ವಿಮಾನದಲ್ಲಿ ಕೊರೊನಾ ಶಂಕಿತ ವ್ಯಕ್ತಿ: ಕಿಟಕಿಯಿಂದಲೇ ಜಿಗಿದ ಪೈಲಟ್!

ಪುಣೆಯಿಂದ ದೆಹಲಿಗೆ ಬಂದ ಏರ್ ಏಷಿಯಾ ವಿಮಾನವೊಂದರಲ್ಲಿ ಕೊರೊನಾ ವೈರಸ್​ ಶಂಕಿತನೋರ್ವ ಇದ್ದಾನೆಂದು ತಿಳಿದು ಕಿಟಕಿಯಿಂದ ಪೈಲಟ್ ಜಿಗಿದಿದ್ದಾನೆ.

ನವದೆಹಲಿ: ದೇಶದಲ್ಲಿ ಕೊರೊನಾ ವೈರಸ್​ ಸೋಂಕು ಪ್ರಕರಣಗಳು ಹೆಚ್ಚಾಗುತ್ತಿರುವ ಬೆನ್ನಲ್ಲೇ ದೆಹಲಿಯ ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಿಚಿತ್ರ ಘಟನೆಯೊಂದು ನಡೆದಿದೆ.

ಪುಣೆಯಿಂದ ದೆಹಲಿಗೆ ಬಂದ ಏರ್ ಏಷಿಯಾ ವಿಮಾನದಲ್ಲಿ ಕೊರೊನಾ ವೈರಸ್​ ಶಂಕಿತನೋರ್ವ ಇರುವ ಬಗ್ಗೆ ತಿಳಿಯುತ್ತಲೇ ವಿಮಾನದ ಸಹ ಪೈಲಟ್ ಕಾಕ್​ ಪಿಟ್​ನಿಂದ ಹೊರಗೆ ಜಿಗಿದಿದ್ದಾನೆ. ಘಟನೆಯಿಂದ ಏರ್​ಪೋರ್ಟ್​ನಲ್ಲಿ ಗೊಂದಲದ ವಾತಾವರಣ ನಿರ್ಮಾಣವಾಗಿತ್ತು.

ರಿಪೋರ್ಟ್​ ನೆಗೆಟಿವ್:

ಘಟನೆಯ ಗಂಭೀರತೆಯ ಕಾರಣದಿಂದ ಈ ಏರ್ ಏಶಿಯಾ ವಿಮಾನವನ್ನು ಪ್ರತ್ಯೇಕ ರನ್​ವೇನಲ್ಲಿ ನಿಲ್ಲಿಸಲಾಯಿತು. ಜೊತೆಗೆ ಎಲ್ಲ ಪ್ರಯಾಣಿಕರನ್ನು ತಪಾಸಣೆಗೆ ಒಳಪಡಿಸಲಾಯಿತು. ಆದ್ರೆ ಯಾವ ವ್ಯಕ್ತಿಗೆ ಸೋಂಕಿದೆ ಎಂದು ಹೇಳಲಾಗಿತ್ತೋ ಆತನ ಕೊರೊನಾ ಸೋಂಕು ಪರೀಕ್ಷಾ ವರದಿ ನೆಗೆಟಿವ್ ಬಂದಿತ್ತು ಎನ್ನಲಾಗ್ತಿದೆ.