ಮೋದಿ ಹೆಸರಿರುವರು ಕಳ್ಳರು ಎಂದ ರಾಹುಲ್​​​: ವಿದೇಶದಲ್ಲೇ ಲಲಿತ್​​ ಮೋದಿ ಗುಡುಗು

ಮೋದಿ ಎಂಬ ಉಪನಾಮ​ ಇರುವವರೆಲ್ಲಾ ಕಳ್ಳರೇ ಎಂದ ರಾಹುಲ್​ ಗಾಂಧಿ ವಿರುದ್ಧ ಲಲಿತ್​ ಮೋದಿ ಕಿಡಿಕಾರಿದ್ದಾರೆ.

ನವದೆಹಲಿ:ಭ್ರಷ್ಟಾಚಾರದ ಆರೋಪ ಹೊತ್ತು ವಿದೇಶದಲ್ಲಿ ನೆಲೆಸಿರುವ ಲಲಿತ್​ ಮೋದಿ, ಕಾಂಗ್ರೆಸ್​ ಅಧ್ಯಕ್ಷ ರಾಹುಲ್​ ಗಾಂಧಿ ವಿರುದ್ಧ ಕಿಡಿಕಾರಿದ್ದಾರೆ.

ಚುನಾವಣಾ ಪ್ರಚಾರದಲ್ಲಿ ಮೋದಿ ಎಂಬ ಉಪನಾಮ ಇರುವವರೆಲ್ಲಾ ಕಳ್ಳರೇ ಎಂದು ರಾಹುಲ್​ ಹೇಳಿದ್ದರು. ಈ ಹೇಳಿಕೆಯನ್ನು ಖಂಡಿಸಿರುವ ಲಲಿತ್​ ಮೋದಿ, ರಾಹುಲ್​ರನ್ನು ಕೋರ್ಟ್​ಗೆಳೆಯುತ್ತೇನೆ ಎಂದು ಆಕ್ರೋಶದಿಂದ ನುಡಿದಿದ್ದಾರೆ.

ಈ ಬಗ್ಗೆ ಟ್ವೀಟ್​ ಮಾಡಿರುವ ಲಲಿತ್​, ಪಪ್ಪು ರಾಹುಲ್​ ಗಾಂಧಿ ಎಲ್ಲ ಮೋದಿಗಳು ಚೋರರೇ ಎಂದು ಹೇಳಿದ್ದಾರೆ. ಅವರನ್ನು ಇಂಗ್ಲೆಂಡ್​ ಕೋರ್ಟ್​ಗೆ ಎಳೆಯುತ್ತೇನೆ. 5 ದಶಕಗಳಿಂದ ದೇಶವನ್ನು ಲೂಟಿ ಮಾಡುತ್ತಿರುವುದು ಗಾಂಧಿ ಕುಟುಂಬ ಎಂದು ಇಡೀ ವಿಶ್ವಕ್ಕೇ ಗೊತ್ತು ಎಂದು ಕುಟುಕಿದ್ದಾರೆ.

ಮಹಾರಾಷ್ಟ್ರದಲ್ಲಿ ನಡೆದ ಚುನವಣಾ ಪ್ರಚಾರ ಸಭೆಯಲ್ಲಿ ಮಾತನಾಡಿದ್ದ ರಾಹುಲ್​, ಯಾಕೆ ಎಲ್ಲ ಕಳ್ಳರು ತಮ್ಮ ಹೆಸರಿನ ಹಿಂದೆ ಮೋದಿ ಎಂದು ಉಪನಾಮ ಇಟ್ಟುಕೊಂಡಿದ್ದಾರೆ? ನೀರವ್​ ಮೋದಿ, ಲಲಿತ್ ಮೋದಿ ಹಾಗೂ ನರೇಂದ್ರ ಮೋದಿ. ಇನ್ನೆಷ್ಟು ಮೋದಿಗಳು ಹೊರಬರ್ತಾರೋ ಗೊತ್ತಿಲ್ಲ ಎಂದು ಛೇಡಿಸಿದ್ದರು.

ಈ ಮೊದಲು ನರೇಂದ್ರ ಮೋದಿ ಸಹ ರಾಹುಲ್​ ಹೇಳಿಕೆಯನ್ನು ಖಂಡಿಸಿದ್ದರು. ಛತ್ತೀಸ್​ಗಢದಲ್ಲಿ ನಡೆದ ಸಮಾವೇಶದಲ್ಲಿ ಇಂತಹ ಮಾತನ್ನಾಡುವವರನ್ನು ಕಿತ್ತೊಗೆಯಬೇಕು. ಗುಜರಾತ್​​ನಲ್ಲಿ ಮೋದಿ ಎಂದು ಕರೆಸಿಕೊಳ್ಳುವ ಸಮುದಾಯದವರೆಲ್ಲ ಕಳ್ಳರೇ ಎಂದು ಪ್ರಶ್ನೆ ಮಾಡಿದ್ದರು.