ಟಿಕೆಟ್‌ ಸಿಗದ ಕೋಪಕ್ಕೆ 300 ಕುರ್ಚಿ ಹೊತ್ಕೊಂಡ್ಹೋದ ಕಾಂಗ್ರೆಸ್‌ ಎಂಎಲ್ಎ..

ಲೋಕಸಭೆ ಚುನಾವಣೆಗೆ ಟಿಕೆಟ್​ ನೀಡಲಿಲ್ಲವೆಂದು ಅಸಮಾಧಾನಗೊಂಡ ಕಾಂಗ್ರೆಸ್​ ಶಾಸಕ ಅಬ್ದುಲ್ ಸತ್ತರ್ ಪಕ್ಷದ ಕಚೇರಿಯಿಂದ 300 ಕುರ್ಚಿಗಳನ್ನು ಹೊತ್ತೊಯ್ದಿದ್ದಾರೆ

ಔರಂಗಬಾದ್​:ಚುನಾವಣೆಗೆ ಟಿಕೆಟ್​ ನೀಡಲಿಲ್ಲವೆಂದು ಬಂಡೇಳುವ ಅಭ್ಯರ್ಥಿಗಳನ್ನು ನೋಡಿದ್ದೇವೆ. ಆದರೆ, ಇಲ್ಲೊಬ್ಬ ಕಾಂಗ್ರೆಸ್​ ಶಾಸಕ ಪಕ್ಷದ ಕಚೇರಿಯಿಂದ 300 ಕುರ್ಚಿಗಳನ್ನು ಹೊತ್ತೊಯ್ದಿರುವ ಘಟನೆ ಮಹಾರಾಷ್ಟ್ರದ ಔರಂಗಬಾದ್​ನಲ್ಲಿ ನಡೆದಿದೆ.

ಸಿಲ್ಲೋದ್​ನ ಶಾಸಕ ಅಬ್ದುಲ್ ಸತ್ತರ್​ ಎಂಬುವರು ಕಾಂಗ್ರೆಸ್​ನಿಂದ ಟಿಕೆಟ್​ ದೊರೆಯದಿದ್ದಕ್ಕೆ ಅಸಮಾಧಾನಗೊಂಡು, ಪಕ್ಷದ ಸ್ಥಳೀಯ ಕಚೇರಿಯಿಂದ 300 ಕುರ್ಚಿಗಳನ್ನು ಹೊತ್ತೊಯ್ದಿದ್ದಾರೆ. ಕಾಂಗ್ರೆಸ್​ ಹಾಗೂ ಎನ್​ಸಿಪಿ ಮೈತ್ರಿ ಕುರಿತು ಶಹಗುಂಜ್​ನಲ್ಲಿನ ಪಕ್ಷದ ಕಚೇರಿ ಗಾಂಧಿ ಭವನದಲ್ಲಿ ನಿನ್ನೆ ಸಭೆ ನಡೆಯುವ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ಬೆಂಬಲಿಗರೊಂದಿಗೆ ಬಂದ ಸತ್ತರ್​ ಕಚೇರಿಯಲ್ಲಿದ್ದ ಕುರ್ಚಿಗಳನ್ನು ಕೊಂಡೊಯ್ದಿದ್ದಾರೆ. ಇವು ನಾನು ನೀಡಿದ್ದ ಕುರ್ಚಿಗಳು ಎಂದೂ ಅವರು ಹೇಳಿಕೊಂಡಿದ್ದಾರೆ.

ಜಿಲ್ಲೆಯಲ್ಲಿ ಪ್ರಮುಖ ನಾಯಕ ಎಂದು ಗುರುತಿಸಿಕೊಂಡಿರುವ ಸತ್ತರ್​, ಲೋಕಸಭೆ ಚುನಾವಣೆಗೆ ಕಾಂಗ್ರೆಸ್ ಟಿಕೆಟ್‌ ಆಕಾಂಕ್ಷಿಯಾಗಿದ್ದರು. ತಮಗೆ ಟಿಕೆಟ್​ ಸಿಕ್ಕೇ ಸಿಗುತ್ತದೆ ಎಂದು ಭರವಸೆಯಲ್ಲಿದ್ದ ಸತ್ತರ್​ಗೆ ಕಾಂಗ್ರೆಸ್​ ದಿಗ್ಭ್ರಾಂತಗೊಳಿಸಿದೆ. ಔರಂಗಬಾದ್​ನಿಂದ ಎಂಎಲ್​ಸಿ ಸುಭಾಷ್​ ಝಮ್​ಬಾದ್​ರನ್ನು ಕಣಕ್ಕಿಳಿಸಲು ನಿರ್ಧರಿಸಿದೆ. ಇದರಿಂದ ಕೋಪಗೊಂಡ ಸತ್ತರ್​ ಹೀಗೆ ಮಾಡಿದ್ದಾರೆ ಎಂದು ತಿಳಿದುಬಂದಿದೆ.

ಪಕ್ಷವನ್ನು ತೊರೆದು, ಚುನಾವಣೆಗೆ ಸ್ಪರ್ಧಿಸಲು ಸಹ ಅವರು ನಿರ್ಧಾರ ಮಾಡಿದ್ದಾರೆ. ಆದರೆ, ಅವರ ರಾಜೀನಾಮೆ ಇನ್ನೂ ಅಂಗೀಕಾರವಾಗಿಲ್ಲವೆಂದು ತಿಳಿದುಬಂದಿದೆ.