ರೋಮ್: ಮಾನವರಿಗೆ ಕೋವಿಡ್-19 ವೈರಸ್ ಹರಡದಂತೆ ತಡೆಗಟ್ಟುವ ವ್ಯಾಕ್ಸಿನ್ ಅನ್ನು ಯಶಸ್ವಿಯಾಗಿ ಅಭಿವೃದ್ಧಿಪಡಿಸಿರುವುದಾಗಿ ಇಟಲಿಯ ಕೆಲ ಸಂಶೋಧಕರು ಹೇಳಿಕೊಂಡಿದ್ದಾರೆ. ವೈರಸ್ ಅನ್ನು ತಟಸ್ಥಗೊಳಿಸಬಲ್ಲ ವ್ಯಾಕ್ಸಿನ್ ಕಂಡುಹಿಡಿದಿರುವುದಾಗಿ ಕೊರೊನಾ ವೈರಸ್ ಕಾಯಿಲೆ ಔಷಧಿಯ ಕುರಿತು ಸಂಶೋಧನೆಗಳನ್ನು ನಡೆಸುತ್ತಿರುವ ಇಟಲಿಯ ಟಾಕಿಸ್ ಸಂಸ್ಥೆಯ ಸಿಇಓ ಲುಯಿಗಿ ಆರಿಸಿಚ್ಚಿಯೊ ಹೇಳಿದ್ದಾರೆ ಎಂದು ಅರಬ್ ನ್ಯೂಸ್ ವರದಿ ಮಾಡಿದೆ.
"ಇಟಲಿಯಲ್ಲಿ ತಯಾರಿಸಲಾದ ಈ ವ್ಯಾಕ್ಸಿನ್ ಪ್ರಾಥಮಿಕ ಪರೀಕ್ಷಾ ಹಂತದಲ್ಲಿದೆ. ಬೇಸಿಗೆಯ ನಂತರ ಮಾನವರ ಮೇಲೆ ವ್ಯಾಕ್ಸಿನ್ ಪ್ರಯೋಗಿಸಿ ನೋಡಲಾಗುವುದು." ಎಂದು ಆರಿಸಿಚ್ಚಿಯೊ ಹೇಳಿರುವುದಾಗಿ ಇಟಲಿಯ ನ್ಯೂಸ್ ಏಜೆನ್ಸಿ ANSA ತಿಳಿಸಿದೆ.