ಜೆಟ್​ ಏರ್​​​ವೇಸ್​​​ ​ಅಧ್ಯಕ್ಷ ಸ್ಥಾನ ತೊರೆದ ನರೇಶ್​ ಗೋಯಲ್

ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಜೆಟ್​ ಏರ್​​​ವೇಸ್​​​ ಸಂಸ್ಥಾಪಕ ನರೇಶ್​ ಗೋಯಲ್. ಇವರೊಂದಿಗೆ ಪತ್ನಿ​​​ ಅನಿತಾ ಗೋಯಲ್ ಸಹ ಹೊರ ಬಂದಿದ್ದಾರೆ. ಒಂದು ಬಿಲಿಯನ್​ ಡಾಲರ್​ ಸಾಲದ ಹೊರೆಯಿಂದಾಗಿ ಆರ್ಥಿಕ ಸಂಕಷ್ಟ ಎದುರಿಸುತ್ತಿರುವ ಸಂಸ್ಥೆ ತುಂಬಾ ಸಂಕಷ್ಟದಲ್ಲಿದೆ.

ಮುಂಬೈ: 25 ವರ್ಷಗಳ ಹಿಂದೆ ಪ್ರಾರಂಭವಾಗಿದ್ದ, ಆರ್ಥಿಕ ಸಮಸ್ಯೆಗಳನ್ನು ಎದುರಿಸುತ್ತ ಬಂದ ಜೆಟ್​ ಏರ್​ವೇಸ್​​​ ಸಂಸ್ಥಾಪಕ ನರೇಶ್​ ಗೋಯಲ್ ತಮ್ಮ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.

ಅಲ್ಲದೇ ನರೇಶ್​ ಗೋಯಲ್ ಹಾಗೂ ಅವರ ಪತ್ನಿ ಅನಿತಾ ಗೋಯಲ್​ ಕೂಡ ಏರ್​ವೇಸ್​​ ಬೋರ್ಡ್​ನಿಂದಲೇ ಹೊರ ಬಂದಿದ್ದಾರೆ ಎಂದು ಹಾಗೂ ಇನ್ನು ಮುಂದೆ ಕಂಪನಿಯ ಮಧ್ಯಂತರ ನಿರ್ವಹಣಾ ಸಮಿತಿಯು ಸಾಲದಾತರ ಸಲಹೆ ಮೇರೆಗೆ ಏರ್​ಲೈನ್​ನ ದಿನನಿತ್ಯದ ಕಾರ್ಯಗಳನ್ನು, ನಗದು ವ್ಯವಹಾರಗಳನ್ನು ನೋಡಿಕೊಳ್ಳಲಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

ಏರ್​ಲೈನ್​ ಒಂದು ಬಿಲಿಯನ್​ ಡಾಲರ್​ ಸಾಲವನ್ನು ಹೊಂದಿದ್ದು, ತನ್ನ ಪೈಲಟ್​ಗಳಿಗೆ ಬಾಕಿ ಸಂಬಳ ನೀಡುವುದರ ಜೊತೆಗೆ ಬ್ಯಾಂಕುಗಳಿಗೆ, ಪೂರೈಕೆದಾರರಿಗೆ ಹಣ ಮರುಪಾವತಿ ಮಾಡಬೇಕಿದೆ.

ಗ್ಲೋಬಲ್​ ಕಾಂಪ್ಲಿಯನ್ಸ್​ನ ಉಪಾಧ್ಯಕ್ಷ ಹಾಗೂ ಕಂಪನಿಯ ಕಾರ್ಯದರ್ಶಿ ಕುಲ್ದೀಪ್ ಶರ್ಮಾ ಹೇಳಿಕೆಯ ಪ್ರಕಾರ ಸಾಲದಾತರು, ಹೊಸ ಹೂಡಿಕೆದಾರರ ಷೇರುಗಳ ಮಾರಾಟ / ವಿತರಣೆಗಾಗಿ ಬಿಡ್ಡಿಂಗ್ ಪ್ರಕ್ರಿಯೆಯನ್ನು ಆರಂಭಿಸಲಿದ್ದು, ಪ್ರಸಕ್ತ ಹಣಕಾಸು ವರ್ಷದ ಜೂನ್​ ಒಳಗೆ ಪ್ರಕ್ರಿಯೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.