ವಕ್ರ 'ದಂತ': ಶಾದಿ ಮಾಡ್ಕೊಂಡ ಐದೇ ತಿಂಗಳಿಗೆ ಹೆಂಡ್ತಿಗೆ ತಲಾಖ್​ ಕೊಟ್ಟ ಪತಿ!

ಕಟ್ಟಿಕೊಂಡ ಹೆಂಡತಿಯ ಹಲ್ಲುಗಳು ಸರಿ ಇಲ್ಲ ಎಂದು ಕಾರಣ ನೀಡಿ ಮದುವೆಯಾಗಿ ಕೇವಲ ಐದೇ ತಿಂಗಳಿಗೆ ಆಕೆಗೆ ತಲಾಖ್​​ ನೀಡಿರುವ ವಿಚಿತ್ರ ಘಟನೆ ಹೈದರಾಬಾದ್​​ನಲ್ಲಿ ನಡೆದಿದೆ.

ಹೈದರಾಬಾದ್​​​:ಕಟ್ಟಿಕೊಂಡ ಹೆಂಡತಿ ಹಲ್ಲು ವಕ್ರವಕ್ರವಾಗಿದೆ ಎಂದು ಸಬೂಬು ಹೇಳಿದ ಪತಿಯೊಬ್ಬ ಕೇವಲ ಐದೇ ತಿಂಗಳಲ್ಲಿ ಆಕೆಗೆ ತಲಾಖ್​ ನೀಡಿರುವ ಘಟನೆ ಹೈದರಾಬಾದ್​ನ ಕುಶೈಗುಡಾದಲ್ಲಿ ನಡೆದಿದೆ.

ಮುಸ್ತಾಫಾ ಎಂಬಾತ ಜೂನ್​ 27, 2019ರಲ್ಲಿ ರುಕ್ಸಾನ್​ ಬೇಗಂ ಎಂಬಾಕೆಯನ್ನು ಮದುವೆಯಾಗಿದ್ದಾನೆ. ಇದಾದ ಬಳಿಕ ಪ್ರತಿದಿನ ವರದಕ್ಷಿಣೆಗಾಗಿ ಕಿರುಕುಳ ನೀಡುತ್ತಿದ್ದ ಗಂಡ, ನಿನ್ನ ಹಲ್ಲು ವಕ್ರವಾಗಿರುವ ಕಾರಣ ಸಂಸಾರ ನಡೆಸಲು ಸಾಧ್ಯವಿಲ್ಲ ಎಂದು ತ್ರಿವಳಿ ತಲಾಖ್​ ನೀಡಿದ್ದಾನೆ. ಇದರಿಂದ ಮನನೊಂದಿರುವ ಮಹಿಳೆ ಇದೀಗ ಪೊಲೀಸರಿಗೆ ದೂರು ನೀಡಿದ್ದಾಳೆ.

ಮದುವೆಯಾದ ಬಳಿಕ ಪ್ರತಿದಿನ ಗಂಡನ ಮನೆಯವರು ವರದಕ್ಷಿಣೆ ತರುವಂತೆ ಚಿತ್ರಹಿಂಸೆ ನೀಡುತ್ತಿದ್ದರು. ಆದರೆ ನನ್ನ ತವರು ಮನೆಯವರು ಈಗಾಗಲೇ ಹೇಳಿದಷ್ಟು ಹಣ, ಒಡವೆ ಕೊಟ್ಟಿದ್ದಾರೆ. ಹೀಗಿದ್ರೂ ಸುಮ್ಮನಾಗದಕ್ಕೆ ತವರು ಮನೆಯಿಂದ ಬೈಕ್​ ಸಹ ತೆಗೆದುಕೊಂಡು ಬಂದಿದ್ದಾರೆ ಎಂದು ಪತ್ನಿ ರುಕ್ಸಾನ ಬೇಗಂ ಅಳಲು ತೋಡಿಕೊಂಡಿದ್ದಾರೆ.

ಅಕ್ಟೋಬರ್​​​ 26ರಂದು ಭಾರತೀಯ ದಂಡ ಸಂಹಿತೆ (ಐಪಿಸಿ) ಕಾಯ್ದೆಯ ಸೆಕ್ಷನ್ 498 ಎ, ವರದಕ್ಷಿಣೆ ಕಾಯ್ದೆ ಮತ್ತು ತ್ರಿವಳಿ ತಲಾಖ್ ತಡೆ ಕಾಯ್ದೆಯ ವಿವಿಧ ಕಲಂಗಳಡಿ ಪೊಲೀಸರು ಆರೋಪಿ ಮುಸ್ತಾಫಾ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.

ಸರ್ಕಲ್​ ಇನ್ಸ್​​ಪೆಕ್ಟರ್​​ ಕೆ ಚಂದ್ರಶೇಖರ್​​ ಮಾತನಾಡಿದ್ದು, ರುಕ್ಸಾನ್​ ನೀಡಿರುವ ಹೇಳಿಕೆ ಆಧಾರದ ಮೇಲೆ ತಾವು ದೂರು ದಾಖಲಿಸಿದ್ದೇವೆ. ಆರೋಪಿಯ ವಿಚಾರಣೆ ನಡೆಯುತ್ತಿದೆ ಎಂದು ಹೇಳಿದ್ದಾರೆ.