ಎಲ್ಲಿ ಹೋಯ್ತು AN-32 ವಿಮಾನ? ರಾತ್ರಿಯಿಡೀ ಕಾರ್ಯಾಚರಣೆ ನಡೆಸಿದರೂ ಸಿಗದ ಸುಳಿವು!

ನಾಪತ್ತೆಯಾಗಿರುವ ಭಾರತೀಯ ವಾಯುಪಡೆಯ AN-32 ವಿಮಾನಕ್ಕಾಗಿ ರಾತ್ರಿಯಿಡೀ ಹುಡುಕಾಟ ನಡೆಸಿದರೂ ಈವರೆಗೆ ಪತ್ತೆಯಾಗಿಲ್ಲ ಎಂದು ತಿಳಿದುಬಂದಿದೆ.

ನವದೆಹಲಿ: ನಾಪತ್ತೆಯಾಗಿರುವ ಭಾರತೀಯ ವಾಯುಪಡೆಯ AN-32 ವಿಮಾನಕ್ಕಾಗಿ ರಾತ್ರಿಯಿಡೀ ಹುಡುಕಾಟ ನಡೆಸಿದರೂ ಈವರೆಗೆ ಪತ್ತೆಯಾಗಿಲ್ಲ ಎಂದು ತಿಳಿದುಬಂದಿದೆ.

ಅಸ್ಸೋಂನ ಜೊಹ್ರಾತ್​ನಿಂದ ಟೇಕ್​ಆಫ್ ಆಗಿದ್ದ AN-32 ವಿಮಾನ ನಿನ್ನೆ ನಾಪತ್ತೆಯಾಗಿತ್ತು. ಸುಖೊಯ್-30 ವಿಮಾನ ಹಾಗೂ C-130 ವಿಶೇಷ ಕಾರ್ಯಾಚರಣೆ ವಿಮಾನ ಸೇರಿ ಹಲವಾರು ವಿಮಾನಗಳು, ಭಾರತೀಯ ಸೇನೆ, ಐಟಿಬಿಪಿ ಹುಡುಕಾಟ ನಡೆಸುತ್ತಿವೆ. ರಾತ್ರಿಯಿಡೀ ಹುಡುಕಾಟ ನಡೆಸಿದರೂ ವಿಮಾನ ಪತ್ತೆಯಾಗಿಲ್ಲದ ಕಾರಣ ಶೋಧ ಕಾರ್ಯ ಮುಂದುವರೆದಿದೆ.

ಮಧ್ಯಾಹ್ನ 12:25 ಅಸ್ಸೋನಿಂದ ಹೊರಟ ವಿಮಾನದಲ್ಲಿ 15 ಮಂದಿ ವಾಯುಪಡೆಯ ಸಿಬ್ಬಂದಿ ಇದ್ದರು. ಈ ವಿಮಾನ ಅರುಣಾಚಲ ಪ್ರದೇಶದ ಮೆಂಚುಕದಲ್ಲಿ ಲ್ಯಾಂಡ್​​ ಆಗಬೇಕಿತ್ತು. ಆದರೆ ಮಧ್ಯಾಹ್ನ 1 ಗಂಟೆಗೆ ಸಂಪರ್ಕ ಕಡಿದುಕೊಂಡಿತ್ತು.

ಇನ್ನು ಅರುಣಾಚಲಪ್ರದೇಶದ ಪಶ್ಚಿಮ ಶಿಯಾಂಗ್​ನಲ್ಲಿ ವಿಮಾನದ ಅವಶೇಷಗಳು ಪತ್ತೆಯಾಗಿವೆ ಎಂಬ ವರದಿಯನ್ನು ವಾಯುಪಡೆ ತಳ್ಳಿಹಾಕಿದೆ. ಇಂತಹ ಯಾವುದೇ ಅವಶೇಷಗಳು ನಮಗೆ ಸಿಕ್ಕಿಲ್ಲ ಎಂದು ಸ್ಪಷ್ಟನೆ ನೀಡಿದೆ.

ಇದೇ ಮೊದಲಲ್ಲ:

2009ರ ಜೂನ್​ನಲ್ಲಿ ವಾಯುಪಡೆಯ AN-32 ವಿಮಾನ ಅರುಣಾಚಲಪ್ರದೇಶದ ಪಶ್ಚಿಮ ಸಿಯಾಂಗ್​ನ ರಿಂಚಿ ಹಿಲ್ಸ್​ ಬಳಿಯ ಹೆಯೊ ಗ್ರಾಮದ ಬಳಿ ಪತನವಾಗಿತ್ತು. ಭದ್ರತಾ ಪಡೆಯ 13 ಸಿಬ್ಬಂದಿ ಈ ಅಪಘಾತದಲ್ಲಿ ಮೃತಪಟ್ಟಿದ್ದರು. ಈ ವಿಮಾನ ಲ್ಯಾಂಡ್ ಆಗಬೇಕಿದ್ದ ಮೆಚುಕ ಪ್ರದೇಶದಿಂದ 30 ಕಿ.ಮೀ. ದೂರದಲ್ಲಿ ಪತನವಾಗಿತ್ತು.

ಇನ್ನು 2016ರ ಸೆಪ್ಟೆಂಬರ್​ನಲ್ಲಿ ಚೆನ್ನೈನ ಪೋರ್ಟ್​ ಬ್ಲೈರ್​ನಿಂದ AN-32 ವಿಮಾನ ನಾಪತ್ತೆಯಾಗಿದ್ದು, ಇನ್ನೂ ಪತ್ತೆಯಾಗಿಲ್ಲ. ವಿಮಾನದಲ್ಲಿ 7 ಮಂದಿ ಭದ್ರತಾ ಸಿಬ್ಬಂದಿ ಇದ್ದರು.