ವೃದ್ಧಾಶ್ರಮದಲ್ಲಿ ಚಿಗುರಿದ ಪ್ರೇಮ... ಪ್ರೀತಿಸಿ ಮದುವೆಯಾದ ಅಜ್ಜ-ಅಜ್ಜಿ

ಪ್ರೀತಿ ಅಂದ್ರೆನೇ ಹಂಗೆ.. ಅದು ಯಾವತ್ತು, ಯಾರಲ್ಲಿ ಚಿಗರೊಡೆಯುತ್ತೆ ಅಂತಾ ಹೇಳೋಕಾಗಲ್ಲ. ಹಾಗೆಯೇ ಕೇರಳದ ವೃದ್ಧಾಶ್ರಮವೊಂದರಲ್ಲಿ ಇಬ್ಬರು ವೃದ್ಧರು ಪರಸ್ಪರ ಪ್ರೀತಿಸಿ ಹಸಮಣೆ ಏರಿದ್ದಾರೆ. ಹಿಂದೂ ಸಂಪ್ರದಾಯದಂತೆ ಸತಿ-ಪತಿ ಆಗಿದ್ದಾರೆ.

ಕೇರಳ/ತ್ರಿಶೂರ್:'ವೃದ್ಧರ ಪ್ರೇಮವಿವಾಹ' ಇದು ಕೇಳಲು ಹೊಸದಾಗಿದ್ದರೂ, ಕೇರಳದ ವೃದ್ಧಾಶ್ರಮವೊಂದು ಇದಕ್ಕೆ ಸಾಕ್ಷಿಯಾಗಿದೆ. ಇಬ್ಬರು ವೃದ್ಧರ ಪರಿಚಯ ಪ್ರೀತಿಗೆ ತಿರುಗಿ ಅವರ ದಾಂಪತ್ಯ ಜೀವನಕ್ಕೆ ದಾರಿಯಾಗಿದೆ.

ಕೊಚಾನಿಯನ್ ಮೆನನ್ (67) ಹಾಗೂ ಲಕ್ಷ್ಮಿ ಅಮ್ಮಲ್ (66) ಕಳೆದ ಶನಿವಾರ ಪ್ರೇಮ ವಿವಾಹ ಮಾಡಿಕೊಂಡ ವೃದ್ಧ ದಂಪತಿ. ಇವರು ಕೇರಳದ ರಾಮವರ್ಮಪುರಂ ವೃದ್ಧಾಶ್ರಮದಲ್ಲಿ ಹಿಂದೂ ಸಂಪ್ರದಾಯದಂತೆ ವಿವಾಹವಾದರು.

ಗಂಡನ ಮರಣಾನಂತರ ಲಕ್ಷ್ಮಿ ಅಮ್ಮಲ್ ಎರಡು ವರ್ಷಗಳಿಂದ ವೃದ್ಧಾಶ್ರಮದಲ್ಲೇ ಇದ್ದರು. ಕಳೆದ ಎರಡು ತಿಂಗಳ ಹಿಂದೆ ಕೊಚಾನಿಯನ್ ಮೆನನ್​ ವೃದ್ಧಾಶ್ರಮಕ್ಕೆ ಬಂದಿದ್ದರಂತೆ. ಈ ವೇಳೆ ಒಬ್ಬರನ್ನೊಬ್ಬರು ಭೇಟಿಯಾದಾಗ ಪ್ರೇಮಾಂಕುರವಾಗಿತ್ತು. ಯಾರೂ ಇಲ್ಲದೆ ಅನಾಥರಾಗಿದ್ದ ಈ ವೃದ್ಧರ ಪ್ರೇಮ ವಿವಾಹಕ್ಕೆ ಆಶ್ರಮದ ಮಂಡಳಿ ಕೂಡ ಗ್ರೀನ್​​ ಸಿಗ್ನಲ್​​ ನೀಡಿದೆ.

ಕೇರಳದ ಕೃಷಿ ಸಚಿವ ವಿ.ಎಸ್. ಸುನೀಲ್ ಕುಮಾರ್ ಮತ್ತು ಇಲ್ಲಿನ ಮೇಯರ್ ವಿವಾಹದಲ್ಲಿ ಭಾಗಿಯಾಗಿ ಶುಭ ಹಾರೈಸಿದ್ದಲ್ಲದೇ ತಮ್ಮ ಫೇಸ್‌ಬುಕ್ ಖಾತೆಯಲ್ಲಿ ದಂಪತಿಯ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ.

2 ವರ್ಷದ ಮುಂಚೆಯೇ ಇವರಿಬ್ಬರು ಪರಿಚಿತರು:

ಕೊಚಾನಿಯನ್ ಅವರು ಲಕ್ಷ್ಮಿ ಅಮ್ಮಲ್ ಅವರ ದಿವಂಗತ ಪತಿ ಕೃಷ್ಣಯ್ಯರ್ ಅವರ ಸಹಾಯಕರಾಗಿದ್ದರಂತೆ. ಪತಿಯ ಮರಣದ ನಂತರ, ಕೊಚಾನಿಯನ್ ಅಗತ್ಯವಿದ್ದಾಗ ಅಮ್ಮಲ್‌ಗೆ ಸಹಾಯ ಮಾಡುತ್ತಿದ್ದರು. ನಂತರ ರಾಮವರ್ಮಪುರಂ ವೃದ್ಧಾಶ್ರಮದಲ್ಲಿ ಅಮ್ಮಲ್​ ಅವರನ್ನು ಬಿಟ್ಟರು. ಬಳಿಕ ಎರಡು ತಿಂಗಳ ಹಿಂದೆ ವೃದ್ಧಾಶ್ರಮದಲ್ಲಿ ಒಬ್ಬರನ್ನೊಬ್ಬರು ಭೇಟಿಯಾಗಿ ಮದುವೆಯಾಗಲು ನಿರ್ಧರಿಸಿದರು. ಸದ್ಯ ಈ ವೃದ್ಧ ದಂಪತಿಯ ಮದುವೆಯ ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ಟ್ರೆಂಡಿಂಗ್ ಆಗುತ್ತಿವೆ.