136 ಕೋಟಿಯಷ್ಟು ಬೃಹತ್ ಜನಸಂಖ್ಯೆ ಹೊಂದಿರುವ ಭಾರತದಲ್ಲಿ ಈವರೆಗೆ ಕೇವಲ 1,50,000 ಕೊರೊನಾ ಪತ್ತೆ ಟೆಸ್ಟ್ಗಳನ್ನು ಮಾಡಲಾಗಿದೆ. ಸರ್ಕಾರದಿಂದ ಗುರುತಿಸಲಾದ 51 ಲ್ಯಾಬ್ಗಳಲ್ಲಿ ಈ ಟೆಸ್ಟ್ಗಳನ್ನು ಕೈಗೊಳ್ಳಲಾಗುತ್ತಿದೆ. ಪ್ರಸ್ತುತ ಪ್ರತಿದಿನ ಒಟ್ಟಾರೆ 10,000 ಟೆಸ್ಟ್ಗಳು ನಡೆಯುತ್ತಿವೆ.
ಕೊರೊನಾ ಶಂಕಿತರನ್ನು ತಕ್ಷಣ ಗುರುತಿಸಿ ಪ್ರತ್ಯೇಕಿಸಿ ಚಿಕಿತ್ಸೆ ನೀಡುವುದನ್ನು ಯುದ್ಧೋಪಾದಿಯಲ್ಲಿ ಮಾಡಬೇಕಿದೆ ಎನ್ನುತ್ತಾರೆ ವೈದ್ಯಕೀಯ ರಂಗದ ಪರಿಣಿತರು. ಆದರೆ, ಅಭಿವೃದ್ಧಿ ಹೊಂದಿದ ಇತರ ರಾಷ್ಟ್ರಗಳಿಗೆ ಹೋಲಿಸಿದರೆ ಭಾರತದಲ್ಲಿ ಕೈಗೊಳ್ಳಲಾಗುತ್ತಿರುವ ಟೆಸ್ಟ್ಗಳ ಸಂಖ್ಯೆ ತೀರಾ ವಿರಳ. ಕೊರೊನಾ ಪತ್ತೆ ಪರೀಕ್ಷೆಗಳನ್ನು ಗಣನೀಯವಾಗಿ ಹೆಚ್ಚಿಸದಿದ್ದಲ್ಲಿ ಸೋಂಕಿತರ ನಿಖರ ಅಂಕಿ-ಅಂಶಗಳನ್ನು ಹೊಂದಲು ಸಾಧ್ಯವಾಗದು. ಕೊರೊನಾ ಸೋಂಕಿನ ಅತ್ಯಂತ ಕಡಿಮೆ ಲಕ್ಷಣ ತೋರುವ ಪ್ರಕರಣಗಳನ್ನು ಸಹ ಗಂಭೀರವಾಗಿ ಪರಿಗಣಿಸಬೇಕಿದೆ ಎನ್ನುತ್ತಾರೆ ವೈದ್ಯಕೀಯ ತಜ್ಞರು.
ಜಗತ್ತಿನಾದ್ಯಂತ ಕೊರೊನಾ ಪತ್ತೆ ಪರೀಕ್ಷೆಗಳು ಕಡಿಮೆಯಾಗಿರುವುದಕ್ಕೆ ಕೊರೊನಾ ಟೆಸ್ಟಿಂಗ್ ಕಿಟ್ಗಳ ಕೊರತೆಯೂ ಪ್ರಮುಖ ಕಾರಣ. ಪರೀಕ್ಷೆಗಳಿಗೆ ಅನುಮತಿ ನೀಡುವಲ್ಲಿ ವಿಳಂಬ ಹಾಗೂ ಅಂತಾರಾಷ್ಟ್ರೀಯ ವಿಮಾನಯಾನ ಸ್ಥಗಿತಗೊಂಡು ಅಗತ್ಯ ಸಲಕರಣೆಗಳ ಪೂರೈಕೆಯಾಗದಿರುವುದರಿಂದ ಸಮಸ್ಯೆಗಳು ಸೃಷ್ಟಿಯಾಗುತ್ತಿವೆ. ಯುಎಸ್ಎಫ್ಡಿಎ ಹಾಗೂ ಸಿಇ-ಯುರೋಪ್ ಪ್ರಮಾಣೀಕೃತ ಟೆಸ್ಟಿಂಗ್ ಕಿಟ್ಗಳನ್ನು ಮಾತ್ರ ಬಳಸುವಂತೆ ನಿರ್ದೇಶನ ನೀಡಿರುವುದರಿಂದ ಸ್ಥಳೀಯ ಟೆಸ್ಟಿಂಗ್ ಕಿಟ್ ಉತ್ಪಾದಕರಿಗೆ ಬೆಲೆ ಇಲ್ಲದಂತಾಗಿದೆ.
ಈ ಎಲ್ಲ ಕಾರಣಗಳಿಂದ ಕೊರೊನಾ ಪತ್ತೆ ಪರೀಕ್ಷೆಗಳಿಗೆ ಅಡ್ಡಿಯುಂಟಾಗುತ್ತಿರುವುದನ್ನು ಪರಿಗಣಿಸಿದ ಸರ್ಕಾರ, ಪುಣೆಯ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿಯಿಂದ ಪ್ರಮಾಣೀಕೃತ ಕಿಟ್ಗಳನ್ನು ಬಳಸಲು ಅನುಮತಿ ನೀಡಿದೆ. ಒಂದು ಟೆಸ್ಟ್ನ ಫಲಿತಾಂಶ ಬರಲು ಪ್ರಸ್ತುತ 6 ರಿಂದ 7 ತಾಸು ಹಿಡಿಯುತ್ತಿದೆ. ಆಧುನಿಕ ಟೆಸ್ಟಿಂಗ್ ಕಿಟ್ಗಳನ್ನು ಬಳಸಿದಲ್ಲಿ ಎರಡೂವರೆ ತಾಸುಗಳಲ್ಲಿ ಫಲಿತಾಂಶ ಪಡೆಯಬಹುದು. ಇನ್ನೂ 14 ಮಾದರಿಯ ಟೆಸ್ಟಿಂಗ್ ಕಿಟ್ ಮಾಡೆಲ್ಗಳು ಸರ್ಕಾರದ ಅನುಮತಿಗಾಗಿ ಕಾಯುತ್ತಿವೆ.
