17 ದಿನಗಳ ಹಿಂದೆ ಹುಟ್ಟಿದ ಮಗಳ ಮುಖ ನೋಡದೇ ಹುತಾತ್ಮನಾದ ವೀರ ಯೋಧ ಕುಂದನ್​!

ಇಂಡೋ-ಚೀನಾ ಗಡಿ ಲಡಾಖ್​ನ ಗಲ್ವಾನ್​ ಕಣಿವೆಯಲ್ಲಿ ಭಾರತ-ಚೀನಾ ನಡುವಿನ ಸಂಘರ್ಷದಲ್ಲಿ 20 ಭಾರತೀಯ ಯೋಧರು ಹುತಾತ್ಮರಾಗಿದ್ದು, ಇದೀಗ ಅವರ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ.

ಸಾಹಿಬ್​ಗಂಜ್​(ಜಾರ್ಖಂಡ್​​): ಸೋಮವಾರ ರಾತ್ರಿ ಲಡಾಖ್‍ನ ಗಲ್ವಾನ್ ಕಣಿವೆಯಲ್ಲಿ ನಡೆದ ಹಿಂಸಾತ್ಮಕ ಘರ್ಷಣೆಯಲ್ಲಿ ಭಾರತೀಯ 20 ಯೋಧರು ಹುತಾತ್ಮರಾಗಿದ್ದಾರೆ. ಅದರಲ್ಲಿ ಜಾರ್ಖಂಡನ್​​​​ 26 ವರ್ಷದ ಯೋಧ ಕುಂದನ್​ ಕುಮಾರ್​​ ಓಜಾ ಕೂಡ ಒಬ್ಬರು. ಕಳೆದ 17 ದಿನಗಳ ಹಿಂದೆ ತಂದೆಯಾಗಿದ್ದ ಇವರು ಪುಟ್ಟ ಮಗುವಿನ ಮುಖ ನೋಡದೇ ವೀರ ಮರಣವನ್ನಪ್ಪಿದ್ದಾರೆ.

ಬಿಹಾರ್​ ರೆಜಿಮೆಂಟ್​​ನ ಕುಂದನ್​ ಕುಮಾರ್​ ಕೇವಲ 26 ವರ್ಷದ ಯೋಧ. ಇವರ ಪತ್ನಿ ನಮಿತಾ ದೇವಿ ಕಳೆದ 17 ದಿನಗಳ ಹಿಂದೆ ಮುದ್ದಾದ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದರು. ಈ ವೇಳೆ ಮಾತನಾಡಿದ್ದ ಕುಂದನ್​, ಆದಷ್ಟು ಬೇಗ ಮಗಳ ಮುಖ ನೋಡಲು ಊರಿಗೆ ಬರುವೆ ಎಂದು ಫೋನ್​​ನಲ್ಲಿ ಹೇಳಿದ್ದರು. ಆದರೆ ಅವರ ಇದೀಗ ದೇಶಕ್ಕಾಗಿ ವೀರ ಮರಣವನ್ನಪ್ಪಿದ್ದಾರೆ.

ಕುಂದನ್​ ಕುಮಾರ್​ ಓಜಾ ಮಗಳು ದಿಕ್ಷಾ

ಕುಂದನ್​ ಕುಮಾರ್​ ಓಜಾ ಅವರ ತಂದೆ ರವಿಶಂಕರ್ ಓಜಾ ಕೃಷಿಕರಾಗಿದ್ದು, ಕುಂದನ್​ 2011ರಲ್ಲಿ ಬಿಹಾರ ರೆಜಿಮೆಂಟ್​ ಕತಿಹಾರ್​ಗೆ ನಿಯೋಜನೆಗೊಂಡಿದ್ದು, 2018ರಲ್ಲೇ ಇವರು ಮದುವೆ ಮಾಡಿಕೊಂಡಿದ್ದರು.

ಅವರ ಹುತಾತ್ಮರಾಗಿರುವ ವಿಷಯಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಸಹೋದರ ಕನ್ಹಯ್ಯ ಕುಮಾರ್​​, ನನ್ನ ಸಹೋದರ ದೇಶಕ್ಕಾಗಿ ಪ್ರಾಣ ತ್ಯಾಗ ಮಾಡಿದ್ದು, ಅದರ ಬಗ್ಗೆ ನನಗೆ ಹೆಮ್ಮೆ ಇದೆ. ನಾನು ಕೂಡ ಭಾರತೀಯ ಸೇನೆ ಸೇರಿ ಕೊನೆ ಉಸಿರು ಇರುವವರೆಗೂ ಶತ್ರುಗಳ ವಿರುದ್ಧ ಹೋರಾಡುವೆ ಎಂದಿದ್ದಾರೆ.