ಪಾಟ್ನಾ(ಬಿಹಾರ): ಕೊರೊನಾ ಕಂಟಕದ ನಡುವೆ ರಾಜ್ಯದ ಜನತೆಗೆ ಪ್ರವಾಹ ಸಂಕಷ್ಟ ಎದುರಾಗಿದೆ. ಬಿಹಾರದ ಹತ್ತು ಜಿಲ್ಲೆಯಲ್ಲಿನ ಮೂರು ಸಾವಿರಕ್ಕೂ ಹೆಚ್ಚು ಗ್ರಾಮಗಳು ಈ ಪ್ರವಾಹಕ್ಕೆ ತುತ್ತಾಗಿವೆ. ಒಟ್ಟು ಎಂಟು ಲಕ್ಷಕ್ಕೂ ಅಧಿಕ ಜನರು ತಮ್ಮ ನೆಲೆ ಕಳೆದುಕೊಂಡಿದ್ದಾರೆ.
ಬಿಹಾರದ ಹತ್ತು ಜಿಲ್ಲೆಗಳ ಪೈಕಿ ಸೀತಮಾರ್ಹಿ, ಶಿವಹಾರ್, ಸುಪಾಲ್, ಕಿಶನ್‌ಗಂಜ್, ದರ್ಭಂಗಾ, ಮುಜಾಫರ್ಪುರ್, ಗೋಪಾಲ್‌ಗಂಜ್, ಪಶ್ಚಿಮ ಚಂಪಾರಣ್, ಖಗಾಡಿಯಾ ಮತ್ತು ಪೂರ್ವ ಚಂಪಾರಣ್ ಪ್ರದೇಶಗಳು ಈ ಬಾರಿಯ ಪ್ರವಾಹದಿಂದ ವಿಪರೀತವಾಗಿ ಹಾನಿಗೊಳಗಾಗಿವೆ. ಬಿಹಾರದಲ್ಲಿ ಗಂಡಕ್ ಮತ್ತು ಕೋಸಿ ಸೇರಿದಂತೆ ಅನೇಕ ನದಿಗಳ ನೀರಿನ ಮಟ್ಟ ಹೆಚ್ಚಳದಿಂದಾಗಿ ಪ್ರವಾಹ ಪರಿಸ್ಥಿತಿ ಗಂಭೀರವಾಗಿದೆ. ಗಂಡಕ್ ನದಿ ದಡದಲ್ಲಿ ಅಪಾಯದ ಮಟ್ಟ ಮೀರಿ ನದಿಯ ನೀರು ಹರಿಯತೊಡಗಿದೆ ಎಂದು ತಿಳಿದುಬಂದಿದೆ.
ಬಿಹಾರದ 10 ಜಿಲ್ಲೆಗಳ ಎಂಟು ಲಕ್ಷಕ್ಕೂ ಹೆಚ್ಚು ಜನರು ಪ್ರವಾಹಕ್ಕೆ ಸಿಲುಕಿದ್ದು, ಹೊಲಗಳಲ್ಲಿನ ಭತ್ತ ಮತ್ತು ಮೆಕ್ಕೆಜೋಳ ಬೆಳೆಗಳು ಸಂಪೂರ್ಣವಾಗಿ ನಾಶವಾಗಿವೆ. ಪ್ರವಾಹ ಪೀಡಿತ ಪ್ರದೇಶಗಳಲ್ಲಿ ವಾಸಿಸುವ ಜನರು ಕೃಷಿಯ ಮೇಲೆ ಅವಲಂಬಿತರಾಗಿದ್ದು, ತಮ್ಮ ಜೀವನವನ್ನೇ ಕಳೆದುಕೊಂಡಂತಾಗಿದೆ.