15ನೇ ವಯಸ್ಸಿನಲ್ಲಿ ಮದುವೆ, 2 ವರ್ಷದ ಮಗು: 12ನೇ ಕ್ಲಾಸ್​​ನಲ್ಲಿ​ ಶೇ.92.6ರಷ್ಟು ಸಾಧನೆ

ಓದುವ ಛಲವಿದ್ದರೆ ಅದಕ್ಕೆ ಬೇರೆ ಯಾವುದೇ ಸಮಸ್ಯೆ ಅಡ್ಡಿಯಾಗಲ್ಲ ಎಂಬುದಕ್ಕೆ ಈ ಮಹಿಳೆ ಜ್ವಲಂತ ಉದಾಹರಣೆ. ಈಕೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರೂ 12ನೇ ತರಗತಿ ಪರೀಕ್ಷೆ ಬರೆದು ಶೇ.90ಕ್ಕೂ ಅಧಿಕ ಅಂಕ ಪಡೆದುಕೊಂಡಿದ್ದಾರೆ.

ಅಗರ್ತಲಾ (ತ್ರಿಪುರಾ):15ನೇ ವಯಸ್ಸಿನಲ್ಲೇ ಮದುವೆ ಮಾಡಿಕೊಂಡಿದ್ದ ಮಹಿಳೆ ತಾನು ಎದುರಿಸಿದ್ದ 12ನೇ ತರಗತಿ ಬೋರ್ಡ್​ ಪರೀಕ್ಷೆಯಲ್ಲಿ ಶೇ.92.6ರಷ್ಟು ಅಂಕ ಪಡೆದುಕೊಂಡಿದ್ದಾರೆ.

ಸದ್ಯ 19 ವರ್ಷದವಳಾಗಿರುವ ಸಂಗಮಿತ್ರಾ ದೇಬ್​​​ಗೆ ಎರಡೂವರೆ ವರ್ಷದ ಮಗನಿದ್ದಾನೆ. ಆದರೂ ಓದುವ ಛಲ ಬಿಡದ ಈಕೆ 12ನೇ ತರಗತಿ ಕಲಾ ವಿಭಾಗದ ಬೋರ್ಡ್​​ ಪರೀಕ್ಷೆಯಲ್ಲಿ ಅದ್ಭುತ ಸಾಧನೆ ಮಾಡಿದ್ದಾರೆ. ತ್ರಿಪುರಾ 12ನೇ ತರಗತಿ ಪರೀಕ್ಷೆ ಫಲಿತಾಂಶ ಇಂದು ಪ್ರಕಟಗೊಂಡಿದ್ದು, ಅದರಲ್ಲಿ ಟಾಪ್​ 10 ಪಟ್ಟಿಯಲ್ಲಿ ಸಂಗಮಿತ್ರಾ ರಾಜ್ಯಕ್ಕೆ 7ನೇ ಸ್ಥಾನ ದೊರೆತಿದೆ.

ಸಂಗಮಿತ್ರಾ ಪ್ರತಿಕ್ರಿಯಿಸಿ, ಮನೆಯಲ್ಲಿನ ಕೆಲಸ ಮುಗಿಸಿದ ಬಳಿಕ ಮಗುವಿನ ಆರೈಕೆ ಮಾಡುತ್ತಾ ಓದುತ್ತಿದ್ದೆ. ಗಂಡನ ಮನೆಯಲ್ಲೂ ನನಗೆ ಸಹಾಯ ಮಾಡಿದ್ದಾರೆ. ಪರಿಣಾಮ, ಪರೀಕ್ಷೆಯಲ್ಲಿ ಉತ್ತಮ ಅಂಕಗಳಿಸಿದ್ದೇನೆ ಎಂದಿದ್ದಾರೆ. ಇವರ ಗಂಡ ಬಿಎಸ್​ಎಫ್​​ನಲ್ಲಿದ್ದು, ಕಾಶ್ಮೀರದಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.

10ನೇ ತರಗತಿಯಲ್ಲಿ ಸಂಗಮಿತ್ರಾ ಶೇ.77ರಷ್ಟು ಅಂಕ ಪಡೆದುಕೊಂಡಿದ್ದರು. ಈ ವೇಳೆ ಆಕೆಗೆ ಮದುವೆ ಮಾಡಿಸಲಾಗಿತ್ತು.