ಹೆಂಡ್ತಿಯ ರುಂಡ ಕತ್ತರಿಸಿ ವ್ಯಕ್ತಿಯ ಮನೆ ಬಾಗಿಲಿಗೆ ಎಸೆದ ಗಂಡ!

ಅನುಮಾನ ಎಂಬ ಭೂತಕ್ಕೆ ಮಹಿಳೆಯೊಬ್ಬಳು ಬರ್ಬರವಾಗಿ ಹತ್ಯೆಯಾಗಿದ್ದಾಳೆ. ಗಂಡನೊಬ್ಬ ತನ್ನ ಹೆಂಡ್ತಿಯನ್ನು ಬರ್ಬರವಾಗಿ ಕೊಂದು ರುಂಡ-ಮುಂಡವನ್ನು ಬೇರ್ಪಡಿಸಿರುವ ಘಟನೆ ತೆಲಂಗಾಣದ ಸಂಗಾರೆಡ್ಡಿ ಜಿಲ್ಲೆಯಲ್ಲಿ ನಡೆದಿದೆ.

ಸಂಗಾರೆಡ್ಡಿ: ಹೆಂಡ್ತಿ ತಲೆಯನ್ನು ಕೊಡಲಿಯಿಂದ ಕಡಿದು ವ್ಯಕ್ತಿಯೊಬ್ಬರ ಮನೆ ಬಾಗಿಲಿಗೆ ಬಿಸಾಡಿರುವ ಘಟನೆ ಇಲ್ಲಿನ ನಾರಾಯಣಖೇಡ್​ ತಾಲೂಕಿನಲ್ಲಿ ಬುಧವಾರ ನಡೆದಿದೆ.

ಅನಂತಸಾಗರ್​ ನಿವಾಸಿ ಜಾರ್ರು ಸಾಯಿಲು ಮತ್ತು ಅನೂಪಮ ದಂಪತಿ ಮಧ್ಯೆ ಕೌಟುಂಬಿಕ ಕಲಹಗಳು ನಡೆಯುತ್ತಲೇ ಇದ್ದವು. ಈ ದಂಪತಿಗೆ ಶ್ರೀಕಾಂತ್​ ಎಂಬ ಮಗನಿದ್ದು, ಆತ ಹೈದರಾಬಾದ್​ನಲ್ಲಿ ವ್ಯಾಸಂಗ ಮಾಡುತ್ತಿದ್ದಾನೆ. ಸಾಯಿಲು ಗ್ರಾಮದಲ್ಲಿ ವ್ಯವಸಾಯ ಮಾಡುತ್ತಲೇ ಬೇಸಿಗೆ ಕಾಲದಲ್ಲಿ ಹೈದರಾಬಾದ್​ನಲ್ಲಿ ಕಬ್ಬಿನ ರಸ ಮಾರುವ ಬಂಡಿ ಇಟ್ಟುಕೊಂಡಿದ್ದಾನೆ. ಹೈದರಾಬಾದ್​ಗೆ ತೆರಳಿದ್ದಾಗ ಹೆಂಡ್ತಿ ಗ್ರಾಮದ ನಿವಾಸಿಯೊಬ್ಬನ ಜೊತೆ ವಿವಾಹೇತರ ಸಂಬಂಧ ಹೊಂದಿದ್ದಾಳೆ ಎಂಬ ಅನುಮಾನ ಸಾಯಿಲುಗೆ ಮೂಡಿದೆ. ಈ ಬಗ್ಗೆ ಇಬ್ಬರ ಮಧ್ಯೆ ಆಗಾಗ ಜಗಳ ನಡೆಯುತ್ತಿತ್ತಂತೆ.

ಕೊಲೆಯಾದ ಮಹಿಳೆ

ಬುಧವಾರ ಮಧ್ಯ ರಾತ್ರಿ ದಂಪತಿ ಮಧ್ಯೆ ಜಗಳವಾಗಿದೆ. ಈ ವೇಳೆ ಸಾಯಿಲು ಕೊಡೊಲಿಯಿಂದ ತನ್ನ ಹೆಂಡ್ತಿಯ ರುಂಡವನ್ನು ಕಡಿದಿದ್ದಾನೆ. ಬಳಿಕ ಆಕೆಯ ರುಂಡವನ್ನು ಮೂರನೇ ವ್ಯಕ್ತಿಯ ಮನೆಯ ಮುಂದೆ ಬಿಸಾಡಿದ್ದಾನೆ. ಬಳಿಕ ಪೊಲೀಸ್​ ಠಾಣೆಗೆ ತೆರಳಿ ಶರಣಾಗಿದ್ದಾನೆ. ಘಟನಾ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಈ ಘಟನೆ ಕುರಿತು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ವಿಚಾರಣೆ ಕೈಗೊಂಡಿದ್ದಾರೆ.