ಬಾಯ್​ಫ್ರೆಂಡ್​ ಜೊತೆ ಸೇರಿ ಮಗಳಿಂದಲೇ ದೆಹಲಿ ಪೊಲೀಸ್ ಮಹಿಳಾ ಕಾನ್‌ಸ್ಟೇಬಲ್ ಕೊಲೆ

ದೆಹಲಿ ಪೊಲೀಸ್ ಮಹಿಳಾ ಮುಖ್ಯ ಕಾನ್‌ಸ್ಟೇಬಲ್ ತನ್ನ ಮಗಳಿಂದಲೇ ಹತ್ಯೆಗೀಡಾಗಿರುವ ಘಟನೆ ಉತ್ತರ ಪ್ರದೇಶದ ಘಾಜಿಯಾಬಾದ್​​ನಲ್ಲಿ ನಡೆದಿದೆ.

ಘಾಜಿಯಾಬಾದ್​/ಉತ್ತರ ಪ್ರದೇಶ : ಬಾಯ್​ಫ್ರೆಂಡ್​ ಜೊತೆ ಸೇರಿ 16 ವರ್ಷದ ಸ್ವಂತ ಮಗಳೇ ದೆಹಲಿ ಮಹಿಳಾ ಪೊಲೀಸ್ ಮುಖ್ಯ ಕಾನ್​ಸ್ಟೇಬಲ್​ ಅವರನ್ನು ಕೊಲೆ ಮಾಡಿದ ಭಯಾನಕ ಘಟನೆ ನಡೆದಿದೆ.

ಶಶಿಮಾಲಾ ಹತ್ಯೆಯಾದ ಮಹಿಳಾ ಮುಖ್ಯ ಕಾನ್​ಸ್ಟೇಬಲ್​, ಉತ್ತರ ಪ್ರದೇಶದ ಘಾಜಿಯಾಬಾದ್​ನ ಬ್ರಿಜ್​​ ವಿಹಾರ್​​ ಕಾಲೋನಿಯಲ್ಲಿರುವ ಅವರ ನಿವಾಸದಲ್ಲೇ ಕೊಲೆ ಮಾಡಲಾಗಿದೆ ಎಂದು ಘಾಜಿಯಾಬಾದ್ ಪೊಲೀಸರು ತಿಳಿಸಿದ್ದಾರೆ.

ಶಶಿಮಾಲಾ ಪತಿ ಗೋಪಾಲ್​ ಠಾಕೂರ್​ ಬಿಹಾರ್​​ನಲ್ಲಿ ನೆಲೆಸಿದ್ದು, ನೆರೆಹೊರೆಯವರು ಅವರಿಗೆ ಶಶಿಮಾಲಾ ಹತ್ಯೆ ವಿಷಯ ಮುಟ್ಟಿಸಿದ್ದಾರೆ. ಬಳಿಕ ಗೋಪಾಲ್​ ಪೊಲೀಸ್​ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ. ಮಗಳ ವಿದ್ಯಾಭ್ಯಾಸಕ್ಕೆ ತೊಂದರೆಯಾಗಬಾರದು ಎಂಬ ಉದ್ದೇಶದಿಂದ ಶಶಿಮಾಲಾ ಮತ್ತು ಗೋಪಾಲ್​ ಬೇರೆ-ಬೇರೆ ವಾಸಿಸುತ್ತಿದ್ದರು ಎನ್ನಲಾಗಿದೆ. ಶಶಿಮಾಲಾ ಮನೆಯಿಂದ ದುರ್ವಾಸನೆ ಬರುತ್ತಿದಿದ್ದನ್ನು ಗಮನಿಸಿದ ಸ್ಥಳೀಯರು ಈ ವಿಷಯವನ್ನು ಗೋಪಾಲ್​ ಹಾಗೂ ಪೊಲೀಸರಿಗೆ ತಿಳಿಸಿದ್ದು, ಸ್ಥಳಕ್ಕೆ ಧಾವಿಸಿ ಪರಿಶೀಲನೆ ನಡೆಸಿದಾಗ ಸ್ವಿಮ್ಮಿಂಗ್​ ಪೂಲ್​​ನಲ್ಲಿ ರಕ್ತಪೂರಿತ ಶಶಿಕಲಾ ಶವ ಪತ್ತೆಯಾಗಿದೆ.

ಮಗಳ ಬಾಯ್​ಫ್ರೆಂಡ್​ ಮನೆಗೆ ಬಂದಿದ್ದು, ಇದಕ್ಕೆ ತಾಯಿ ಶಶಿಮಾಲಾ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಇದರಿಂದ ಕೋಪಗೊಂಡ ಮಗಳು ಬಾಯ್​ಫ್ರೆಂಡ್​ ಜೊತೆ ಸೇರಿ ಶಶಿಮಾಲಾಳನ್ನು ಕೊಲೆ ಮಾಡಿದ್ದಾಳೆ ಎಂದು ಅವರ ಪತಿ ಗೋಪಾಲ್​ ದೂರಿನಲ್ಲಿ ದಾಖಲಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಪೊಲೀಸ್ ವರಿಷ್ಠಾಧಿಕಾರಿ ಮನೀಶ್ ಶರ್ಮಾ, ಕೊಲೆ ಪ್ರಕರಣ ದಾಖಲಾಗಿದ್ದು, ಆರೋಪಿಗಳಿಬ್ಬರನ್ನೂ ವಶಕ್ಕೆ ಪಡೆಯಲಾಗಿದೆ ಎಂದು ತಿಳಿಸಿದರು.