10 ವರ್ಷ, 10 ಲಕ್ಷ, ಬರೀ 30 ಸೆಕೆಂಡಿನ ಕೆಲಸ: ವಿಡಿಯೋ ನೋಡಿ

10 ವರ್ಷದ ಬಾಲಕನೋರ್ವ ಬ್ಯಾಂಕ್​​ನೊಳಗಿದ್ದ 10 ಲಕ್ಷ ರೂ. ದೋಚಿ ಪರಾರಿಯಾಗಿರುವ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದ್ದು, ಬಾಲಕನ ಕೃತ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ನಿಮಚ್ ​​(ಮಧ್ಯಪ್ರದೇಶ): ಬ್ಯಾಂಕ್​ನೊಳಗೆ ಹೋಗಿರುವ ಬಾಲಕ ಕೇವಲ ಅರ್ಧ ನಿಮಿಷದ ಕಾಲಾವಧಿಯಲ್ಲಿ ಬರೋಬ್ಬರಿ 10 ಲಕ್ಷ ರೂ ಎಗರಿಸಿ ಪರಾರಿಯಾಗಿರುವ ಘಟನೆ ಮಧ್ಯಪ್ರದೇಶದ ನಿಮಚ್​​ನಲ್ಲಿ ನಡೆದಿದೆ.

ಜವಾದ್​​​ನ ಜಿಲ್ಲಾ ಸ್ವಸಹಾಯ ಬ್ಯಾಂಕ್​​ನಲ್ಲಿ ಈ ಘಟನೆ ನಡೆದಿದೆ. ಬ್ಯಾಂಕ್​​ನೊಳಗೆ ಬಂದಿರುವ ಬಾಲಕ ಮತ್ತೋರ್ವ ವ್ಯಕ್ತಿಯ ಸಲಹೆಯಂತೆ ಕ್ಯಾಶಿಯರ್​​ ಕೌಂಟರ್​ ಬಳಿ ಆಗಮಿಸಿದ್ದಾನೆ. ಈ ವೇಳೆ ಅಲ್ಲಿ ಇಟ್ಟಿರುವ 500 ರೂ ಮುಖಬೆಲೆಯ ಎರಡು ಕಟ್ಟು​ ಹಣವನ್ನು ಬ್ಯಾಗ್​​ನೊಳಗೆ ಹಾಕಿಕೊಂಡಿದ್ದಾನೆ. ಇದರ ಸಂಪೂರ್ಣ ವಿಡಿಯೋ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಬ್ಯಾಂಕ್​​ನಲ್ಲಿ ಅನೇಕರು ಉಪಸ್ಥಿತರಿದ್ದರೂ ಬಾಲಕನ ಕೃತ್ಯ ಯಾರ ಗಮನಕ್ಕೂ ಬಂದಿರಲಿಲ್ಲ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು ಶೋಧ ಕಾರ್ಯ ನಡೆಸುತ್ತಿದ್ದಾರೆ.