24 ಗಂಟೆಯಲ್ಲಿ 425 ಜನರು ಕೋವಿಡ್​ಗೆ ಬಲಿ... ಯುಎಸ್​ ದಾಖಲೆ ಮುರಿದ ಭಾರತ!

ಮಹಾಮಾರಿ ಕೊರೊನಾ ಅಬ್ಬರ ದೇಶದಲ್ಲಿ ಜೋರಾಗಿದ್ದು, ದಿನ ಕಳೆದಂತೆ ಅಧಿಕ ಪ್ರಕರಣ ಪತ್ತೆಯಾಗುತ್ತಿರುವುದು ಮತ್ತಷ್ಟು ಆತಂಕ ಮೂಡಿಸಿದೆ. ಇದರ ಮಧ್ಯೆ ಸಾವಿನ ಸಂಖ್ಯೆಯಲ್ಲೂ ಏರಿಕೆ ಕಂಡು ಬಂದಿದೆ.

ನವದೆಹಲಿ: ದೇಶಾದ್ಯಂತ ಕೊರೊನಾ ಅಬ್ಬರ ಜೋರಾಗಿದ್ದು, ದಿನದಿಂದ ದಿನಕ್ಕೆ ಸೋಂಕಿತರು ಹಾಗೂ ಸಾವಿನ ಸಂಖ್ಯೆಯಲ್ಲಿ ಗಣನೀಯ ಪ್ರಮಾಣದಲ್ಲಿ ಏರಿಕೆ ಕಂಡು ಬರುತ್ತಿದೆ.

ದೇಶದಲ್ಲಿ ಇಲ್ಲಿಯವರೆಗೆ ಕೊರೊನಾ ಸೋಂಕಿನಿಂದ 19,693 ಜನರು ಸಾವನ್ನಪ್ಪಿದ್ದು, ಬ್ರೇಜಿಲ್​​ನಲ್ಲಿ 64,867 ಹಾಗೂ ಯುಎಸ್​​ನಲ್ಲಿ 1,29,947 ಜನರು ಸಾವನ್ನಪ್ಪಿದ್ದಾರೆ. ಸದ್ಯ ದೇಶದಲ್ಲಿ 7,01,240 ಕೋವಿಡ್​ ಪ್ರಕರಣಗಳಿವೆ. ಕಳೆದ 24 ಗಂಟೆಗಳಲ್ಲಿ 24,248 ಹೊಸ ಕೇಸ್​ ಪತ್ತೆಯಾಗಿದ್ದು, ಇಲ್ಲಿಯವರೆಗೆ 4,24,432 ಜನರು ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್​ ಆಗಿದ್ದಾರೆ.

ವಿಶೇಷವೆಂದರೆ ಕಳೆದ 24 ಗಂಟೆಯಲ್ಲಿ ಯುಎಸ್​​ನಲ್ಲಿ 271 ಸಾವು ದಾಖಲಾಗಿದ್ದು, ಬ್ರೇಜಿಲ್​​ನಲ್ಲಿ 602 ಹಾಗೂ ಭಾರತದಲ್ಲಿ 425 ಜನರು ಸಾವನ್ನಪ್ಪಿದ್ದಾರೆ. ದೇಶದಲ್ಲಿ ಸದ್ಯ ಸಾವಿನ ಪ್ರಮಾಣ 2.8ರಷ್ಟಿದ್ದು, ಯುಎಸ್​​ನಲ್ಲಿ 4.5 ಹಾಗೂ ಬ್ರೇಜಿಲ್​​ನಲ್ಲಿ 4.1ರಷ್ಟಿದೆ. ಒಟ್ಟಾರೆ ಜಾಗತಿಕವಾಗಿ ಇದರ ಪ್ರಮಾಣ 4.7ರಷ್ಟಿದೆ.

ಕೊರೊನಾ ವಿರುದ್ಧ ಈಗಾಗಲೇ ಭಾರತ ಬಯೋಟೆಕ್​ ಲಸಿಕೆ ಕಂಡು ಹಿಡಿಯುವ ಕಾರ್ಯದಲ್ಲಿ ಮಗ್ನವಾಗಿದ್ದು, ಈ ವಾರದಿಂದ ಮಾನವರ ಮೇಲೆ ಅದರ ಪ್ರಯೋಗ ನಡೆಸಲಿದ್ದು, ಅದಕ್ಕಾಗಿ 1,100 ಸೋಂಕಿತರ ಆಯ್ಕೆ ಮಾಡಿಕೊಳ್ಳಲಾಗಿದೆ.