ತಮಿಳುನಾಡಿನ ಕೃಷ್ಣಗಿರಿ ಜಿಲ್ಲೆಗೆ ಪ್ರವೇಶಿಸಿದ ಮಿಡತೆಗಳು: ರಾಜ್ಯದಲ್ಲೂ ಶುರುವಾಯ್ತು ಆತಂಕ

ಮಧ್ಯಪ್ರದೇಶ, ರಾಜ್ಯಸ್ಥಾನದಲ್ಲಿ ಭಾರಿ ಆತಂಕ ಸೃಷ್ಟಿಸಿರುವ ಮಿಡತೆಗಳ ದಂಡು ಇದೀಗ ತಮಿಳುನಾಡಿಗೆ ಎಂಟ್ರಿ ಕೊಟ್ಟಿವೆ. ಕೃಷ್ಟಗಿರಿ ಜಿಲ್ಲೆಯ ನೆರಳಗಿರಿ ಗ್ರಾಮಕ್ಕೆ ನೂರಾರು ಮಿಡತೆಗಳು ಪ್ರವೇಶಿಸಿದ್ದು, ಗ್ರಾಮದ ಸುತ್ತಮುತ್ತ ಇರುವ ಎಕ್ಕದ ಗಿಡಗಳ ಎಲೆಗಳನ್ನು ತಿನ್ನುತ್ತಿವೆ. ಇದರಿಂದ ಸ್ಥಳೀಯ ರೈತರಲ್ಲಿ ಭಯ ಭೀತಿ ಶುರುವಾಗಿದೆ.

ಕೃಷ್ಣಗಿರಿ(ತಮಿಳುನಾಡು):ಶತ್ರು ರಾಷ್ಟ್ರ ಪಾಕಿಸ್ತಾನದಿಂದ ಮಿಡತೆಗಳು ರಾಜಸ್ಥಾನ, ಮಧ್ಯಪ್ರದೇಶಕ್ಕೆ ಪ್ರವೇಶಿಸಿ ಬೆಳೆಗಳಿಗೆ ಹಾನಿ ಮಾಡಿದ್ದವು. ಇದೀಗ ಉತ್ತರಭಾರತದಲ್ಲಿ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಿರುವ ಬೆನ್ನಲ್ಲೇ ನಮ್ಮ ನೆರೆಯ ರಾಜ್ಯ ತಮಿಳುನಾಡಿನ ಮೇಲೆ ಮಿಡತೆಗಳು ದಾಳಿ ಮಾಡಿವೆ.

ಕೃಷ್ಣಗಿರಿ ಜಿಲ್ಲೆ ನೆರಳಗಿರಿ ಗ್ರಾಮದಲ್ಲಿ ನೂರಾರು ಮಿಡತೆಗಳು ಕಂಡುಬಂದಿವೆ. ಗ್ರಾಮದ ಸುತ್ತಮುತ್ತಲಿನ ಎಕ್ಕದ ಗಿಡಗಳ ಎಲೆಗಳನ್ನು ಸಂಪೂರ್ಣವಾಗಿ ತಿಂದುಹಾಕಿವೆ. ಅಲ್ಲದೇ, ಬಾಳೆ ಎಲೆಗಳ ಮೇಲೂ ಕುಳಿತುಕೊಂಡಿವೆ. ಇದರಿಂದ ಸ್ಥಳೀಯರಲ್ಲಿ ಭಯ ಭೀತಿ ಶುರುವಾಗಿದೆ.

ಸುದ್ದಿ ತಿಳಿಸಿದು, ಕೂಡಲೇ ಸ್ಥಳಕ್ಕೆ ಆಗಮಿಸಿದ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಮಿಡತೆಗಳಿಂದ ಬೆಳೆಗಳಿಗೆ ಯಾವುದೇ ಹಾನಿಯಾಗುವುದಿಲ್ಲ. ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.

ರಾಜ್ಯದ ಗಡಿಗೆ ಹೊಂದಿಕೊಂಡಿರುವ ತಮಿಳುನಾಡಿನ ಕೃಷ್ಣಗಿರಿ ಜಿಲ್ಲೆಯಲ್ಲಿ ಮಿಡತೆಗಳು ಕಾಣಿಸಿಕೊಂಡಿರುವುದರಿಂದ ಕೋಲಾರ ಸೇರಿದಂತೆ ಇತರ ಪ್ರದೇಶಕ್ಕೂ ಇವು ಎಂಟ್ರಿ ಕೊಡುವ ಸಾಧ್ಯತೆ ಇದೆ.