ಮಗ ಪ್ರೀತಿಸಿದ್ದ ಯುವತಿಯನ್ನು ಬಂಧಿಸಿ ಅತ್ಯಾಚಾರ ಎಸಗಿದ ತಂದೆ!

ಅವರಿಬ್ಬರು ಒಬ್ಬರಿಗೊಬ್ಬರು ಪ್ರೀತಿಸುತ್ತಿದ್ದರು. ಪೋಷಕರ ಆಶೀರ್ವಾದ ಪಡೆದು ಮದುವೆ ಆಗಬೇಕೆಂದು ಯೋಚಿಸಿದ್ದರು. ಆದ್ರೆ ಯುವಕನ ತಂದೆಯೇ ಆಕೆಯ ಮೇಲೆ ಅತ್ಯಾಚಾರ ನಡೆಸಿರುವ ಅಮಾನವೀಯ ಘಟನೆ ತಮಿಳುನಾಡಿನಲ್ಲಿ ನಡೆದಿದೆ.

ನಾಗಪಟ್ಟಿಣಂ:ಮಗ ಪ್ರೀತಿಸಿದ್ದ ಯುವತಿ ಮೇಲೆ ತಂದೆಯೊಬ್ಬ ಅತ್ಯಾಚಾರ ಮಾಡಿರುವ ಅಮಾನವೀಯ ಘಟನೆ ನಾಗಪಟ್ಟಿಣಂ ಪೊಲೀಸ್​ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

ನಿತ್ಯಾನಂದ ಎಂಬ ವ್ಯಕ್ತಿ ಬಟ್ಟೆ ವ್ಯಾಪಾರ ಮಾಡುತ್ತಿದ್ದಾರೆ. ಆತನ ಮಗ ಎನ್​.ಮುಖೇಶ್​ ಕಣ್ಣನ್​​​ 20 ವರ್ಷದ ಯುವತಿಯೊಬ್ಬಳನ್ನು ಪ್ರೀತಿಸುತ್ತಿದ್ದ. ಮನೆಯಲ್ಲಿ ಒಪ್ಪಿಗೆ ಪಡೆದು ಇಬ್ಬರು ಮದುವೆಯಾಗಬೇಕೆಂದು ಆಸೆಯಿತ್ತು. ಅದರಂತೆ ಕನ್ನನ್​ ತನ್ನ ಪ್ರೀತಿಯ ವಿಷಯ ತಂದೆ ನಿತ್ಯಾನಂದನಿಗೆ ತಿಳಿಸಿದ್ದಾನೆ. ಆದ್ರೆ ಇವರ ಪ್ರೀತಿ ನಿತ್ಯಾನಂದನಿಗೆ ಇಷ್ಟವಿರಲಿಲ್ಲ.

ಇನ್ನು ಮದುವೆ ವಿಷಯದ ಬಗ್ಗೆ ಮಾತನಾಡುವುದಕ್ಕೆ ಅಂತಾ ಹೇಳಿ ನಿತ್ಯಾನಂದ ಯುವತಿಯನ್ನು ಒಂಟಿಯಾಗಿ ಮನೆಗೆ ಕರೆಸಿದ್ದಾನೆ. ಬಳಿಕ ಯುವತಿಯಿಂದ ಫೋನ್​ ಕಸಿದುಕೊಂಡು ತಾಳಿ ಕಟ್ಟಿ ಅತ್ಯಾಚಾರ ಎಸಗಿದ್ದಾನೆ.

ಯುವತಿಯನ್ನು ಗೃಹ ಬಂಧನದಲ್ಲಿಟ್ಟು ಎರಡು ದಿನಗಳ ಕಾಲ ನಿರಂತರ ಅತ್ಯಾಚಾರ ಎಸಗಿದ್ದಾನೆ. ಬಳಿಕ ಯುವತಿಯನ್ನು ತನ್ನ ಸ್ನೇಹಿತನ ಮನೆಯಲ್ಲಿ ಮುಚ್ಚಿಟ್ಟಿದ್ದಾನೆ. ನಡೆದ ಘಟನೆ ಬಗ್ಗೆ ತಿಳಿದ ಮಗ ಮುಖೇಶ್​ ಕನ್ನನ್​ ಸಂತ್ರಸ್ತೆಯನ್ನು ಕಾಪಾಡಿ ತನ್ನ ತಂದೆ ವಿರುದ್ಧ ಪೊಲೀಸ್​ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ.

ಈ ಘಟನೆ ಬಗ್ಗೆ ನಾಗಪಟ್ಟಿಣಂ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಆರೋಪಿಯನ್ನು ಬಂಧಿಸಿ ವಿಚಾರಣೆ ಕೈಗೊಂಡಿದ್ದಾರೆ.