ಕೊಚ್ಚಿ (ಕೇರಳ): ಭಾರತದಲ್ಲಿ ಸಿಲುಕಿದ್ದ ತನ್ನ 112 ಪ್ರಜೆಗಳನ್ನು ಫ್ರಾನ್ಸ್ ಶನಿವಾರ ಮರಳಿ ತನ್ನ ದೇಶಕ್ಕೆ ಕರೆದೊಯ್ದಿದೆ. ಕೇರಳ ಹಾಗೂ ತಮಿಳುನಾಡುಗಳಲ್ಲಿದ್ದ 112 ಪ್ರಜೆಗಳನ್ನು ಏರ್ ಇಂಡಿಯಾದ ವಿಶೇಷ ವಿಮಾನ ಮೂಲಕ ಫ್ರಾನ್ಸ್ಗೆ ಕರೆದೊಯ್ಯಲಾಯಿತು.
ಕೊರೊನಾ ವೈರಸ್ ಲಾಕ್ಡೌನ್ ಕಾರಣದಿಂದ ಭಾರತದಲ್ಲೇ ಉಳಿಯುವಂತಾಗಿದ್ದ ತನ್ನ ನಾಗರಿಕರನ್ನು ದೇಶಕ್ಕೆ ಕರೆದೊಯ್ಯಲು ಅನುವು ಮಾಡಿಕೊಡಬೇಕೆಂದು ಫ್ರಾನ್ಸ್ ರಾಯಭಾರ ಕಚೇರಿ ಕೇರಳ ಸರ್ಕಾರಕ್ಕೆ ಮನವಿ ಮಾಡಿತ್ತು. ಫ್ರಾನ್ಸ್ನ ಈ ನಾಗರಿಕರು ಪ್ರವಾಸ ಮಾಡಲು ಹಾಗೂ ಕೇರಳದಲ್ಲಿ ಆಯುರ್ವೇದ ಚಿಕಿತ್ಸೆ ಪಡೆಯಲು ಭಾರತಕ್ಕೆ ಆಗಮಿಸಿದ್ದರು.