ಪ್ರಧಾನಿ ಭಾಷಣ ಕೇವಲ 'ಹೆಡ್​ಲೈನ್​ಗೆ' ಮಾತ್ರ ಸೀಮಿತ : ಕಾಂಗ್ರೆಸ್ ನಾಯಕರ​ ಟ್ವೀಟ್​

ದೇಶವನ್ನುದ್ದೇಶಿಸಿ ಮಂಗಳವಾರ ರಾತ್ರಿ ಪ್ರಧಾನಿ ನರೇಂದ್ರ ಮೋದಿ ಮಾಡಿರುವ ಭಾಷಣದ ಬಗ್ಗೆ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್​ ನಾಯಕರು, ಪ್ರಧಾನಿ ಭಾಷಣ ಕೇವಲ ಮಾಧ್ಯಮಗಳ ಹೆಡ್​ಲೈನ್​ಗೆ ಮಾತ್ರ ಸೀಮಿತ ಎಂದಿದ್ದಾರೆ.

ನವದೆಹಲಿ : ಪ್ರಧಾನಿ ನರೇಂದ್ರ ಮೋದಿಯವರು ರಾಷ್ಟ್ರವನ್ನುದ್ದೇಶಿಸಿ ಮಾಡಿದ ಭಾಷಣ ಕೇವಲ ಮಾಧ್ಯಮಗಳ ಹೆಡ್​ಲೈನ್​ಗೆ ಮಾತ್ರ ಸೀಮಿತ, ಈ ಬಗ್ಗೆ ರಾಷ್ಟ್ರ ಮತ್ತು ಪಕ್ಷ ಪ್ರತಿಕ್ರಿಯಿಸಲಿದೆ ಎಂದು ಕಾಂಗ್ರೆಸ್​ ಹೇಳಿದೆ.

ಈ ಕುರಿತು ಟ್ವೀಟ್​ ಮಾಡಿರುವ ಕಾಂಗ್ರೆಸ್​ ವಕ್ತಾರ ರಣದೀಪ್ ಸಿಂಗ್ ಸುರ್ಜೇವಾಲ, ಆತ್ಮಿಯ ಪ್ರಧಾನಿಗಳೇ ನೀವು ಇಂದು ದೇಶವನ್ನುದ್ದೇಶಿ ಹೇಳಿದ್ದು ಕೇವಲ ಮಾಧ್ಯಮಗಳ ಹೆಡ್​​ಲೈನ್​ ಮಾತ್ರ ನೀಡುತ್ತದೆ. ಖಾಲಿ ಪುಟವನ್ನು ಜನರ ಹೃತ್ಪೂರ್ವಕ ಸಹಾಯದಿಂದ ತುಂಬಿದ್ದೀರ, ಇದಕ್ಕೆ ಇಡೀ ರಾಷ್ಟ್ರ ಮತ್ತು ಕಾಂಗ್ರೆಸ್​ ಪ್ರತಿಕ್ರಿಯಿಸಲಿದೆ ಎಂದಿದ್ದಾರೆ.

ಮತ್ತೊಂದು ಟ್ವೀಟ್​ ಮಾಡಿರುವ ಸುರ್ಜೇವಾಲ, ವಲಸೆ ಕಾರ್ಮಿಕರು ನಡೆದುಕೊಂಡು ಮನೆ ಸೇರುತ್ತಿರುವುದು ಮಹಾ ದುರಂತ. ಈ ಸಂದರ್ಭದಲ್ಲಿ ಸಹಾನುಭೂತಿ, ಕಾಳಜಿ ಮತ್ತು ಅವರ ಸುರಕ್ಷಿತ ಮರಳುವಿಕೆ ಅಗತ್ಯವಾಗಿದೆ. ಆದರೆ, ನಿಮ್ಮ ಪರಾನುಭೂತಿ ಸೂಕ್ಷ್ಮತೆಯ ಕೊರತೆಯಿಂದ ಕಾರ್ಮಿಕರನ್ನು ಸರಿಯಾಗಿ ನೋಡಿಕೊಳ್ಳಲು ಆಗದಿರುವುದು ಭಾರತವನ್ನು ನಿರಾಶೆಗೊಳಿಸಿದೆ ಎಂದು ಹೇಳಿದ್ದಾರೆ.

ಇನ್ನು ಈ ಬಗ್ಗೆ ಟ್ವೀಟ್​ ಮಾಡಿರುವ ಕಾಂಗ್ರೆಸ್ ಸಂಸದ ಮನೀಶ್ ತಿವಾರಿ, ಪ್ರಧಾನಿ ಮೋದಿಯವರ ಭಾಷಣವನ್ನು ಒಂದೇ ಪದದಲ್ಲಿ ವಿವರಿಸುವುದಾದರೆ ಹೆಡ್ಲೈನ್ ​​ಹಂಟಿಂಗ್ ಎನ್ನಬಹುದು, ಪ್ರಧಾನಿ ಘೋಷಿಸಿರುವ 20 ಲಕ್ಷ ಕೋಟಿಯ ವಿವರವಿಲ್ಲ ಎಂದು ಬರೆದುಕೊಂಡಿದ್ದಾರೆ.

ಮಂಗಳವಾರ ರಾತ್ರಿ ದೇಶವನ್ಜುದ್ದೇಶಿಸಿ ಭಾಷಣ ಮಾಡಿದ ಪ್ರಧಾನಿ ಮೋದಿ, 20 ಲಕ್ಷ ಕೋಟಿಗಳ ವಿಶೇಷ ಪ್ಯಾಕೇಜ್ ಘೋಷಣೆ ಮಾಡಿದ್ದು, ಇದು ದೇಶದ ಒಟ್ಟು ಜಿಡಿಪಿಯ ಶೇ.10ರಷ್ಟು ಆಗಲಿದೆ.