ನವದೆಹಲಿ: ಕುಖ್ಯಾತ ರೌಡಿಶೀಟರ್ ವಿಕಾಸ್ ದುಬೆ ಎನ್ಕೌಂಟರ್ ಬಗ್ಗೆ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರು ಉತ್ತರ ಪ್ರದೇಶದ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿ, 'ಅಪರಾಧಿಯ ಕಥೆ ಮುಗಿದಿದೆ. ಇಂಥಹ ಅಪರಾಧಿಗಳನ್ನು ರಕ್ಷಿಸುವವರ ಬಗ್ಗೆ ಏನು' ಎಂದು ಪ್ರಶ್ನಿಸಿದ್ದಾರೆ.
ಈ ಕುರಿತು ಹಿಂದಿಯಲ್ಲಿ ಟ್ವೀಟ್ ಮಾಡಿದ ಪ್ರಿಯಾಂಕಾ, ಅಪರಾಧಿ ಹೋಗಿದ್ದಾನೆ. ಆದರೆ, ಅಪರಾಧ ಮತ್ತು ಅವನನ್ನು ರಕ್ಷಿಸುವವರ ಬಗ್ಗೆ ಏನು ಎಂದು ಪ್ರಶ್ನಿಸಿದ್ದಾರೆ.
ಮತ್ತೊಂದು ಟ್ವೀಟ್ ಮತ್ತು ವಿಡಿಯೋದಲ್ಲಿ ಯುಪಿಯ ಕಾನೂನು ಸುವ್ಯವಸ್ಥೆ ಹದಗೆಟ್ಟಿದೆ. ರಾಜಕಾರಣಿ-ಅಪರಾಧ ಮೈತ್ರಿಗಳು ರಾಜ್ಯದ ಮೇಲೆ ಪ್ರಾಬಲ್ಯ ಹೊಂದಿವೆ. ಕಾನ್ಪುರ ಪ್ರಕರಣದಲ್ಲಿ ಈ ಮೈತ್ರಿಯ ಸಂಬಂಧ ಬೆಳಕಿಗೆ ಬಂದಿತು?. ಅಂತಹ ಅಪರಾಧಿಯನ್ನು ಬೆಳೆಸುವಲ್ಲಿ ತೊಡಗಿರುವ ಜನರು ಯಾರು? ಇದನ್ನು ಬಹಿರಂಗಪಡಿಸಬೇಕು. ಸುಪ್ರೀಂಕೋರ್ಟ್‌ನ ನ್ಯಾಯಾಧೀಶರು ಇಡೀ ಪ್ರಕರಣದ ಬಗ್ಗೆ ನ್ಯಾಯಾಂಗ ವಿಚಾರಣೆ ನಡೆಸಬೇಕು ಎಂದು ಮನವಿ ಮಾಡಿದರು.
ಕಾನ್ಪುರ ಪೊಲೀಸರ ಹತ್ಯಾಕಾಂಡದ ಪ್ರಮುಖ ಆರೋಪಿ ದುಬೆ ಅವರನ್ನು ಗುರುವಾರ ಬೆಳಗ್ಗೆ ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿ ಬಂಧಿಸಲಾಯಿತು. ದುಬೆಗೆ ರಕ್ಷಣೆ ನೀಡಿದವರ ಬಗ್ಗೆ ಸತ್ಯ ತಿಳಿಯಲು ಸಿಬಿಐ ತನಿಖೆಗೆ ಪ್ರಿಯಾಂಕಾ ಅವರು ಒತ್ತಾಯಿಸಿದ್ದರು.
ಎಂಟು ಪೊಲೀಸರನ್ನು ಹತ್ಯೆ ಮಾಡಿದ ಪ್ರಕರಣವನ್ನು ನಿಭಾಯಿಸುವಲ್ಲಿ ಉತ್ತರಪ್ರದೇಶದ ಬಿಜೆಪಿ ಸರ್ಕಾರವು ಸಂಪೂರ್ಣ ವಿಫಲವಾಗಿದೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಆರೋಪಿಸಿದ್ದರು.
