2024ಕ್ಕೆ $ 5 ಟ್ರಿಲಿಯನ್ ಆರ್ಥಿಕತೆ ಸಾಧಿಸ್ತೇವೆ: ರಾಜ್ಯಗಳ ಸಹಕಾರ ಕೋರಿದ ಮೋದಿ

ನೀತಿ ಆಯೋಗದ ಆಡಳಿತ ಮಂಡಳಿಯ 5ನೇ ಸಭೆಯಲ್ಲಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, ಭಾರತವನ್ನು ಸಶಕ್ತ ಆರ್ಥಿಕತೆಯುಳ್ಳ ದೇಶವನ್ನಾಗಿ ಮಾಡಲು ಮೊದಲು ರಾಜ್ಯಗಳು ತಮ್ಮ ಸಾಮರ್ಥ್ಯವೇನೆಂದು ಅರಿಯಬೇಕು. ಆ ನಂತರ ಜಿಲ್ಲಾ ಹಂತದಿಂದ ಆರಂಭಿಸಿ ರಾಜ್ಯದ ಜಿಡಿಪಿ ಬೆಳವಣಿಗೆಗೆ ಅಗತ್ಯ ಶ್ರಮ ವಹಿಸಿಬೇಕು ಎಂದು ಹೇಳಿದರು.

ನವದೆಹಲಿ: 2024ರ ವೇಳೆಗೆ ಭಾರತವನ್ನು 5 ಟ್ರಿಲಿಯನ್​ ಡಾಲರ್​ ಆರ್ಥಿಕತೆ ಹೊಂದಿರುವ ರಾಷ್ಟ್ರವನ್ನಾಗಿ ಮಾಡುವ ಸವಾಲು ನಮ್ಮ ಮುಂದಿದೆ. ರಾಜ್ಯಗಳ ಸಹಕಾರದಿಂದ ಇದನ್ನು ಸಾಧಿಸಬೇಕಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.

ನೀತಿ ಆಯೋಗದ ಆಡಳಿತ ಮಂಡಳಿಯ 5ನೇ ಸಭೆಯಲ್ಲಿ ಮಾತನಾಡಿದ ಅವರು, ಭಾರತವನ್ನು ಸದೃಢ ಆರ್ಥಿಕತೆಯುಳ್ಳ ದೇಶವನ್ನಾಗಿ ಮಾಡಲು ಮೊದಲು ರಾಜ್ಯಗಳು ತಮ್ಮ ಸಾಮರ್ಥ್ಯವೇನೆಂದು ಅರಿಯಬೇಕು. ಆ ನಂತರ ಜಿಲ್ಲಾ ಹಂತದಿಂದ ಆರಂಭಿಸಿ ರಾಜ್ಯದ ಆರ್ಥಿಕ ವೃದ್ದಿಗೆ ಅಗತ್ಯ ಶ್ರಮ ವಹಿಸಬೇಕು ಎಂದು ಹೇಳಿದರು.

ನೀತಿ ಆಯೋಗವು, ಸಬ್​ ಕ ಸಾಥ್, ಸಬ್ ಕ ವಿಕಾಸ್​, ಸಬ್ ಕ ವಿಶ್ವಾಸ್​ ಮಂತ್ರವನ್ನು ಸಾಧಿಸಲು ಮಹತ್ವದ ಪಾತ್ರ ವಹಿಸುತ್ತದೆ ಎಂದು ಬಣ್ಣಿಸಿದರು.

ವಿವಿಧ ರಾಜ್ಯಗಳಲ್ಲಿರುವ ಬರ ಪರಿಸ್ಥಿತಿಯ ಬಗ್ಗೆ ಮಾತನಾಡಿದ ಅವರು, ಪ್ರತಿ ಹನಿಯಲ್ಲಿ ಹೆಚ್ಚು ಬೆಳೆ ಕಾರ್ಯತಂತ್ರವನ್ನು ರೂಢಿಸಿಕೊಳ್ಳಬೇಕಿದೆ. ಜಲ್ ಶಕ್ತಿ ಮಂತ್ರಿಗಳು ಈ ಬಗ್ಗೆ ಸಹಾಯ ಮಾಡ್ತಾರೆ ಎಂದರು.

ಈ ವೇಳೆ ಬಡತನ, ನಿರುದ್ಯೋಗ, ಪ್ರವಾಹ, ಜನಸಂಖ್ಯೆ, ಭ್ರಷ್ಟಾಚಾರ ಹಾಗೂ ಹಿಂಸೆ ಕುರಿತಾಗಿಯೂ ಪ್ರಧಾನಿ ಮಾತನಾಡಿದರು. ಕಾರ್ಯ, ಪಾರದರ್ಶಕತೆ ಹಾಗೂ ಸಮರ್ಪಕ ಪೂರೈಕೆಯ ಲಕ್ಷಣಗಳುಳ್ಳ ಆಡಳಿತ ವ್ಯವಸ್ಥೆಯನ್ನು ಜಾರಿಗೆ ತರಲು ನಾವು ಹೆಜ್ಜೆ ಇಡುತ್ತಿದ್ದೇವೆ ಎಂದರು.

ರಾಜ್ಯ ಸರ್ಕಾರಗಳು ಕೇಂದ್ರ ಆರೋಗ್ಯ ವಿಮಾ ಯೋಜನೆಗಳ ಸದ್ಬಳಕೆ ಮಾಡಿಕೊಳ್ಳಬೇಕು ಎಂದರು.

ಸಭೆಯಲ್ಲಿ ವಿವಿಧ ರಾಜ್ಯಗಳ ಮುಖ್ಯಮಂತ್ರಿಗಳು, ನೂತನ ಕೇಂದ್ರ ಸಚಿವರು ಹಾಜರಿದ್ದರು.