ನವದೆಹಲಿ:ಯಾವುದೇ ವಿಷಯ ಮಾಹಿತಿ ಬೇಕಿದ್ದರೂ ನಮಗೆ ಥಟ್ ಅಂತ ನೆನಪಾಗೋದು 'ಗೂಗಲ್'! ನಾವು, ನೀವು ಅಪೇಕ್ಷಿಸುವ ಯಾವುದೇ ಮಾಹಿತಿಯನ್ನಾದರೂ ನಿಮಿಷದೊಳಗಾಗಿ ನೀಡುವ ಗೂಗಲ್ಗೆ ಇಂದು ಹುಟ್ಟುಹಬ್ಬದ ಸಂಭ್ರಮ.
1998ರ ಸೆಪ್ಟೆಂಬರ್ 27ರಂದು ಜನಿಸಿದ ಗೂಗಲ್ ನೋಡ ನೋಡ್ತಿದ್ದಂತೆ ಸರ್ಚ್ ಇಂಜಿನ್ ದೈತ್ಯನಾಗಿ ಬೆಳೆದಿದೆ. ಇಂದು 21ನೇ ಬರ್ತ್ಡೇ ಹಿನ್ನೆಲೆಯಲ್ಲಿ ವಿಶೇಷ ಡೂಡಲ್ ವಿನ್ಯಾಸ ಮಾಡಲಾಗಿದೆ.
ಗೂಗಲ್ ಹೆಸರು ಹುಟ್ಟಿದ್ದು ಹೀಗೆ..!
ಗೂಗುಲ್(googol) ಎನ್ನುವ ಹೆಸರಿನ ಮಾರ್ಪಾಡು ರೂಪವಿದು. ಒಂದು ಅಂಕಿಯ ಮುಂದೆ ನೂರು ಸೊನ್ನೆ ಬರೆದರೆ ಅದನ್ನು ಗೂಗುಲ್ ಎನ್ನುತ್ತಾರೆ. ಗೂಗಲ್ನ ಮೊದಲ ಡೂಡಲ್ ರಚಿಸಿದ್ದು ಸಂಸ್ಥಾಪಕರಾದ ಸರ್ಗಿ ಬ್ರಿನ್ ಹಾಗೂ ಲ್ಯಾರಿ ಪೇಜ್ . 1998ರಲ್ಲಿ ಬರ್ನಿಂಗ್ ಮ್ಯಾನ್ ಫೆಸ್ಟಿವಲ್ಗೆ ಮೊದಲ ಡೂಡಲ್ ಅರ್ಪಿಸಲಾಗಿತ್ತು.
ಪ್ರಸ್ತುತ ಅಮೆರಿಕಾದ ಕ್ಯಾಲಿಫೋರ್ನಿಯಾ ನಗರದ ಮೌಂಟೇನ್ ವ್ಯೂ ಪ್ರದೇಶದಲ್ಲಿ ಸಂಸ್ಥೆ ತನ್ನ ಕೇಂದ್ರ ಕಚೇರಿ ಹೊಂದಿದೆ. 50 ದೇಶಗಳಲ್ಲಿ ಒಟ್ಟಾರೆ 78 ಕಚೇರಿಗಳನ್ನು ಗೂಗಲ್ ಹೊಂದಿದ್ದು, ಭಾರತೀಯ ಮೂಲದವರೇ ಆಗಿರುವ ಸುಂದರ್ ಪಿಚೈ ಸದ್ಯ ಗೂಗಲ್ ಸಿಇಒ ಆಗಿದ್ದಾರೆ.
