1 ಲೋಕಸಭೆ, 56 ವಿಧಾನಸಭಾ ಕ್ಷೇತ್ರಗಳಿಗೆ ನ.​ 3 & 7ರಂದು ಮತದಾನ, ನ.10ಕ್ಕೆ ಫಲಿತಾಂಶ

ಒಂದು ಸಂಸದೀಯ ಕ್ಷೇತ್ರ ಸೇರಿದಂತೆ ದೇಶದಲ್ಲಿ 56 ವಿಧಾನಸಭಾ ಕ್ಷೇತ್ರಗಳಿಗೆ ಇದೀಗ ಉಪಚುನಾವಣೆ ಘೋಷಣೆಯಾಗಿದೆ. ಇದರಲ್ಲಿ ಕರ್ನಾಟಕದ ಎರಡು ಕ್ಷೇತ್ರಗಳು ಸೇರಿಕೊಂಡಿವೆ.

ನವದೆಹಲಿ: ಲೋಕಸಭೆಯ ಒಂದು ಕ್ಷೇತ್ರ ಹಾಗೂ ವಿವಿಧ ರಾಜ್ಯಗಳ 56 ವಿಧಾನಸಭಾ ಕ್ಷೇತ್ರಗಳಿಗೆ ನವೆಂಬರ್​​ 3 ಮತ್ತು 7ರಂದು ಉಪಚುನಾವಣೆ ನಡೆಯಲಿದ್ದು, ನವೆಂಬರ್​ 10ರಂದು ಫಲಿತಾಂಶ ಬಹಿರಂಗಗೊಳ್ಳಲಿದೆ ಎಂದು ಕೇಂದ್ರ ಚುನಾವಣಾ ಆಯೋಗ ಪ್ರಕಟಣೆ ಹೊರಡಿಸಿದೆ.

ಪ್ರಮುಖವಾಗಿ ಕರ್ನಾಟಕ, ತೆಲಂಗಾಣ ಸೇರಿ 11 ರಾಜ್ಯಗಳ 56 ವಿಧಾನಸಭಾ ಕ್ಷೇತ್ರಗಳಿಗೆ ಮತದಾನ ನಡೆಯಲಿದ್ದು, ಬಿಹಾರದ ಲೋಕಸಭಾ ಕ್ಷೇತ್ರಕ್ಕೆ ನವೆಂಬರ್​ 7ರಂದು ಚುನಾವಣೆ ನಿಗದಿಯಾಗಿದೆ.

ಮಣಿಪುರದ ಎರಡು ಕ್ಷೇತ್ರಗಳಿಗೆ ನವೆಂಬರ್​ 7ರಂದು ಮತದಾನ ನಡೆಯಲಿದ್ದು, ಉಳಿದ ಎಲ್ಲ ಕ್ಷೇತ್ರಗಳಿಗೆ ನವೆಂಬರ್​​ 3ರಂದು ವೋಟಿಂಗ್​ ನಡೆಯಲಿದೆ. ಇದರ ಫಲಿತಾಂಶ ನವೆಂಬರ್​​ 10ಕ್ಕೆ ನಡೆಯಲಿದೆ.

ಯಾವೆಲ್ಲ ರಾಜ್ಯಗಳಲ್ಲಿ ಬೈ ಎಲೆಕ್ಷನ್​!?

ಕರ್ನಾಟಕ(2 ಕ್ಷೇತ್ರ), ತೆಲಂಗಾಣ(1), ಛತ್ತೀಸ್​ಗಢ(1), ಗುಜರಾತ್(8)​, ಜಾರ್ಖಂಡ್(2)​, ಹರಿಯಾಣ(1), ಮಧ್ಯಪ್ರದೇಶ(28), ಮಣಿಪುರ(2), ನಾಗಲ್ಯಾಂಡ್(2)​,ಒಡಿಶಾ(2) ಮತ್ತು ಉತ್ತರಪ್ರದೇಶ(7 ಕ್ಷೇತ್ರ) ರಾಜ್ಯಗಳಾಗಿವೆ.

ಈ ರಾಜ್ಯಗಳಲ್ಲಿ ನಡೆಯಲ್ಲ ಉಪಚುನಾವಣೆ

ಇದರ ಜತೆಗೆ ನಾಲ್ಕು ರಾಜ್ಯಗಳಲ್ಲಿನ ಏಳು ವಿಧಾನಸಭಾ ಕ್ಷೇತ್ರಗಳಲ್ಲಿ ಕೇಂದ್ರ ಚುನಾವಣಾ ಆಯೋಗ ಮತದಾನ ನಡೆಸುತ್ತಿಲ್ಲ. ಕೇರಳ, ತಮಿಳುನಾಡು, ಅಸ್ಸೋಂ ಹಾಗೂ ಪಶ್ಚಿಮ ಬಂಗಾಳ ರಾಜ್ಯಗಳು ಇವಾಗಿವೆ.