'ನನ್ನಿಂದಾಗಿ ಕುಟುಂಬದವರಿಗೆ ಕೊರೊನಾ ಹರಡುವುದು ಬೇಡ'... ಡೆತ್​ ನೋಟ್ ಬರೆದಿಟ್ಟು IRS ಅಧಿಕಾರಿ ಆತ್ಮಹತ್ಯೆ

ಕೋವಿಡ್​ ಪರೀಕ್ಷೆ ವರದಿ ನೆಗಟಿವ್​ ಬಂದಿತ್ತಾದರೂ ನನ್ನಿಂದಾಗಿ ನನ್ನ ಕುಟುಂಬದವರಿಗೆ ಕೊರೊನಾ ಸೋಂಕು ಹರಡುವುದು ಬೇಡವೆಂದು ಆಂತರಿಕ ಕಂದಾಯ ಸೇವೆ (IRS) ಅಧಿಕಾರಿಯೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ನವದೆಹಲಿ: ಕೊರೊನಾ ಭೀತಿಯಲ್ಲಿ ಆಂತರಿಕ ಕಂದಾಯ ಸೇವೆ (IRS) ಅಧಿಕಾರಿಯೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ರಾಷ್ಟ್ರ ರಾಜಧಾನಿಯಲ್ಲಿ ನಡೆದಿದೆ.

ದೆಹಲಿಯ ದ್ವಾರಕಾ ಪ್ರದೇಶದಲ್ಲಿ ಕಾರಿನೊಳಗೆ ಆ್ಯಸಿಡ್​ ತರಹದ ದ್ರಾವಣವನ್ನು ಕುಡಿದು ಅಧಿಕಾರಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಕಾರಿನೊಳಗೆ ಡೆತ್​ ನೋಟ್​ ಕೂಡ ಸಿಕ್ಕಿದ್ದು, 'ನನ್ನಿಂದ ನನ್ನ ಕುಟುಂಬದವರಿಗೆ ಕೊರೊನಾ ಸೋಂಕು ಹರಡುವುದು ಬೇಡ, ನನ್ನಿಂದಾಗಿ ಅವರು ಬಳಲುವುದು ಬೇಡ' ಎಂದು ಬರೆದಿದ್ದಾರೆ.

ಒಂದು ವಾರದ ಹಿಂದೆ ಮೃತ IRS ಅಧಿಕಾರಿ ಕೋವಿಡ್​ ಪರೀಕ್ಷೆಗೆ ಒಳಗಾಗಿದ್ದರು. ವರದಿ ನೆಗಟಿವ್​ ಬಂದಿತ್ತು. ಆದರೂ ಕೂಡ ತನ್ನಿಂದಾಗಿ ಮಹಾಮಾರಿ ತನ್ನ ಕುಟುಂಬದವರಿಗೆ ಅಂಟುವುದು ಬೇಡ ಅಂತಾ ಈ ನಿರ್ಧಾರ ಮಾಡಿದ್ದಾರೆ ಎಂದು ದಕ್ಷಿಣ ದ್ವಾರಕಾ ಠಾಣೆಯ ಹಿರಿಯ ಪೊಲೀಸ್​ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.