕೋಟಿ ರೂ.ಗಳ ಮುಕ್ತ ಸಾಲ ಸೌಲಭ್ಯವು ಎಂಎಸ್‌ಎಂಇ ವಲಯವನ್ನು ಹುರಿದುಂಬಿಸಲು ವಿಫಲವಾಗಿದೆ ಎಂದು ಫೆಡರೇಷನ್​​​​ ಆಫ್ ಇಂಡಿಯನ್ ಎಂಎಸ್​ಎಂಇ ಅಧ್ಯಕ್ಷ ಅನಿಮೇಶ್​​ ಸಕ್ಸೇನಾ ಹೇಳಿದ್ದಾರೆ.

ಎರಡು ತಿಂಗಳ ಕಾಲ ರಾಷ್ಟ್ರವ್ಯಾಪಿ ಲಾಕ್​ಡೌನ್​ ಹೇರಿದ ಕಾರಣದಿಂದಾಗಿ ಎಂಎಸ್​ಎಂಇ ಕೈಗಾರಿಕೆಗಳು ತೀವ್ರ ಹಣದುಬ್ಬರವನ್ನು ಎದುರಿಸುತ್ತಿದೆ. ಎಸ್‌ಎಂಇಗಳು ಇದೀಗ ಎದುರಿಸುತ್ತಿರುವ ಪ್ರಮುಖ ಬಿಕ್ಕಟ್ಟು ಎಂದರೆ ಅದು ಹಣದುಬ್ಬರವಾಗಿದ್ದು, ಕಳೆದ ಎರಡು ತಿಂಗಳಲ್ಲಿ ಶೂನ್ಯ ಉತ್ಪಾದನೆ ಹಾಗೂ ಮಾರಾಟ, ಇವೆಲ್ಲವುದಕ್ಕೂ ಕಾರಣವಾಗಿದೆ ಎಂದು ಸಕ್ಸೇನಾ ಹೇಳಿದ್ದಾರೆ.

ಕೊರೊನಾ ಪ್ರೇರಿತ ಲಾಕ್​​ಡೌನ್ ಅವಧಿಯಲ್ಲಿ ಕಾರ್ಮಿಕರಿಗೆ ಸಂಬಳ ನೀಡುವಂತೆ ಗೃಹ ವ್ಯವಹಾರಗಳ ಸಚಿವಾಲಯ ಉದ್ಯೋಗದಾತರಿಗೆ ನಿರ್ದೇಶನ ನೀಡಿದ್ದರಿಂದ ಎಂಎಸ್‌ಎಂಇ ವಲಯದ ಸಮಸ್ಯೆಗಳು ಉಲ್ಬಣಗೊಂಡಿವೆ. ಈ ವರೆಗೆ ಎಂಎಸ್‌ಎಂಇಗಳು ದೇಶದಲ್ಲಿ ಸುಮಾರು 12 ಕೋಟಿ ಜನರಿಗೆ ಉದ್ಯೋಗ ನೀಡಿದೆ. ಇವರೆಲ್ಲರಿಗೂ ಕಾರ್ಯನಿರ್ವಹಿಸದಿದ್ದರೂ ಸಹ ವೇತನ ನೀಡಿರುವುದು ಸಹ ಎಂಎಸ್​ಎಂಇ ಸಂಕಷ್ಟಕ್ಕೆ ಸಿಲುಕಲು ಕಾರಣವಾಗಿದೆ ಎಂದಿದ್ದಾರೆ.

ಏಪ್ರಿಲ್ ಮತ್ತು ಮೇ ತಿಂಗಳುಗಳಲ್ಲಿ ಯಾವುದೇ ವ್ಯವಹಾರವಿಲ್ಲದಿದ್ದರೂ ಸಹ ಸಿಬ್ಬಂದಿ ವೇತನ, ವಿದ್ಯುತ್ ಬಿಲ್‌ಗಳಂತಹ ಎಲ್ಲ ನಿಗದಿತ ವೆಚ್ಚಗಳನ್ನು ನಾವು ನೋಡಿಕೊಳ್ಳಬೇಕಾಗಿದೆ ಎಂದು ಅನಿಮೇಶ್ ಸಕ್ಸೇನಾ ಈಟಿವಿ ಭಾರತ್‌ಗೆ ತಿಳಿಸಿದ್ದಾರೆ.