ವೈದ್ಯೆ ಮೇಲೆ ಅತ್ಯಾಚಾರ, ಕೊಲೆ ಪ್ರಕರಣ: ನಾಲ್ವರು ಕಾಮುಕರ ಕೈಗೆ ಬಿತ್ತು ಬೇಡಿ

ಪಶುವೈದ್ಯೆ ಮೇಲೆ ಅತ್ಯಾಚಾರ ಎಸಗಿ, ಕೊಲೆ ಮಾಡಿ ಬಳಿಕ ಬೆಂಕಿ ಹಚ್ಚಿ ಸುಟ್ಟಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರನ್ನು ಪೊಲೀಸರು ಬಂಧಿಸಿದ್ದಾರೆ.

ಹೈದರಾಬಾದ್​​: 26 ವರ್ಷದ ಪಶುವೈದ್ಯೆ ಮೇಲೆ ಸಾಮೂಹಿಕ ಅತ್ಯಾಚಾರ ಎಸಗಿ, ಆಕೆಯ ದೇಹಕ್ಕೆ ಬೆಂಕಿ ಹಚ್ಚಿ ಸುಟ್ಟು ಹಾಕಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರು ಆರೋಪಿಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಲಾರಿ ಚಾಲಕನ ಜೊತೆ ಕ್ಲೀನರ್​ಗಳು ಈ ಕೃತ್ಯದಲ್ಲಿ ಭಾಗಿಯಾಗಿಯುವುದು ಧೃಡಪಟ್ಟಿದೆ. ನಾಲ್ವರಲ್ಲಿ ಮೊಹಮ್ಮದ್ ಪಾಷಾ ಮತ್ತು ಮಹಬೂಬ್‌ ಎಂದು ಗುರುತಿಸಲಾಗಿದೆ. ಟೋಲ್‌ಪ್ಲಾಜಾದ ಹಿಂದಿನ ಖಾಲಿ ಜಾಗದಲ್ಲಿ ಆಕೆಯ ಮೇಲೆ ಅತ್ಯಾಚಾರ ನಡೆಸಿ ಕೊಲೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ತೆಲಂಗಾಣದ ಶಾದ್​ನಗರದ ಮನೆಯಿಂದ ಕೆಲಸ ಮಾಡುತ್ತಿದ್ದ ಪಶುವೈದ್ಯೆ, ಕೊಲ್ಲೂರು ಗ್ರಾಮದ ಪಶುವೈದ್ಯಕೀಯ ಆಸ್ಪತ್ರೆಗೆ ತೆರಳುತ್ತಿದ್ದ ವೇಳೆ ಅವರ ದ್ವಿಚಕ್ರ ವಾಹನ ಪಂಕ್ಚರ್​ ಆಗಿತ್ತು. ಈ ವೇಳೆ ತಕ್ಷಣವೇ ತನ್ನ ಸಹೋದರಿ ಜತೆ ರಾತ್ರಿ 9.15ಕ್ಕೆ ಆ ವೈದ್ಯೆ ಮಾತನಾಡಿದ್ದಾರೆ. ಈ ವೇಳೆ ಹತ್ತಿರದ ಟೋಲ್​ಗೇಟ್​​​​​ ಬಳಿ ಹೋಗಿ ಕಾಯುವಂತೆ ಹೇಳಿದ್ದಾರೆ.

ಅಲ್ಲಿಗೆ ತೆರಳಿದಾಗ ಈ ನಾಲ್ವರು ಆರೋಪಿಗಳು ಆಕೆಯನ್ನ ಅಪಹರಿಸಿ ಟೋಲ್​​ಗೇಟ್​​ನ ಹಿಂದಿನ ಖಾಲಿ ಜಾಗದಲ್ಲಿ ಅತ್ಯಾಚಾರವೆಸಗಿ, ಕೊಲೆ ಮಾಡಿ ಮೃತದೇಹ ಸುಟ್ಟುಹಾಕಿದ್ದಾರೆ. ಶಾದ್​ನಗರದಿಂದ ಸುಮಾರು 30 ಕಿಲೋಮೀಟರ್​ ದೂರದ ಬ್ರಿಡ್ಜ್ ಕೆಳಗೆ ಸುಟ್ಟಿರುವ ಮೃತದೇಹ ಪತ್ತೆಯಾಗಿತ್ತು ಎಂದು ಪೊಲೀಸರು ಹೇಳಿದ್ದಾರೆ.

ಕುತ್ತಿಗೆಯನ್ನು ಬಿಗಿಯಾಗಿ ಹಿಡಿದು ಕೊಲೆ ಮಾಡಿರಬಹುದು. ತಲೆಗೆ ಬಲವಾದ ಗಾಯವಾಗಿತ್ತು. ಗುರುವಾರ ಮುಂಜಾನೆ 3 - 4 ಗಂಟೆ ಸಮಯದಲ್ಲಿ ಆಕೆಯನ್ನು ಕೊಲೆ ಮಾಡಲಾಗಿದೆ ಎಂದು ಮರಣೋತ್ತರ ಪ್ರಾಥಮಿಕ ವರದಿಯಲ್ಲಿ ವೈದ್ಯರು ಹೇಳಿದ್ದಾರೆ.