"ನಾನು ಶರಣಾಗುತ್ತಿದ್ದೇನೆ, ಗುಂಡು ಹಾರಿಸಬೇಡಿ".. ಫಲಕದೊಂದಿಗೆ ಬಂದು ಶರಣಾದ ರೌಡಿ ಶೀಟರ್!

"ನಾನು ಶರಣಾಗುತ್ತಿದ್ದೇನೆ, ದಯವಿಟ್ಟು ನನಗೆ ಗುಂಡು ಹಾರಿಸಬೇಡಿ" ಎಂದು ಬರೆದಿದ್ದ ಫಲಕವನ್ನು ಕುತ್ತಿಗೆಗೆ ಧರಿಸಿ ಬಂದ ರೌಡಿ ಶೀಟರ್​ವೋರ್ವ ಪೊಲೀಸ್ ಠಾಣೆಗೆ ಬಂದು ಶರಣಾಗಿದ್ದಾನೆ.

ಸಂಭಾಲ್ (ಉತ್ತರ ಪ್ರದೇಶ): "ನಾನು ಸಂಭಾಲ್ ಪೊಲೀಸರಿಗೆ ಹೆದರುತ್ತೇನೆ. ನನ್ನ ತಪ್ಪುಗಳನ್ನು ಒಪ್ಪಿಕೊಳ್ಳುತ್ತೇನೆ. ನಾನು ಶರಣಾಗುತ್ತಿದ್ದೇನೆ, ದಯವಿಟ್ಟು ನನಗೆ ಗುಂಡು ಹಾರಿಸಬೇಡಿ" ಎಂದು ಬರೆದಿದ್ದ ಫಲಕವನ್ನು ಕುತ್ತಿಗೆಗೆ ಹಾಕಿಕೊಂಡು ವ್ಯಕ್ತಿವೋರ್ವ ಉತ್ತರ ಪ್ರದೇಶದ ಪೊಲೀಸ್ ಠಾಣೆಯೊಂದಕ್ಕೆ ಬಂದು ಶರಣಾಗಿದ್ದಾನೆ.

ನಖಾಸಾ ಪೊಲೀಸ್ ಠಾಣೆಯಲ್ಲಿ ಈ ಘಟನೆ ಸಂಭವಿಸಿದ್ದು, ಶರಣಾದ ವ್ಯಕ್ತಿಯನ್ನು ರೌಡಿ ಶೀಟರ್ ನಯೀಮ್ ಎಂದು ಗುರುತಿಸಲಾಗಿದೆ. ಎನ್‌ಕೌಂಟರ್‌ನಲ್ಲಿ ಅವನನ್ನು ಗುಂಡಿಕ್ಕಿ ಕೊಂದಿಲ್ಲವೆಂದು ಖಚಿತಪಡಿಸಲು ಅವನು ಫಲಕ ಹಾಕಿಕೊಂಡು ಪೊಲೀಸ್ ಠಾಣೆಗೆ ಬಂದಿದ್ದಾನೆ. ಉತ್ತರ ಪ್ರದೇಶದಲ್ಲಿ ದರೋಡೆಕೋರ ಮತ್ತು ಸಮಾಜ ವಿರೋಧಿ ಚಟುವಟಿಕೆ ತಡೆ ಕಾಯ್ದೆಯಡಿ ಈತನ ವಿರುದ್ಧ ಪ್ರಕರಣ ದಾಖಲಾಗಿತ್ತು. ಸುಳಿವು ನೀಡಿದವರಿಗೆ 15,000 ರೂ. ಬಹುಮಾನ ಕೂಡಾ ಘೋಷಿಸಲಾಗಿತ್ತು.

ಫಲಕದೊಂದಿಗೆ ಬಂದು ಶರಣಾದ ರೌಡಿ ಶೀಟರ್

ಅಪರಾಧಿಯೊಬ್ಬ ಕರುಣೆ ಕೋರಿ ಫಲಕ ಹಿಡಿದುಕೊಂಡು ಬಂದು ಪೊಲೀಸರ ಮುಂದೆ ಶರಣಾಗುತ್ತಿರುವುದು ಇದೇ ಮೊದಲಲ್ಲ. ಅಮ್ರೋಹಾ ಮತ್ತು ಕಾನ್ಪುರದಲ್ಲಿಯೂ ಅಪರಾಧಿಗಳು ಇದೇ ರೀತಿ ಶರಣಾಗಿದ್ದಾರೆ ಎಂದು ಸ್ಟೇಷನ್ ಹೌಸ್ ಅಧಿಕಾರಿ ಧರಂಪಾಲ್ ಸಿಂಗ್ ಹೇಳಿದ್ದಾರೆ.

ಅಪರಾಧಿಗಳು ತಮ್ಮ ಸುರಕ್ಷತೆಗಾಗಿ ಶರಣಾಗುವ ಸಂದರ್ಭದಲ್ಲಿ ಸ್ಥಳೀಯ ಮಾಧ್ಯಮದವರನ್ನು ಕರೆತರುತ್ತಿದ್ದಾರೆ. ಕಾನ್ಪುರದ ಬಿಕ್ರುವಿನಲ್ಲಿ ವಿಕಾಸ್ ದುಬೆ ಗ್ಯಾಂಗ್​ನ ಆರು ಸದಸ್ಯರು ಎನ್​ಕೌಂಟರ್​ನಲ್ಲಿ ಹತರಾದ ಬಳಿಕ ಅಪರಾಧಿಗಳು ಫಲಕಗಳು ಮತ್ತು ಮಾಧ್ಯಮ ತಂತ್ರಗಳನ್ನು ಅವಲಂಬಿಸಿದ್ದಾರೆ.