ಟಿಕೆಟ್‌ ಕೇಳಿದ ಕಂಡಕ್ಟರ್‌ಗೆ ಪೊಲೀಸರು ಹೀಗೆ ಹೊಡೆಯೋದಾ.. ವಿಡಿಯೋ ವೈರಲ್‌

ತಮಿಳುನಾಡಿನ ತಿರುನೆಲ್ವೇಲಿ-ನಾಗರ್‌ಕೋಯಿಲ್ ರಸ್ತೆ ಮಧ್ಯೆ ಸಂಚರಿಸುವ ಸರ್ಕಾರಿ ಬಸ್​ ಹತ್ತಿದ ಪೊಲೀಸರ ಬಳಿ, ಟಿಕೆಟ್ ನೀಡುವಂತೆ ಬಸ್​ ಕಂಡಕ್ಟರ್​ ಕೇಳಿದ್ದಕ್ಕೆ ಇಬ್ಬರು ಪೊಲೀಸರು ಹಲ್ಲೆ ನಡೆಸಿರುವ ಘಟನೆ ನಡೆದಿದೆ. ಹಲ್ಲೆ ನಡೆಸಿದ ಪೊಲೀಸರ ವಿರುದ್ಧ ಕಂಡಕ್ಟರ್​ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಬಳಿಕ ಇಬ್ಬರು ಪೊಲೀಸರನ್ನು ಬಂಧಿಸಿದ್ದಾರೆ.

ತಿರುನೆಲ್ವೇಲಿ(ತಮಿಳುನಾಡು):ಬಸ್‌ ಟಿಕೆಟ್​ ಹಣ ನೀಡುವಂತೆ ಕೇಳಿದ ಸಾರಿಗೆ ಸಂಸ್ಥೆ ಬಸ್​ ಕಂಡಕ್ಟರ್​ ಮೇಲೆ ಇಬ್ಬರು ಕರ್ತವ್ಯನಿರತ ಪೊಲೀಸರು ಹಲ್ಲೆ ನಡೆಸಿರುವ ಪ್ರಕರಣ ತಮಿಳುನಾಡಿನ ತಿರುನೆಲ್ವೇಲಿಯಲ್ಲಿ ನಡೆದಿದೆ.

ತಿರುನೆಲ್ವೇಲಿ-ನಾಗರ್‌ಕೋಯಿಲ್ ರಸ್ತೆ ಮಧ್ಯೆ ಸಂಚರಿಸುವ ಸಾರಿಗೆ ಬಸ್​ಗೆ ಇಬ್ಬರು ಕರ್ತವ್ಯನಿರತ ಪೊಲೀಸರು ಹತ್ತಿದ್ದಾರೆ. ಬಸ್​ ಹತ್ತಿದ ಮೇಲೆ ಪ್ರತಿಯೊಬ್ಬ ವ್ಯಕ್ತಿಯೂ ಪ್ರಯಾಣಿಕ ಅಷ್ಟೇ.. ಅಂತೆಯೇ ಕಂಡಕ್ಟರ್​ ತನ್ನ ಕರ್ತವ್ಯದ ಭಾಗವಾಗಿ ಇಬ್ಬರು ಪೊಲೀಸರ ಬಳಿ ಟಿಕೆಟ್​ ಹಣ ಕೇಳಿದ್ದಾನೆ. ಆ ವೇಳೆ ಪ್ರತಿಕ್ರಿಯೆ ನೀಡದ ಪೊಲೀಸರ ಬಳಿ ಮತ್ತೆ ನೆನಪಿಸಿ ಟಿಕೆಟ್​ ಹಣ ಕೇಳಿದ್ದಾನೆ. ಬಳಿಕ ಬಸ್​ನಲ್ಲಿದ್ದ ಇತರ ಪ್ರಯಾಣಿಕರಲ್ಲೂ ನಿರ್ವಾಹಕ ಹಣ ಕೇಳಿಸಿದ್ದಾನೆ.

ಇಷ್ಟಾದರೂ ಟಿಕೆಟ್​ ನೀಡದ ಪೊಲೀಸರ ಬಳಿ ಮತ್ತೆ ನಿರ್ವಾಹಕ ಟಿಕೆಟ್​ ನೀಡುವಂತೆ ಕೇಳಿದ್ದಾನೆ. ಈ ವೇಳೆ ದಿಢೀರ್​ ಕೋಪಗೊಂಡ ಪೊಲೀಸರು, ಕಂಡಕ್ಟರ್​ ಮೇಲೆ ಹಲ್ಲೆ ನಡೆಸಿದ್ದಾರೆ. ಈ ನಡುವೆ ನಿರ್ವಾಹಕ ರಮೇಶ್​ ಮುಖದಲ್ಲಿ ಗಾಯವಾಗಿ ರಕ್ತ ಸುರಿಯಲಾರಂಭಿಸಿದೆ.

ಈ ಬಗ್ಗೆ ನಿರ್ವಾಹಕ, ಇಬ್ಬರು ಪೊಲೀಸರ ವಿರುದ್ಧ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಬಳಿಕ ಇಬ್ಬರು ಪೊಲೀಸರನ್ನು ಬಂಧಿಸಲಾಗಿದ್ದು, ಸದ್ಯ ಇವರಿಬ್ಬರೂ ಜಾಮೀನಿನ ಮೇಲೆ ಹೊರಬಂದಿದ್ದಾರೆ. ಇನ್ನೊಂದೆಡೆ ಹಲ್ಲೆಗೊಳಗಾದ ರಮೇಶ್​ ತಿರುನೆಲ್ವೇಲಿ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.