ಮಾರಾಟಕ್ಕೂ ಮೊದಲು ಬಾಳೆಹಣ್ಣು ನೆಕ್ಕುತ್ತಿದ್ದ ವ್ಯಾಪಾರಿಯ ಬಂಧನ

ಮಾರುವುದಕ್ಕೆ ಮೊದಲು ಬಾಳೆಹಣ್ಣುಗಳನ್ನು ನೆಕ್ಕುತ್ತಿದ್ದ ಹಣ್ಣಿನ ವ್ಯಾಪಾರಿಯೊಬ್ಬನನ್ನು ಉತ್ತರಪ್ರದೇಶ ಪೊಲೀಸರು ಬಂಧಿಸಿ, ಕೊರೊನಾ ಸೋಂಕು ಪತ್ತೆಗಾಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಮಥುರಾ(ಉತ್ತರಪ್ರದೇಶ):ಬಾಳೆ ಹಣ್ಣುಗಳನ್ನು ಮಾರೋದಕ್ಕೂ ಮೊದಲು ಅವುಗಳನ್ನು ನೆಕ್ಕುತ್ತಿದ್ದ 25 ವರ್ಷದ ಹಣ್ಣುಗಳ ವ್ಯಾಪಾರಿಯನ್ನು ಉತ್ತರ ಪ್ರದೇಶದ ಪೊಲೀಸರು ಬಂಧಿಸಿದ್ದಾರೆ.

ಆರೋಪಿಯನ್ನು ಬಂಟಿ ಎಂದು ಗುರ್ತಿಸಲಾಗಿದೆ. ಬಾಳೆಹಣ್ಣುಗಳನ್ನು ಮಾರೋದಕ್ಕೆ ಮೊದಲು ಈತ ನೆಕ್ಕುತ್ತಿದ್ದ. ಈ ಗಂಭೀರ ಆರೋಪದ ಮೇಲೆ ಈತನನ್ನು ಹಿಡಿದ ಸ್ಥಳೀಯರು ಥಳಿಸಿದ್ದಾರೆ. ಈ ವೇಳೆ ಪರಾರಿಯಾಗಲು ಯತ್ನಿಸಿದ ಆತನನ್ನು ಪೊಲೀಸರ ವಶಕ್ಕೊಪಿಸಿದರು.

ಈ ಕುರಿತು ಪ್ರತಿಕ್ರಿಯಿಸಿರುವ ನಗರ ಪೊಲೀಸ್​ ಆಯುಕ್ತ ಅಶೋಕ್​ ಕೆ. ಮೀನಾ, ಆರೋಪಿಯನ್ನು ವೃಂದಾವನದ ಆಸ್ಪತ್ರೆಯೊಂದಕ್ಕೆ ಕೊರೊನಾ ಸೋಂಕಿನ ಪರೀಕ್ಷೆಗೆ ಕಳಿಸಲಾಗಿದ್ದು, ವರದಿ ಬರುವ ತನಕ ಕ್ವಾರಂಟೈನ್​ನಲ್ಲಿ ಇಡಲಾಗುತ್ತದೆ ಎಂದು ಸ್ಪಷ್ಟನೆ ನೀಡಿದ್ದಾರೆ. ಜೊತೆಗೆ ವಿಡಿಯೋ ಲಭ್ಯವಿದ್ದು ಕಾನೂನಾತ್ಮಕ ಕ್ರಮ ಕೈಗೊಳ್ಳೋದಾಗಿ ಭರವಸೆ ವ್ಯಕ್ತಪಡಿಸಿದ್ದಾರೆ.

ಹಿಂದಿನ ವಾರ ಮಧ್ಯಪ್ರದೇಶದಲ್ಲಿ ಮಾರುವುದಕ್ಕೆ ಮೊದಲು ಹಣ್ಣುಗಳ ಮೇಲೆ ಉಗಿಯುತ್ತಿದ್ದ ಓರ್ವನನ್ನು ಪೊಲೀಸರು ಬಂಧಿಸಿದ್ದರು.