'ಮಹಾ' ತೀರ್ಪು: ಶತಕದ ಸನಿಹದಲ್ಲಿ ಸುಸ್ತಾದ 'ಕೇಸರಿ', ಅಳೆದು ತೂಗಿ ಅಧಿಕಾರ ನೀಡಿದ ಮತದಾರ ಪ್ರಭು

2014ರಲ್ಲಿ 122 ಕ್ಷೇತ್ರದಲ್ಲಿ ಸುಲಭವಾಗಿ ಗೆದ್ದುಬೀಗಿದ ಬಿಜೆಪಿಗೆ ಗತಕಾಲದ ಮಿತ್ರ ಶಿವಸೇನೆ ಕೈಜೋಡಿಸಿತ್ತು. ಶಿವಸೇನೆ 63 ಸೀಟುಗಳಲ್ಲಿ ಗೆಲುವು ಸಾಧಿಸಿತ್ತು. ಆದರೆ ಈ ಬಾರಿ ಬಿಜೆಪಿ ನರ್ವಸ್ ನೈಂಟಿಯಲ್ಲಿ ಸುಸ್ತಾಗಿದ್ದು, ಮತದಾರನ ಮನದಾಳ ಬಹಿರಂಗವಾಗಿದೆ.

ಮುಂಬೈ:ಐದು ವರ್ಷಗಳ ಆಡಳಿತ ನಡೆಸಿದ ದೇವೇಂದ್ರ ಫಡ್ನವೀಸ್ ಈ ಬಾರಿ ಶತಕ ಬಾರಿಸುವಲ್ಲಿ ಎಡವಿದ್ದಾರೆ. ತಮ್ಮ ಅಧಿಕಾರವಧಿಯ ಅಭಿವೃದ್ಧಿಯನ್ನೇ ಮುಂದಿಟ್ಟುಕೊಂಡು ಚುನಾವಣೆಯಲ್ಲಿ ಭರ್ಜರಿ ಪ್ರಚಾರ ನಡೆಸಿದ್ದ ಬಿಜೆಪಿಗೆ ಮತದಾರ ಅಳೆದು ತೂಗಿ ಮತ ನೀಡಿದ್ದಾನೆ.

2014ರಲ್ಲಿ 122 ಕ್ಷೇತ್ರದಲ್ಲಿ ಸುಲಭವಾಗಿ ಗೆಲುವು ಪಡೆದಿದ್ದ ಬಿಜೆಪಿಗೆ ಗತಕಾಲದ ಮಿತ್ರ ಶಿವಸೇನೆ ಕೈಜೋಡಿಸಿತ್ತು. ಶಿವಸೇನೆ 63 ಸೀಟುಗಳನ್ನು ಗೆಲುವು ಸಾಧಿಸಿತ್ತು. ಆದರೆ ಈ ಬಾರಿ ಬಿಜೆಪಿ ಶತಕ ಸನಿಹದಲ್ಲಿ ಸುಸ್ತಾಗಿದೆ. 2014 ಕ್ಷೇತ್ರಕ್ಕಿಂತ ಹೆಚ್ಚಲ್ಲದಿದ್ದರೂ ಅಷ್ಟನ್ನು ಉಳಿಸಿಕೊಳ್ಳಲೂ ಆಡಳಿತ ಪಕ್ಷಕ್ಕೆ ಸಾಧ್ಯವಾಗಿಲ್ಲ.

ಸೆಂಚುರಿಗೂ ಮುನ್ನವೇ ಸುಸ್ತಾಗಲು ಕಾರಣವೇನು..?

ರೈತರ ಆತ್ಮಹತ್ಯೆಯ ರಿಂಗಣ:

ಮಹಾರಾಷ್ಟ್ರದಲ್ಲಿ ಫಡ್ನವೀಸ್ ಆಡಳಿತವನ್ನು ಒಂದು ಬಾರಿ ತೆರೆದು ನೋಡಿದರೆ ರೈತರ ಆತ್ಮಹತ್ಯೆ, ದೇಶದ ಬೆನ್ನಲುಬು ಎಂದೇ ಕರೆಸಿಕೊಳ್ಳುವ ರೈತರ ಸಮಸ್ಯೆ ಕಣ್ಣಿಗೆ ರಾಚುತ್ತದೆ. ಈ ಸಮಸ್ಯೆಯನ್ನು ಸರಿಪಡಿಸುವಲ್ಲಿ ಬಿಜೆಪಿ ಸರ್ಕಾರ ಸೋತಿದೆ ಎನ್ನುವುದು ಇಂದಿನ ಫಲಿತಾಂಶದಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಫಡ್ನವೀಸ್ ಆಡಳಿತದಲ್ಲಿ ಸುಮಾರು 16,000 ರೈತರು ಆತ್ಮಹತ್ಯೆಗೆ ಶರಣಾಗಿದ್ದಾರೆ ಎನ್ನುವುದು ಎನ್​ಸಿಪಿ ಮುಖಂಡ ಶರದ್ ಪವಾರ್ ಆರೋಪ. ಸಂಖ್ಯೆಗಳ ವಿಚಾರದಲ್ಲಿ ಕೊಂಚ ಏರುಪೇರಿದ್ದರೂ ರೈತರ ಆತ್ಮಹತ್ಯೆ ಚುನಾವಣೆ ವೇಳೆ ಹಿನ್ನಡೆಯಾಗಿತ್ತು. ಆದರೆ ಈ ವಿಚಾರವನ್ನು ಪ್ರಬಲವಾಗಿ ಮಂಡಿಸುವಲ್ಲಿ ವಿಪಕ್ಷ ಸೋತಿದ್ದು ಬಿಜೆಪಿಗೆ ಲಾಭವಾಗಿದೆ.

ಫಡ್ನವೀಸ್ ಸರ್ಕಾರ ರೈತರ ವಿಚಾರದ ಒಂದು ಹಂತಕ್ಕೆ ಸೋತಿದೆ ಎಂದು ಮತದಾರ ನಿರ್ಧರಿಸಿದ್ದರೂ ಅಧಿಕಾರವನ್ನು ಮಾತ್ರ ಬೇರೆ ಪಕ್ಷಕ್ಕೆ ಹಸ್ತಾಂತರಿಸಿಲ್ಲ ಎನ್ನುವುದು ಗಮನಿಸಬೇಕಾದ ಅಂಶ.

ಮಹಾರಾಷ್ಟ್ರ ಹಾಲಿ ಸಿಎಂ ದೇವೇಂದ್ರ ಫಡ್ನವೀಸ್

ಸಿಎಂ ಕ್ಷೇತ್ರದಲ್ಲೇ ಹೆಚ್ಚಾದ ಅಪರಾಧ ಪ್ರಕರಣ:

ಹಾಲಿ ಸಿಎಂ ಕ್ಷೇತ್ರ ನಾಗ್ಪುರದಲ್ಲಿ ಕಳೆದ ಐದು ವರ್ಷದಲ್ಲಿ ಅಪರಾಧ ಪ್ರಕರಣಗಳ ಭಾರಿ ಏರಿಕೆ ಕಂಡಿದೆ.

ಕೊಲೆ, ಕೊಲೆಗೆ ಯತ್ನ, ಅತ್ಯಾಚಾರಗಳ ಪ್ರಕರಣ ನಾಗ್ಪುರ ಮಾತ್ರವಲ್ಲದೆ ರಾಜ್ಯದ ಜನತೆಯನ್ನೂ ದಂಗುಬಡಿಸಿತ್ತು. ಸಿಎಂ ಪ್ರತಿನಿಧಿಸುವ ಕ್ಷೇತ್ರವೇ ಇಷ್ಟೊಂದು ಅಭದ್ರತೆ ಕೂಡಿತ್ತು ಎನ್ನುವುದು ಫಡ್ನವೀಸ್​ಗೆ ಕಪ್ಪುಹಣೆಪಟ್ಟಿಯಾಗಿತ್ತು.

ಅರೆ ಕಾಲೋನಿ ವಿವಾದ:

ಮತದಾನಕ್ಕೂ ಕೆಲ ದಿನಗಳ ಮುನ್ನ ನಡೆದ ಅರೆ ಕಾಲೋನಿ ವಿಚಾರ ರಾಷ್ಟ್ರಮಟ್ಟದಲ್ಲಿ ಸುದ್ದಿಯಾಗಿತ್ತು. ಮುಂಬೈನ ಅರೆ ಕಾಲೋನಿಯಲ್ಲಿ ಎರಡು ಸಾವಿರಕ್ಕೂ ಅಧಿಕ ಮರಗಳನ್ನು ಕಡಿದು ಮೆಟ್ರೋ ಕಾಮಗಾರಿಗೆ ಅನುವು ಮಾಡಿಕೊಡಲು ಸರ್ಕಾರ ಮುಂದಾಗಿತ್ತು. ಆದರೆ ಈ ವಿಚಾರ ಸುಪ್ರೀಂ ಮೆಟ್ಟಿಲೇರಿ ಕೊನೆಗೂ ಪರಿಸರವಾದಿಗಳ ಹೋರಾಟಕ್ಕೆ ಜಯ ದೊರೆತಿತ್ತು.

ಸಿಎಂ ಫಡ್ನವೀಸ್ ಮತ ಪ್ರಚಾರ

ಪ್ರಚಾರದಲ್ಲಿ ನಿರುತ್ಸಾಹ ತೋರಿದ ಮೈತ್ರಿಕೂಟ:

ಈ ಬಾರಿಯ ಚುನಾವಣೆಯಲ್ಲಿ ನಮಗೆ ಯಾವುದೇ ಪ್ರಬಲ ಎದುರಾಳಿ ಇಲ್ಲ ಎಂದು ಚುನಾವಣೆ ದಿನಾಂಕ ಘೋಷಣೆಯಾದ ಸಂದರ್ಭದಲ್ಲಿ ಸಿಎಂ ದೇವೇಂದ್ರ ಫಡ್ನವೀಸ್ ಹೇಳಿದ್ದರು. ಕಾಂಗ್ರೆಸ್ ಸಹ ಈ ಮಾತಿಗೆ ಪೂರಕವಾಗಿ ವರ್ತಿಸುತ್ತಿತ್ತು.

ಹಲವು ದಿನಗಳ ಹಗ್ಗಜಗ್ಗಾಟದ ಬಳಿಕ ಬಿಜೆಪಿ-ಶಿವಸೇನೆ ಮೈತ್ರಿ ಅಂತಿಮವಾಗಿತ್ತು. ಚುನಾವಣೆಯಲ್ಲಿ ಸುಲಭವಾಗಿ ಗೆಲ್ಲಬಹುದು ಎನ್ನುವ ಮನಸ್ಥಿತಿಯಲ್ಲಿ ಬಿಜೆಪಿ ಅಬ್ಬರದ ಪ್ರಚಾರವನ್ನೇನೂ ಮಾಡಲಿಲ್ಲ.

ಬಂಡಾಯದ ಬಿಸಿ:

ಈ ವಿಚಾರ ಬಿಜೆಪಿಗೆ ಅಷ್ಟೊಂದು ಹೊಡೆತ ನೀಡಿಲ್ಲವಾದರೂ ಗೆಲುವಿನ ಸಂಖ್ಯೆಯಲ್ಲಿ ಕೊಂಚ ತಲ್ಲಣ ಮೂಡಿಸಿದೆ ಎನ್ನುವುದು ಸತ್ಯ. ಚುನಾವಣೆ ಘೋಷಣೆಯಾದ ನಂತರದ ಬೆಳವಣಿಗೆಯಲ್ಲಿ ಹಲವರು ಬಿಜೆಪಿ ತೊರೆದಿದ್ದರು. ಬರೋಬ್ಬರಿ 38 ಕ್ಷೇತ್ರದಲ್ಲಿ ಬಿಜೆಪಿಯಿಂದ ಬಂಡಾಯ ಎದ್ದು ಹೋದವರೇ ಕಣಕ್ಕಿಳಿದಿದ್ದರು.