ವಾರಣಾಸಿ:ಭಾರತೀಯ ವಾಯುಪಡೆಗೆ ಸೇರ್ಪಡೆಯಾಗಿರುವ ರಫೇಲ್ ಯುದ್ಧ ವಿಮಾನಕ್ಕೆ ಮೊದಲ ಮಹಿಳಾ ಪೈಲಟ್ ಆಗಿ ಶಿವಾಂಗಿ ಸಿಂಗ್ ಆಯ್ಕೆಯಾಗಿದ್ದು, ಇದಕ್ಕೆ ಅವರ ಕುಟುಂಬಸ್ಥರು ಸಂತಸ ವ್ಯಕ್ತಪಡಿಸಿದ್ದಾರೆ.
ಉತ್ತರ ಪ್ರದೇಶದ ವಾರಣಾಸಿಯ ಫ್ಲೈಟ್ ಲೆಫ್ಟಿನೆಂಟ್ ಶಿವಾಂಗಿ ಸೆ.10ರಂದು ಹರಿಯಾಣದ ಅಂಬಾಲ ವಾಯುನೆಲೆಯಲ್ಲಿ ಫೈಟರ್ ಜೆಟ್ ಚಲಾಯಿಸಿದ್ದು, ಈ ಮೂಲಕ ಫೈಟರ್ ರಫೇಲ್ ಚಲಾಯಿಸಿರುವ ಪ್ರಥಮ ಮಹಿಳಾ ಪೈಲಟ್ ಆಗಿದ್ದಾರೆ.
ಇದೇ ವಿಚಾರವಾಗಿ ಈಟಿವಿ ಭಾರತ ಜತೆ ಶಿವಾಂಗಿ ಸಿಂಗ್ ತಾಯಿ ಸೀಮಾ ಸಿಂಗ್, ಮಗಳು ಯುದ್ಧ ವಿಮಾನ ಚಲಾಯಿಸುತ್ತಿರುವುದು ನಿಜಕ್ಕೂ ಸಂತೋಷದ ವಿಚಾರ. ಆದರೆ ಸ್ವಲ್ಪ ಭಯವಿದೆ ಎಂದಿದ್ದಾರೆ. ಫೈಟರ್ ಜೆಟ್ ರಫೇಲ್ ಸುಧಾರಿತ ಜೆಟ್ ಆಗಿದೆ ಎಂದಿದ್ದಾರೆ. ಶಿವಾಂಗಿಯನ್ನ ನಾವು ಎಂದಿಗೂ ಹುಡುಗಿಯಂತೆ ಪರಿಗಣಿಸಿಲ್ಲ. ವಿದ್ಯಾಭ್ಯಾಸದ ವೇಳೆ ಕ್ರೀಡೆಯಲ್ಲಿ ಹೆಚ್ಚು ಉತ್ಸಾಹ ಹೊಂದಿದ್ದಳು ಎಂದಿದ್ದಾರೆ. ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಶಿವಾಂಗಿ ತಂದೆ ಸುಶೀಲ್ ಸಿಂಗ್, ಮಗಳ ಬೆಳವಣಿಗೆ ಬಗ್ಗೆ ತಮಗೆ ಖುಷಿ ಇದೆ ಎಂದಿದ್ದಾರೆ.
ವಾಯುಪಡೆಯ ಅತ್ಯಂತ ಹಳೆ ಯುದ್ಧ ವಿಮಾನ ಮಿಗ್-21 ಚಲಾಯಿಸುತ್ತಿದ್ದ ಶಿವಾಂಗಿ ಸದ್ಯ ವಾಯುಪಡೆಯ ಅತ್ಯಾಧುನಿಕ ಯುದ್ಧ ವಿಮಾನ ರಫೇಲ್ ಚಲಾಯಿಸಲಿದ್ದಾರೆ. ರಫೇಲ್ ಯುದ್ಧ ವಿಮಾನ ಗಂಟೆಗೆ ಗರಿಷ್ಠ 750 ಕಿಲೋ ಮೀಟರ್ ವೇಗದಲ್ಲಿ ಹಾರಾಟ ನಡೆಸಬಲ್ಲದು.
