ವರ್ಕ್​ ಫ್ರಂ ಹೋಂ; ಹೀಗೆ ಕೆಲಸ ಮಾಡಿದರೆ ಚೆನ್ನ!

ವರ್ಕ್​ ಫ್ರಂ ಹೋಂ ಟ್ರೆಂಡ್​ ಇತ್ತೀಚೆಗೆ ಹೆಚ್ಚಾಗುತ್ತಿದೆ. ಈಗ ಲಾಕ್​ಡೌನ್​ ಆದ ಮೇಲಂತೂ ವರ್ಕ್​ ಫ್ರಂ ಹೋಂ ಎಂಬುದು ಅನಿವಾರ್ಯವಾಗಿದೆ. ಅದರೆ ವರ್ಕ್​ ಫ್ರಂ ಹೋಂ ವಿಧಾನದಲ್ಲಿ ಕೆಲಸ ಮಾಡುವಾಗ ಉಂಟಾಗುವ ಕೆಲ ಸಮಸ್ಯೆಗಳಿಂದ ಕೆಲಸ ಸರಿಯಾಗಿ ಮಾಡಲಾಗುವುದಿಲ್ಲ. ಅಂಥ ಸಮಸ್ಯೆಗಳನ್ನು ಹೇಗೆ ದೂರವಿಡಬಹುದು ಎಂಬುದನ್ನು ಇಲ್ಲಿ ತಿಳಿಸಿದ್ದು, ನೀವೂ ಓದಿಕೊಳ್ಳಿ.

ಕೊರೊನಾ ವೈರಸ್​​ನಿಂದ ಲಾಕ್​ಡೌನ್​ ಘೋಷಣೆಯಾದ ನಂತರ ಐಟಿ-ಬಿಟಿ ಮಾತ್ರವಲ್ಲದೇ ಇನ್ನೂ ಹಲವಾರು ಕ್ಷೇತ್ರಗಳಲ್ಲಿನ ಉದ್ಯೋಗಿಗಳು ವರ್ಕ್​ ಫ್ರಂ ಹೋಂ ಅಂದರೆ ಮನೆಯಿಂದಲೇ ಕಚೇರಿಯ ಕೆಲಸಗಳನ್ನು ನಿಭಾಯಿಸುತ್ತಿದ್ದಾರೆ. ಆದರೆ, ಮನೆಯಲ್ಲಿರುವಾಗ ಆಫೀಸಿನ ಕೆಲಸದ ವಾತಾವರಣ ಇಲ್ಲದಿರುವುದರಿಂದ, ಮನೆಯಲ್ಲಿ ಕೆಲ ಕಾರಣಗಳಿಂದ ಕೆಲಸದ ಮೂಡ್​ ಬಾರದೇ ಇರುವುದರಿಂದ ಕೆಲಸದ ವೇಗಕ್ಕೆ ತಡೆಯಾಗುವಂತಾಗುತ್ತದೆ. ಹಾಗಾದರೆ ಯಾವೆಲ್ಲ ಕ್ರಮಗಳನ್ನು ಅನುಸರಿಸುವ ಮೂಲಕ ವರ್ಕ್​ ಫ್ರಂ ಹೋಂ ಉದ್ಯೋಗಿಗಳು ತಮ್ಮ ಕಾರ್ಯತತ್ಪರತೆಯನ್ನು ಹೆಚ್ಚಿಸಿಕೊಳ್ಳಬಹುದು ಎಂಬ ಬಗ್ಗೆ ಇಲ್ಲಿವೆ ಮಹತ್ವದ ಟಿಪ್ಸ್​... ನೀವೂ ಓದಿ... ಇತರರಿಗೂ ತಿಳಿಸಿ...

ಜಗತ್ತಿನ ಪ್ರಖ್ಯಾತ ನೀತಿ ಮತ್ತು ನಿರ್ವಹಣಾ ಸಂಸ್ಥೆ ಬೈನ್ ಆ್ಯಂಡ್​ ಕಂಪನಿ ವರ್ಕ್​ ಫ್ರಂ ಹೋಂ ಉದ್ಯೋಗಿಗಳಿಗಾಗಿ ಅಮೂಲ್ಯ ಟಿಪ್ಸ್​ಗಳನ್ನು ನೀಡಿದ್ದು, ಅವು ಹೀಗಿವೆ:

- ಪ್ರತಿದಿನ ಕಚೇರಿಯ ವೇಳಾಪಟ್ಟಿಯನ್ನು ಪಾಲನೆ ಮಾಡಿ

- ನಿತ್ಯದಂತೆ ಅದೇ ಸಮಯಕ್ಕೆ ಬೆಳಗ್ಗೆ ಎದ್ದೇಳಿ

- ಸ್ನಾನ ಮಾಡಿ, ಡ್ರೆಸ್ ಮಾಡಿಕೊಂಡು ರೆಡಿಯಾಗಿ

- ತಿಂಡಿ ತಿಂದು ಪ್ರತಿದಿನ ಕಚೇರಿಯಲ್ಲಿ ಕೆಲಸ ಆರಂಭಿಸುತ್ತಿದ್ದ ಸಮಯದಲ್ಲಿಯೇ ಕೆಲಸ ಪ್ರಾರಂಭಿಸಿ

- ನಿಮ್ಮ ವೈಯಕ್ತಿಕ ಜೀವನದ ವಿಷಯಗಳು ನಿಮ್ಮ ಕೆಲಸದ ಕೋಣೆಯೊಳಗೆ ಬರದಂತೆ ಜಾಗ್ರತೆ ವಹಿಸಿ

- ವೈಯಕ್ತಿಕ ಸಂದೇಶಗಳ ಕಡೆಗೆ ಗಮನಹರಿಸುವುದಾದಲ್ಲಿ ಅದನ್ನು ಪ್ರತ್ಯೇಕ ವೈಯಕ್ತಿಕ ಸ್ಥಳದಲ್ಲೇ ಮಾಡಿ

- ಇನ್ನು ನಿಗದಿತ ವಿರಾಮಗಳನ್ನು ತೆಗೆದುಕೊಳ್ಳುವುದರಿಂದ ಪರಿಣಾಮಕಾರಿಯಾಗಿ ಕೆಲಸ ಮಾಡಬಹುದು

ವಿರಾಮ ಪಡೆದುಕೊಳ್ಳಿ: ನಿಮ್ಮ ಕೆಲಸವನ್ನು ನೀವು ಮೊದಲು ಮೆಚ್ಚಿಕೊಳ್ಳಿ. ಹಾಗೆಯೇ ಕೆಲಸದ ಮಧ್ಯೆ ವಿರಾಮ ಪಡೆಯಲು ಮರೆಯಬೇಡಿ. ವಿರಾಮದಿಂದ ಮತ್ತೆ ಕೆಲಸ ಮಾಡಲು ಹುರುಪು ಮೂಡುತ್ತದೆ. (ಸೋಶಿಯಲ್​ ಮೀಡಿಯಾ ನೋಡಲು 5 ನಿಮಿಷ ಅಥವಾ ಊಟಕ್ಕಾಗಿ 45 ನಿಮಿಷ)."

ಮನೆ ಕೆಲಸ ಬೇಡ: ಕಚೇರಿಯ ಕೆಲಸದಲ್ಲಿ ತೊಡಗಿಸಿಕೊಂಡಿರುವ ಸಮಯದಲ್ಲಿ ಮನೆವಾರ್ತೆಯ ಬಗ್ಗೆ ಗಮನಹರಿಸುವುದು ಸಲ್ಲದು.

ವೇಳಾಪಟ್ಟಿ ಇರಲಿ:ದಿನದಲ್ಲಿ ಮಾಡಬೇಕಾದ ಕಚೇರಿಯ ಮುಖ್ಯ ಕೆಲಸಗಳ ಪಟ್ಟಿ ಮಾಡಿಟ್ಟುಕೊಳ್ಳಿ. ಈ ದಿನ, ವಾರ ಅಥವಾ ತಿಂಗಳಲ್ಲಿ ಮುಗಿಸಬೇಕಾದ ಕೆಲಸಗಳೇನಾದರೂ ಇದ್ದಲ್ಲಿ ಅವನ್ನು ಗುರುತಿಸಿಟ್ಟುಕೊಳ್ಳಿ. ಅವನ್ನು ಯಾವಾಗ ಮಾಡಬೇಕೆಂಬುದನ್ನೂ ನಿರ್ಧರಿಸಿ.

ಕೆಲಸದ ಕೋಣೆಗೆ ಸೀಮಿತವಾಗಿರಲಿ:ಮನೆಯಲ್ಲಿ ಎಲ್ಲಿ ಬೇಕಾದಲ್ಲಿ ಕುಳಿತು ಕೆಲಸ ಮಾಡುವುದು ಬೇಡ. ಕೆಲಸಕ್ಕಾಗಿ ಪ್ರತ್ಯೇಕ ಕೋಣೆಯೊಂದನ್ನು ಗುರುತಿಸಿಕೊಳ್ಳಿ. ಕೆಲಸ ಮಾಡುವ ಜಾಗದಲ್ಲೇ ಊಟ ಮಾಡುವುದು ಸರಿಯಲ್ಲ.

ಜೊತೆಯಾಗಿ ಕೆಲಸ ಮಾಡುತ್ತಿದ್ದರೆ ಹೀಗೆ ಮಾಡಿ: ಒಂದು ವೇಳೆ ಇಬ್ಬರು ಸೇರಿ ಒಂದೇ ಕಂಪ್ಯೂಟರ್ ಬಳಸಿ ಕೆಲಸ ಮಾಡುತ್ತಿದ್ದರೆ ಯಾರು ಯಾವಾಗ, ಎಷ್ಟೊತ್ತು ಕಂಪ್ಯೂಟರ್​ ಬಳಸಬೇಕೆಂಬುದನ್ನು ಮೊದಲೇ ನಿರ್ಧರಿಸಿ. ಒಬ್ಬರು ಕರೆ ಮಾಡುತ್ತಿರಬೇಕಾದರೆ ಗಮನ ಬೇರೆಡೆ ಇನ್ನೊಬ್ಬರಿಗೆ ತೊಂದರೆಯಾಗದಂತೆ ಜಾಗೃತಿ ವಹಿಸಿ.

ಕನೆಕ್ಟಿವಿಟಿ ಸರಿಯಾಗಿರಲಿ: ಕೆಲಸಕ್ಕೆ ಬೇಕಾದ ಮೂಲ ಸಲಕರಣೆಗಳು ಹಾಗೂ ವೇಗದ ಸುಸ್ಥಿರ ಇಂಟರನೆಟ್​ ಕನೆಕ್ಷನ್​ ಇರುವಂತೆ ನೋಡಿಕೊಳ್ಳಿ.