ನವದೆಹಲಿ: ಆನ್ಲೈನ್ ಪ್ರವೇಶ ಪರೀಕ್ಷೆ ವಿರುದ್ಧ ಪ್ರತಿಭಟನೆ ನಡೆಸುತ್ತಿರುವ ಜೆಎನ್ಯು ವಿದ್ಯಾರ್ಥಿಗಳು ಏಕಾಏಕಿ ಕುಲಪತಿಗಳ ಮನೆಗೆ ನುಗ್ಗಿ, ಅವರ ಪತ್ನಿಯನ್ನು ಕೆಲ ಗಂಟೆಗಳ ಕಾಲ ಗೃಹಬಂಧನದಲ್ಲಿರಿಸಿದ್ದರು ಎಂಬ ಆರೋಪ ಕೇಳಿ ಬಂದಿದೆ.
ಜವಹರಲಾಲ್ ನೆಹರು ವಿಶ್ವವಿದ್ಯಾಲಯದ ಕುಲಪತಿ ಎಂ.ಜಗದೀಶ್ ಕುಮಾರ್ ಇಂತಹ ಆರೋಪ ಮಾಡಿದ್ದಾರೆ. ನಿನ್ನೆ ತಾವು ಮೀಟಿಂಗ್ಗೆಂದು ತೆರಳಿದ್ದಾಗ ನೂರಾರು ವಿದ್ಯಾರ್ಥಿಗಳು ಮನೆಗೆ ನುಗ್ಗಿ, ದಾಂಧಲೆ ಮಾಡಿದ್ದಾರೆ ಎಂದು ಆಪಾದನೆ ಮಾಡಿದ್ದಾರೆ.
ಮೀಟಿಂಗ್ಗೆಂದು ತೆರಳಿದ್ದ ನಾನು ಸಂಜೆ 6 ಗಂಟೆ ವೇಳೆಗೆ ಮನೆಗೆ ಹಿಂದಿರುಗಿದಾಗ 400-500 ವಿದ್ಯಾರ್ಥಿಗಳು ಮನೆಗೆ ಮುಂದೆ ನಿಂತಿದ್ದರು. ಅವರೆಲ್ಲ ಗೇಟ್ ಮುರಿದು ಒಳಗೆ ನುಗ್ಗಿದ್ದರು. ಈ ವೇಳೆ ಮನೆಯಲ್ಲಿ ನನ್ನ ಹೆಂಡತಿ ಒಬ್ಬಳೇ ಇದ್ದಳು. ಮನೆಯ ಮುಂದೆ ಅಷ್ಟೊಂದು ಜನ ಸೇರಿದ್ದಾಗ ಒಂಟಿ ಮಹಿಳೆ ಎಷ್ಟು ಹೆದರಿರಬೇಡ ನೀವೇ ಯೋಚಿಸಿ. ಇದರಿಂದ 3 ಗಂಟೆಗಳಿಗೂ ಹೆಚ್ಚು ಕಾಲ ಆಕೆ ಗೃಹಬಂಧನದಲ್ಲಿರುವಂತಾಯ್ತು. ಇದು ಪ್ರತಿಭಟನೆ ಮಾಡುವ ವಿಧಾನವೇ? ಎಂದು ಪ್ರಶ್ನಿಸಿದ್ದಾರೆ. ಇದೆಲ್ಲದರಿಂದ ಆತಂಕಗೊಂಡಿದ್ದ ಕುಲಪತಿ ಅವರ ಪತ್ನಿಯನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು ಎಂದು ತಿಳಿದುಬಂದಿದೆ.
ಆದರೆ, ವಿದ್ಯಾರ್ಥಿಯೊಬ್ಬ ಈ ಆರೋಪ ಅಲ್ಲಗಳೆದಿದ್ದು, ನಾವು ಕುಲಪತಿಗಳನ್ನು ಭೇಟಿ ಮಾಡಲೆಂದು ಅವರ ಮನೆಗೆ ತೆರಳಿದ್ದೆವು. ಆದರೆ, ಅಲ್ಲಿ ಭದ್ರತಾ ಸಿಬ್ಬಂದಿ ನಮ್ಮ ಮೇಲೆ ಹಲ್ಲೆ ಮಾಡಿದರು. ಘಟನೆಯಲ್ಲಿ ವಿಶ್ವವಿದ್ಯಾಲಯದ ವಿದ್ಯಾರ್ಥಿ ಸಂಘದ ಅಧ್ಯಕ್ಷ ಎನ್. ಸಾಯಿ ಬಾಲಾಜಿ ಸೇರಿ ಹಲವು ವಿದ್ಯಾರ್ಥಿಗಳು ಗಾಯಗೊಂಡಿದ್ದಾರೆ ಎಂದು ಪ್ರತ್ಯಾರೋಪ ಮಾಡಿದ್ದಾರೆ.
ಪ್ರವೇಶ ಪರೀಕ್ಷೆಯಲ್ಲಿ ಆನ್ಲೈನ್ ವ್ಯವಸ್ಥೆ ವಿರೋಧಿಸಿ ಕಳೆದೊಂದು ವಾರದಿಂದ 7 ವಿದ್ಯಾರ್ಥಿಗಳು ಜೆಎನ್‌ಯುನಲ್ಲಿ ಉಪವಾಸ ಸತ್ಯಾಗ್ರಹ ನಡೆಸುತ್ತಿದ್ದಾರೆ.
