ಗೂಗಲ್ ಪೇ ನ 'ನಿಯರ್​ ಬೈ ಸ್ಪಾಟ್' ಈಗ 35 ನಗರಗಳಲ್ಲಿ ಲಭ್ಯ

ನಿಯರ್​ ಬೈ ಸ್ಪಾಟ್ ವೈಶಿಷ್ಟ್ಯದಿಂದ ಯಾವ ಅಂಗಡಿಗಳು ತೆರೆದಿವೆ, ಎಲ್ಲಿ ಅಗತ್ಯ ವಸ್ತುಗಳು ಲಭ್ಯವಾಗುತ್ತವೆ ಎಂಬ ಬಗ್ಗೆ ತಮ್ಮ ಸುತ್ತಮುತ್ತಲ ಪ್ರದೇಶಗಳಲ್ಲಿನ ಅಂಗಡಿಗಳ ಬಗ್ಗೆ ಬಳಕೆದಾರರು ಮಾಹಿತಿ ತಿಳಿದು ಕೊಳ್ಳಬಹುದಾಗಿದೆ.

ನವದೆಹಲಿ: ಬ್ಯಾಂಕಿಂಗ್​ ಆ್ಯಪ್​ಗಳು ಗ್ರಾಹಕರನ್ನು ಮತ್ತಷ್ಟು ಹತ್ತಿರವಾಗಿಸಿಕೊಳ್ಳಲು ನೂತನ ವೈಶಿಷ್ಟ್ಯಗಳನ್ನು ಆಗಾಗ ಬಿಡುಗಡೆ ಮಾಡುತ್ತಲೇ ಇವೆ. ಇದೇ ಬೆನ್ನಲ್ಲೇ ಗೂಗಲ್​ ಪೇ ತನ್ನ ಬಳಕೆದಾರರಿಗೆ ಇನ್ನಷ್ಟು ಸುಲಭವಾಗಿದೆ. ನಿಯರ್​ ಬೈ ಸ್ಪಾಟ್ ​ ವೈಶಿಷ್ಟ್ಯವನ್ನು ಅಭಿವೃದ್ಧಿಪಡಿಸಲಾಗಿದ್ದು, ಈ ಸೇವೆ ಈಗ ದೇಶದ 35 ನಗರಗಳಲ್ಲಿ ಲಭ್ಯವಿದೆ ಎಂದು ಸಂಸ್ಥೆ ತಿಳಿಸಿದೆ.

ಕಳೆದ ತಿಂಗಳು ಗೂಗಲ್ ಪೇ ನಿಯರ್​ ಬೈ ಸ್ಪಾಟ್ ಅನ್ನು ಪ್ರಾರಂಭಿಸಿದೆ. ಈ ವೈಶಿಷ್ಟ್ಯದಿಂದ ಯಾವ ಅಂಗಡಿಗಳು ತೆರೆದಿವೆ. ಎಲ್ಲಿ ಅಗತ್ಯ ವಸ್ತುಗಳು ಲಭ್ಯವಾಗುತ್ತವೆ ಎಂಬ ಬಗ್ಗೆ ತಮ್ಮ ಸುತ್ತಮುತ್ತಲ ಪ್ರದೇಶಗಳಲ್ಲಿನ ಅಂಗಡಿಗಳ ಬಗ್ಗೆ ಬಳಕೆದಾರರು ಮಾಹಿತಿ ತಿಳಿದುಕೊಳ್ಳಬಹುದು. ಈ ನಿಯಮದಿಂದ ಸಾಮಾಜಿಕ ಅಂತರದ ವ್ಯವಸ್ಥೆಯನ್ನೂ ಕಾಪಾಡಿಕೊಳ್ಳಬಹುದಾಗಿದೆ.

ಇದಲ್ಲದೇ, ದೇಶಾದ್ಯಂತ ಬಳಕೆದಾರರು ತಮ್ಮ ಅಡುಗೆ ಸಿಲಿಂಡರ್‌ಗಳಾದ ಎಚ್‌ಪಿ ಗ್ಯಾಸ್, ಭಾರತ್ ಪೆಟ್ರೋಲಿಯಂ, ಇಂಡಿಯನ್​​​​​​​​​​ ಗ್ಯಾಸ್​ಗೆ ಡಿಜಿಟಲ್ ರೂಪದಲ್ಲಿ ಪಾವತಿಸಬಹುದು. ಈ ಮೂರು ಸೇವಾ ಸಂಸ್ಥೆಗಳು ಗೂಗಲ್​ ಪೇ ನ ಎಲ್ಲ ಬಳಕೆದಾರರಿಗೆ ಮುಕ್ತವಾಗಿದ್ದಾರೆ ಎಂದು ಕಂಪನಿ ಹೇಳಿದೆ.

ಇಷ್ಟೆ ಅಲ್ಲದೇ, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದಿಂದ ಅಧಿಕೃತ ಸುರಕ್ಷತಾ ಮಾರ್ಗಸೂಚಿಗಳನ್ನು ಒದಗಿಸುವ ಕೊರೊನಾ ವೈರಸ್​ ಸ್ಪಾಟ್ ಅನ್ನು ಸಹ ಪ್ರಾರಂಭಿಸಿದೆ. ಪರಿಹಾರ ಕಾರ್ಯಗಳನ್ನು ಬೆಂಬಲಿಸಲು ದೇಣಿಗೆ ಸ್ವೀಕರಿಸುವ ವಿವಿಧ ದತ್ತಿಗಳಿಗೆ ಸಂಪರ್ಕ ಕಲ್ಪಿಸುವ ಕೆಲಸ ಮಾಡುತ್ತಿದೆ. ಇದರಿಂದ ಜನರು ನೇರವಾಗಿ ದೇಣಿಗೆ ನೀಡಬಹುದಾಗಿದೆ.