'ಲಂಕಾ ದಹನ' ನಂದಿಸಲು ಭಾರತದ ವಿಮಾನ... ಕಚ್ಚಾ ತೈಲ ಸಾಗಿಸುತ್ತಿದ್ದ ಹಡಗಿನ ಬೆಂಕಿ ಆರಿಸಲು ಡೋನಿಯರ್​ ರವಾನೆ!

ಕಚ್ಚಾ ತೈಲ ಸಾಗಿಸುತ್ತಿದ್ದ ಎಂಟಿ ನ್ಯೂ ಡೈಮಂಡ್ ಹಡಗಿನಲ್ಲಿ ಬೆಂಕಿಯನ್ನು ನಂದಿಸಲು ರಾಸಾಯನಿಕ ತುಂಬಿದ ಡೋನಿಯರ್ ಏರ್​ಕ್ರಾಫ್ಟ್​ ಅನ್ನು ಚೆನ್ನೈನಿಂದ ರವಾನೆ ಮಾಡಲಾಗಿದೆ

ನವದೆಹಲಿ: ಶ್ರೀಲಂಕಾದ ವಾಯವ್ಯ ಕರಾವಳಿಯಲ್ಲಿ ಅಗ್ನಿ ಅನಾಹುತಕ್ಕೆ ಒಳಗಾಗಿರುವ ಕಚ್ಚಾ ತೈಲ ಸಾಗಿಸುತ್ತಿದ್ದ ಎಂಟಿ ನ್ಯೂ ಡೈಮಂಡ್ ಹಡಗಿನಲ್ಲಿ ಬೆಂಕಿಯನ್ನು ನಂದಿಸಲು ಭಾರತದಿಂದ ಡೋನಿಯರ್ ಏರ್​ಕ್ರಾಫ್ಟ್​ ಅನ್ನು ಕಳುಹಿಸಲಾಗಿದೆ.

ಈ ಏರ್​ಕ್ರಾಫ್ಟ್​ನಲ್ಲಿ 700 ಕಿಲೋಗ್ರಾಮ್​ನಷ್ಟು ಡಿಸಿಪಿ ( ಡ್ರೈ ಕೆಮಿಕಲ್ ಪೌಡರ್​) ಅನ್ನು ರವಾನಿಸಲಾಗಿದ್ದು, ಬೆಂಕಿ ನಂದಿಸಲು ಈ ರಾಸಾಯನಿಕ ಬಳಸಲಾಗುತ್ತದೆ.

ಕೆಲವು ದಿನಗಳಿಂದ ತಹಬದಿಗೆ ಬಂದಿದ್ದ ಬೆಂಕಿ ಮತ್ತೆ ಕಾಣಿಸಿಕೊಂಡಿದೆ ಎಂದು ಭಾರತೀಯ ನೌಕಾಪಡೆ ಹೇಳಿದೆ. ಬೆಂಕಿಯನ್ನು ನಂದಿಸುವ ಪ್ರಕ್ರಿಯೆ ನಡೆಯುತ್ತಿದೆ. ರಕ್ಷಣಾ ತಂಡ ಸ್ಥಳಕ್ಕೆ ಧಾವಿಸಿದೆ ಎಂದು ನೌಕಾಪಡೆ ಟ್ವಿಟರ್​ನಲ್ಲಿ ಸ್ಪಷ್ಟನೆ ನೀಡಿದೆ.

ಸೆಪ್ಟೆಂಬರ್ 3ರಂದು ಎಂಟಿ ನ್ಯೂ ಡೈಮಂಡ್ ಹಡಗಿನಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಅಲ್ಲಿಂದ ಇಲ್ಲಿಯವರೆಗೂ ಬೆಂಕಿ ನಂದಿಸುವ ಕಾರ್ಯ ಮುಂದುವರೆಯುತ್ತಿದೆ.

ಈ ಹಡಗು 333 ಮೀಟರ್ ಉದ್ದವಿದ್ದು, ಮೂರು ಲಕ್ಷ ಟನ್​ನಷ್ಟು ಕಚ್ಚಾ ತೈಲವನ್ನು ಕುವೈತ್​ನಿಂದ ಪಾರಾದೀಪ್​ಗೆ ಸಾಗಿಸುತ್ತಿತ್ತು. ಈ ತೈಲವನ್ನು ಇಂಡಿಯನ್​ ಆಯಿಲ್ ಕಾರ್ಪೋರೇಷನ್​ಗೆ ಪೂರೈಸಲು ಸಾಗಣೆ ಮಾಡಲಾಗುತ್ತಿತ್ತು.

ಈಗ ಮತ್ತೆ ಬೆಂಕಿ ಕಾಣಿಸಿಕೊಂಡ ಕಾರಣದಿಂದಾಗಿ ಡ್ರೈ ಕೆಮಿಕಲ್ ಪೌಡರ್​ ಇರುವ ಡೋನಿಯರ್ ಏರ್​ಕ್ರಾಫ್ಟ್ ಅನ್ನು ಚೆನ್ನೈನಿಂದ ಸ್ಥಳಕ್ಕೆ ಕಳುಹಿಸಿ, ಕಾರ್ಯಾಚರಣೆಗೆ ನಿಯೋಜಿಸಲಾಗಿದೆ.​