ಮೇ 4ರ ಬಳಿಕ ದೇಶದ ಹಲವು ಜಿಲ್ಲೆಗಳಲ್ಲಿ ನಿರ್ಬಂಧ​​ ಸಡಿಲ: ಕೇಂದ್ರ ಗೃಹ ಸಚಿವಾಲಯ

ದೇಶದಲ್ಲಿ 2.0 ಲಾಕ್​​ಡೌನ್​ ಮೇ 3ಕ್ಕೆ ಮುಕ್ತಾಯಗೊಳ್ಳಲಿದ್ದು, ತದನಂತರ ಹೊಸ ಮಾರ್ಗಸೂಚಿ ಬಿಡುಗಡೆ ಮಾಡಲಾಗುವುದು ಎಂದು ಕೇಂದ್ರ ಗೃಹ ಸಚಿವಾಲಯ ಟ್ವೀಟ್​ ಮಾಡಿದೆ.

ನವದೆಹಲಿ:ದೇಶದಲ್ಲಿ ಹೇರಲಾಗಿರುವ 2ನೇ ಹಂತದ ಲಾಕ್​ಡೌನ್​ ಮೇ 3ಕ್ಕೆ ಮುಕ್ತಾಯಗೊಳ್ಳಲಿದ್ದು, ತದನಂತರ ದೇಶದಲ್ಲಿ ಹೊಸ ಮಾರ್ಗಸೂಚಿ ಬಿಡುಗಡೆಗೊಳಿಸುವುದಾಗಿ ಕೇಂದ್ರ ಗೃಹ ಇಲಾಖೆ ಟ್ವೀಟ್​ ಮೂಲಕ ಮಾಹಿತಿ ಬಿತ್ತರಿಸಿದೆ.

ಇದೇ ವೇಳೆ ಹಲವು ಜಿಲ್ಲೆಗಳಲ್ಲಿ ಲಾಕ್​ಡೌನ್​ ಗಣನೀಯ ಪ್ರಮಾಣದಲ್ಲಿ ಸಡಿಲಗೊಳಿಸುವುದಾಗಿ ತಿಳಿಸಿದ್ದು, ಕೊರೊನಾ ಸೋಂಕು ಇಲ್ಲದ ಜಿಲ್ಲೆಗಳಲ್ಲಿನ ಜನರು ನೆಮ್ಮದಿಯ ನಿಟ್ಟಿಸಿರು ಬಿಡುವಂತಾಗಿದೆ.

ಈಗಾಗಲೇ ವಿವಿಧ ರಾಜ್ಯಗಳಲ್ಲಿರುವ ಕೂಲಿ ಕಾರ್ಮಿಕರು, ವಿದ್ಯಾರ್ಥಿಗಳು ಹಾಗೂ ಪ್ರವಾಸಿಗರು ತಮ್ಮ ತಮ್ಮ ಊರಿಗೆ ತೆರಳಲು ಎಲ್ಲ ರೀತಿಯ ವ್ಯವಸ್ಥೆ ಮಾಡುವಂತೆ ಎಲ್ಲ ರಾಜ್ಯಗಳಿಗೂ ಕೇಂದ್ರ ಗೃಹ ಸಚಿವಾಲಯ ಸೂಚಿಸಿದೆ.

ಕೆಲವೊಂದು ರಾಜ್ಯಗಳಲ್ಲಿ ಕೋವಿಡ್​-19 ಪ್ರಕರಣಗಳು ತಗ್ಗದ ಕಾರಣ ಮೇ.3ರ ಬಳಿಕವೂ ನಿರ್ಬಂಧ ವಿಸ್ತರಣೆಗೊಳ್ಳುವುದು ಬಹುತೇಕ ಖಚಿತವಾಗುತ್ತಿದೆ. ಇನ್ನು, ಕಡಿಮೆ ಪ್ರಕರಣಗಳಿರುವ ರಾಜ್ಯಗಳಲ್ಲಿ ಹೊಸ ಮಾರ್ಗಸೂಚಿ ಹಾಗೂ ಯಾವುದೇ ಪ್ರಕರಣಗಳಿಲ್ಲದ ಜಿಲ್ಲೆಗಳು ಲಾಕ್​ಡೌನ್​ ಮುಕ್ತವಾಗುವ ಸಾಧ್ಯತೆ ದಟ್ಟವಾಗಿದೆ.

ಲಾಕ್​ಡೌನ್​ ವೇಳೆ ಕೆಂಪು ವಲಯ, ಹಸಿರು ವಲಯ​ ಹಾಗೂ ಕಿತ್ತಾಳೆ ವಲಯಗಳೆಂದು ವಿಭಾಗಿಸಲಾಗಿದೆ. ಆರಂಭದಲ್ಲಿದ್ದ 170 ಕೆಂಪು ವಲಯಗಳ ಸಂಖ್ಯೆ ಇದೀಗ 129ಕ್ಕೆ ಇಳಿಕೆಯಾಗಿದೆ.

ಪಂಜಾಬ್​ನಲ್ಲಿ ಮೇ 17, ತೆಲಂಗಾಣದಲ್ಲಿ ಮೇ 7ರವರೆಗೆ ಲಾಕ್​ಡೌನ್ ವಿಸ್ತರಣೆಗೊಂಡಿದೆ.