ಕೊರೊನಾ ಸೋಂಕಿತರ ಸ್ಥಳಾಂತರಕ್ಕೆ ಭಾರತೀಯ ವಾಯುಪಡೆಯಿಂದ ನೂತನ ವ್ಯವಸ್ಥೆ

ಕೊರೊನಾ ವೈರಸ್​ನಂತಹ ಸಾಂಕ್ರಾಮಿಕ ರೋಗಗಳಿಗೆ ತುತ್ತಾದವರು ಜನಸಂಪರ್ಕ ಸಾಧ್ಯವಾಗದ ಹಾಗೂ ಅತಿ ದೂರದ ಪ್ರದೇಶಗಳಲ್ಲಿ ಇದ್ದರೆ ಅಂತವರನ್ನು ಸ್ಥಳಾಂತರ ಮಾಡಲು ಭಾರತೀಯ ವಾಯುಪಡೆಯು ನೂತನ ರಕ್ಷಣಾ ಪಾಡ್​ ಸಿದ್ಧಪಡಿಸಿದೆ.

ನವದೆಹಲಿ:ಅತಿ ದೂರದ, ಜನಸಂಪರ್ಕ ಸಾಧ್ಯವಾಗದ ಪ್ರದೇಶಗಳಲ್ಲಿ ಕೊರೊನಾ ವೈರಸ್​ನಂತಹ ಸಾಂಕ್ರಾಮಿಕ ರೋಗಗಳಿಗೆ ತುತ್ತಾದವರು ಇದ್ದರೆ ಅಂತವರನ್ನು ಸ್ಥಳಾಂತರಕ್ಕೆ ಭಾರತೀಯ ವಾಯುಪಡೆಯು 'ಅರ್ಪಿತ್'​ (Airborne Rescue Pod for Isolated Transportation) ಎಂಬ ಪಾಡ್​ ಸಿದ್ಧಪಡಿಸಿದೆ.

'ಅರ್ಪಿತ್'ನ್ನು ವಾಯುಪಡೆಯು ದೇಶೀಯವಾಗಿ ವಿನ್ಯಾಸಗೊಳಿಸಿದ್ದು, ಅದನ್ನು ವಿಮಾನ ಹಾಗೂ ಹೆಲಿಕಾಪ್ಟರ್‌ನಲ್ಲಿ ಪ್ರತ್ಯೇಕವಾಗಿ ಅಳವಡಿಕೆ ಮಾಡಬಹುದಾಗಿದೆ. ಕೊರೊನಾದಂತಹ ಸಾಂಕ್ರಾಮಿಕ ರೋಗ ಹರಡುವುದನ್ನು ತಡೆಯುವಲ್ಲಿ ಅರ್ಪಿತ್ ಬಹಳ ಸಹಕಾರಿಯಾಗಲಿದೆ. ವಾಯುಯಾನ ಪ್ರಮಾಣೀಕೃತ ವಸ್ತುವಿನಿಂದ ಸಿದ್ಧಗೊಂಡ ಹಗುರವಾದ ಐಸೋಲೇಸನ್​ ವ್ಯವಸ್ಥೆಯನ್ನು ಹೊಂದಿದ್ದು, ಸದ್ಯ ಇರುವುದಕ್ಕಿಂತ ಹೆಚ್ಚು ವಿಶಾಲವಾಗಿ ಹಾಗೂ ರೋಗಿಗಳ ಗೋಚರತೆಗಾಗಿ ಪಾರದರ್ಶಕತೆ ಇರುವಂತೆ ಅರ್ಪಿತ್ ರೂಪುಗೊಂಡಿದೆ.

ಅರ್ಪಿತ್​​ನ್ನು ದೇಶೀಯವಾಗಿ 60 ಸಾವಿರ ರೂ. ವೆಚ್ಚದಲ್ಲಿ ವಿನ್ಯಾಸಗೊಳಿಸಲಾಗಿದೆ. ಇದೇ ಮಾದರಿಯ ಆಮದು ಉಪಕರಣಗಳಿಗೂ ಕೂಡ 60 ಲಕ್ಷ ರೂ. ವೆಚ್ಚ ತಗಲುತ್ತದೆ ಎಂದು ಭಾರತೀಯ ವಾಯುಪಡೆ ತಿಳಿಸಿದೆ.

ವಾಯು ಮಾರ್ಗದ ಮೂಲಕ ಸೋಂಕಿತ (ರೋಗಿ)ನನ್ನು ಸಾಗಿಸುವಾಗ ವಾಯುಪಡೆ ಸಿಬ್ಬಂದಿ, ಭೂಸೇನಾ ಸಿಬ್ಬಂದಿ ಮತ್ತು ಆರೋಗ್ಯ ಕಾರ್ಯಕರ್ತರಿಗೆ ವೈರಸ್​​ ತಗುಲುವುದನ್ನು ತಡೆಯಬಹುದಾಗಿದೆ. ಅಲ್ಲದೆ ಎತ್ತರದ ಪ್ರದೇಶ, ದೂರ ಮತ್ತು ಜನಸಂಪರ್ಕ ಅಸಾಧ್ಯವಾದ ಸ್ಥಳಗಳಲ್ಲಿರುವ ರೋಗಿಗಳನ್ನು ಸ್ಥಳಾಂತರಿಸಲು ಅರ್ಪಿತ್ ನೆರವಾಗಲಿದೆ.