ಮಹಿಳಾ ಕೈದಿ ಮೇಲೆ ಪೊಲೀಸಪ್ಪನಿಂದ ಅತ್ಯಾಚಾರ...ಚಲಿಸುವ​ ಟ್ರೈನ್​ ಬಾತ್​ರೂಂನಲ್ಲೇ ನಡೀತು ದುಷ್ಕೃತ್ಯ!

ಈ ಕಾಲದಲ್ಲಿ ಮಹಿಳಾ ಕೈದಿಗಳಿಗೂ ಸುರಕ್ಷತೆ ಇಲ್ಲದಂತಾಗಿದೆ. ರಕ್ಷಣೆ ನೀಡಬೇಕಾಗಿದ್ದ ಪೊಲೀಸರೇ ಮಹಿಳೆ ಮೇಲೆ ಎರಗಿರುವ ಸಂಗತಿ ತಡವಾಗಿ ಬೆಳಕಿಗೆ ಬಂದಿದೆ.

ದೆಹಲಿ: ವಿಚಾರಣೆಗೆ ಹಾಜರಾಗಿ ವಾಪಸ್​ ಆಗುತ್ತಿದ್ದ ವೇಳೆ ಮಹಿಳಾ ಕೈದಿ ಮೇಲೆ ಅತ್ಯಾಚಾರ ನಡೆಸಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಆಗಸ್ಟ್​ 3ರಂದು ತಿಹಾರ್​ ಜೈಲಿನ ಕೈದಿಯಾಗಿದ್ದ 42 ವರ್ಷದ ಮಹಿಳೆಯನ್ನು ಇಬ್ಬರು ಮಹಿಳಾ ಪೇದೆ ಮತ್ತು ಪೊಲೀಸ್​ ಪೇದೆಯೊಬ್ಬರು ವಿಚಾರಣೆಗೆ ಎಂದು ಪಶ್ಚಿಮ ಬಂಗಾಳದ ಮುರ್ಷಿದಾಬಾದ್​ನ ಕೋರ್ಟ್​ಗೆ ಕರೆದೊಯ್ದಿದ್ದರು.

ಕೋರ್ಟ್​ಗೆ ಹಾಜರು ಪಡಿಸಿ ರೈಲಿನಲ್ಲಿ ವಾಪಸ್​​ ಆಗುತ್ತಿದ್ದ ವೇಳೆ ಮಹಿಳಾ ಕೈದಿ ಮೂತ್ರ ವಿಸರ್ಜನೆಗಂದು ಬಾತ್​ರೂಂಗೆ ತೆರಳಿದ್ದಾರೆ. ಈ ವೇಳೆ ಇಬ್ಬರು ಮಹಿಳಾ ಪೇದೆ ಆಕೆಯೊಂದಿಗೆ ಹೋಗಿದ್ದರು. ಆದ್ರೆ ಪೊಲೀಸ್​ ಪೇದೆ ಇಬ್ಬರು ಮಹಿಳಾ ಪೇದೆಗಳನ್ನ ಹಿಂದಕ್ಕೆ ಕಳುಹಿಸಿ ಬಾತ್​ರೂಂಗೆ ನುಗ್ಗಿದ್ದಾನೆ. ಚಲಿಸುತ್ತಿದ್ದ ರೈಲಿನಲ್ಲೇ ಮಹಿಳಾ ಕೈದಿ ಮೇಲೆ ಅತ್ಯಾಚಾರ ಎಸಗಿ ಯಾರಿಗೂ ಹೇಳದಂತೆ ಜೀವ ಬೆದರಿಕೆಯೊಡ್ಡಿದ್ದಾನೆ.

ಮಹಿಳಾ ಕೈದಿಯನ್ನು ತಿಹಾರ್​ ಜೈಲಿಗೆ ಕರೆತಂದಿದ್ದಾರೆ. ಈ ವೇಳೆ ಮಹಿಳೆ, ರೈಲಿನಲ್ಲಿ ನಡೆದ ಘಟನೆಯನ್ನು ಹಿರಿಯ ಅಧಿಕಾರಿಗಳು ಮುಂದೆ ಹೇಳಿದ್ದಾರೆ. ಹಿರಿಯ ಅಧಿಕಾರಿಗಳು ಮಹಿಳಾ ಕೈದಿಯನ್ನು ವೈದ್ಯಕೀಯ ಪರೀಕ್ಷೆಗೆ ಕಳುಹಿಸಿ, ಪೊಲೀಸ್​ ಪೇದೆಯನ್ನು ವಶಕ್ಕೆ ಪಡೆದು ಮುಂದಿನ ಕ್ರಮಕೈಗೊಂಡಿದ್ದಾರೆ.