ಶ್ರೀನಗರ: ಭಯೋತ್ಪಾದಕರು ಅಡಗಿದ್ದ ಮನೆ ತೊರೆದು ಸೈನಿಕರಿಗೆ ಶರಣಾಗುವಂತೆ ವ್ಯಕ್ತಿಯೋರ್ವ ಉಗ್ರರನ್ನು ಮನವಿ ಮಾಡಿರುವ ವಿಡಿಯೋ ವೈರಲ್ ಆಗಿದೆ.
1 ನಿಮಿಷ 47 ಸೆಕೆಂಡ್ ಇರುವ ವಿಡಿಯೋದಲ್ಲಿ ವ್ಯಕ್ತಿಯೋರ್ವ ದಯವಿಟ್ಟು ನನ್ನ ಮನೆ ಬಿಟ್ಟು ಹೋಗಿ ಸೈನಿಕರಿಗೆ ಶರಣಾಗಿ ಎಂದು ವಿನಂತಿಸುತ್ತಿರುವುದನ್ನು ಕೇಳಬಹುದಾಗಿದೆ.
ವಿಡಿಯೋ ತುಣುಕಿನಲ್ಲಿ ಮನವಿ ಮಾಡಿರುವ ವ್ಯಕ್ತಿ ಶ್ರೀನಗರದ ಜೋನಿಮಾರ್ ಪ್ರದೇಶದಲ್ಲಿ ಉಗ್ರರು ಅಡಗಿದ್ದ ಮನೆಯ ಮಾಲೀಕ ಎಂದು ಹೇಳಲಾಗಿದೆ. 'ದಯವಿಟ್ಟು ಶರಣಾಗಿ, ನನ್ನ ಮಗಳ ಮದುವೆ ಇದೆ. ನೀವು ಶರಣಾಗದಿದ್ದರೆ ನನ್ನ ಮನೆಯನ್ನು ಸುಟ್ಟುಬಿಡುತ್ತಾರೆ' ಎಂದು ಮನವಿ ಮಾಡುವುದನ್ನು ಕೇಳಬಹುದಾಗಿದೆ.
ಶ್ರೀನಗರದ ಝೋನಿಮಾರ್ ಪ್ರದೇಶದಲ್ಲಿ ನಡೆದ ಎನ್‌ಕೌಂಟರ್‌ನಲ್ಲಿ ಈವರೆಗೆ ಮೂವರು ಅಪರಿಚಿತ ಉಗ್ರರನ್ನು ಹತ್ಯೆ ಮಾಡಲಾಗಿದೆ ಎಂದು ಕಾಶ್ಮೀರ ವಲಯ ಪೊಲೀಸ್ ಇನ್ಸ್‌ಪೆಕ್ಟರ್ ಜನರಲ್ ವಿಜಯ್ ಕುಮಾರ್ ಮಾಹಿತಿ ನೀಡಿದ್ದಾರೆ.
