ಯಡವಟ್ಟು ಮಾಡಿಕೊಂಡ ಮಂಜ್ರೇಕರ್​​​​ಗೆ ನೆಟಿಜನ್ಸ್​​ ​​​​ ಹಿಗ್ಗಾಮುಗ್ಗಾ ತರಾಟೆ!

ನೆಟಿಜನ್ಸ್​​​ ಕಡೆಯಿಂದ ಮೇಲಿಂದ ಮೇಲೆ ಟ್ರೋಲ್​ಗೆ ಒಳಗಾಗುತ್ತಿರುವ ಟೀಂ ಇಂಡಿಯಾ ಮಾಜಿ ಕ್ರಿಕೆಟರ್​ ಸಂಜಯ್​ ಮಂಜ್ರೇಕರ್​ ಇದೀಗ ಮತ್ತೊಂದು ಟ್ವೀಟ್​ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಮಂಗಳಾರತಿ ಮಾಡಿಸಿಕೊಂಡಿದ್ದಾರೆ.

ಮುಂಬೈ:ವೆಸ್ಟ್​ ಇಂಡೀಸ್​ ವಿರುದ್ಧ ನಡೆದ ಎರಡನೇ ಟಿ-20 ಪಂದ್ಯದಲ್ಲಿ ಟೀಂ ಇಂಡಿಯಾ ಸೋಲು ಕಾಣುವ ಮೂಲಕ ಮೂರು ಪಂದ್ಯಗಳ ಸರಣಿಯಲ್ಲಿ 1-1 ಅಂತರದ ಸಮಬಲ ಸಾಧಿಸಿದ್ದು, ವಾಂಖೆಡೆ ಮೈದಾನದಲ್ಲಿಂದು ನಡೆಯುವ ಪಂದ್ಯ ನಿರ್ಣಾಯಕವಾಗಲಿದೆ.

ಇದರ ಮಧ್ಯೆ ಎರಡನೇ ಪಂದ್ಯದಲ್ಲಿ ಟೀಂ ಇಂಡಿಯಾ ಸೋಲಿಗೆ ಸಂಬಂಧಿಸಿದಂತೆ ಟೀಂ ಇಂಡಿಯಾ ಮಾಜಿ ಆಟಗಾರ, ವೀಕ್ಷಕ ವಿವರಣೆಗಾರ ಸಂಜಯ್​ ಮಂಜ್ರೇಕರ್​​​​ ಟ್ವೀಟ್​ ಮಾಡಿದ್ದರು. ಇದೀಗ ಅವರ ಟ್ವೀಟ್​ಗೆ ನೆಟಿಜನ್ಸ್​​ ತರಾಟೆ ತೆಗೆದುಕೊಂಡಿದ್ದಾರೆ.

ಮಂಜ್ರೇಕರ್​ ಟ್ವೀಟ್​ ಮಾಡಿದ್ದೇನು!?ಟೀಂ ಇಂಡಿಯಾ ವೆಸ್ಟ್​ ಇಂಡೀಸ್​ ವಿರುದ್ಧ ಅತಿ ಹೆಚ್ಚು ಟಿ-20 ಪಂದ್ಯ ಆಡಿದ್ರೆ ಮಾತ್ರ ಚುಟುಕು ಕ್ರಿಕೆಟ್​​ನಲ್ಲಿ ಉತ್ತಮ ತಂಡವಾಗಿ ಹೊರಹೊಮ್ಮಲು ಸಾಧ್ಯ ಎಂದು ಬರೆದುಕೊಂಡಿದ್ದರು.

ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ನೆಟಿಜನ್ಸ್​​ ವೆಸ್ಟ್​ ಇಂಡೀಸ್​​ ಕ್ರಿಕೆಟ್​ ಶಿಶು ಆಫ್ಘಾನಿಸ್ತಾನದ ವಿರುದ್ಧ ಸೋಲು ಕಂಡಿದೆ. ನೀವೂ ವೀಕ್ಷಕ ವಿವರಣೆ ಹೇಗೆ ಮಾಡಬೇಕು ಎಂಬುದನ್ನ ಹರ್ಷಾ ಭೋಗ್ಲೆ ಅವರನ್ನ ನೋಡಿ ಕಲಿತುಕೊಳ್ಳಿ ಎಂದು ಟ್ವೀಟ್​ ಮಾಡಿದ್ದಾರೆ.

ಕಳೆದ ಕೆಲ ದಿನಗಳ ಹಿಂದೆ ರವೀಂದ್ರ ಜಡೇಜಾ ಹಾಗೂ ಹಾರ್ದಿಕ್​ ಪಾಂಡ್ಯ ವಿಚಾರದಲ್ಲಿ ಟ್ವೀಟ್​ ಮಾಡಿ ಮಂಜ್ರೇಕರ್​​ ಟ್ರೋಲ್​ಗೆ ಒಳಗಾಗಿದ್ದರು.