ಹೈದರಾಬಾದ್(ತೆಲಂಗಾಣ) :ಕೊರೊನಾ ರೋಗದೊಂದಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಕ್ಯಾನ್ಸರ್ ರೋಗಿಗಳಲ್ಲಿನ ಮರಣ ಪ್ರಮಾಣವನ್ನು ಕಂಡುಹಿಡಿಯಲು ಬರ್ಮಿಂಗ್ಹ್ಯಾಮ್ ಮತ್ತು ಆಕ್ಸ್‌ಫರ್ಡ್ ವಿಶ್ವವಿದ್ಯಾಲಯಗಳು ಅಧ್ಯಯನ ನಡೆಸಿವೆ.
ಈ ಅಧ್ಯಯನವನ್ನು ಯುಕೆ ಕೊರೊನಾ ವೈರಸ್ ಕ್ಯಾನ್ಸರ್ ಮಾನಿಟರಿಂಗ್ ಪ್ರಾಜೆಕ್ಟ್ (ಯುಕೆಸಿಸಿಎಂಪಿ) ಎಂಬ ಸಮಿತಿಯನ್ನು ರಚಿಸಿ, ಮಾರ್ಚ್‌ನಲ್ಲಿ ಪ್ರಾರಂಭಿಸಲಾಗಿತ್ತು. ಈ ಸಮಿತಿ ಕ್ಯಾನ್ಸರ್ ಬಾಧಿತ ಕೊರೊನಾ ರೋಗಿಗಳ ಅಧ್ಯಯನ ನಡೆಸಿ, ಕೊರೊನಾ ಪೀಡಿತ ರೋಗಿಗಳಿಗೆ ಕ್ಯಾನ್ಸರ್ಗೆ ಈಗಾಗಲೇ ನೀಡುತ್ತಿರುವ ಔಷಧಿ ಎಷ್ಟು ಪರಿಣಾಮಕಾರಿಯಾಗಿದೆ ಎಂಬುದರ ಬಗ್ಗೆ ವರದಿ ನೀಡಿದೆ.
ಕೀಮೋಥೆರಪಿ ಅಥವಾ ರೇಡಿಯೊಥೆರಪಿ, ಇಮ್ಯುನೊಥೆರಪಿ ಅಥವಾ ಹಾರ್ಮೋನುಗಳ ಚಿಕಿತ್ಸೆಯಂತಹ ಇತರ ಸಕ್ರಿಯ ಕ್ಯಾನ್ಸರ್ ಚಿಕಿತ್ಸೆಯು ಕ್ಯಾನ್ಸರ್ ರೋಗಿಗಳಲ್ಲಿ ಹೇಗೆ ಪ್ರಭಾವಿಸಿದೆ ಎಂಬುದನ್ನು ಮೌಲ್ಯಮಾಪನ ಮಾಡಲು ಈ ಅಧ್ಯಯನವನ್ನು ಕೈಗೆತ್ತಿಕೊಳ್ಳಲಾಯಿತು. ಈ ಅಧ್ಯಯನದಲ್ಲಿ ತೊಡಗಿಕೊಂಡ ವೈದ್ಯರು, ತಾವು ಮಾಡಿದ ಅಧ್ಯಯನದ ವೈದ್ಯಕೀಯ ಫಲಿತಾಂಶವನ್ನು ವರದಿ ಮಾಡಿದ್ದಾರೆ. ಈ ಅಧ್ಯಯನದಲ್ಲಿ ಸುಮಾರು 55 ಕ್ಯಾನ್ಸರ್ ಕೇಂದ್ರಗಳು ತೊಡಗಿಕೊಂಡಿವೆ. ಮೊದಲ 800 ಕೊರೊನಾ ಪೀಡಿತ ಕ್ಯಾನ್ಸರ್ ರೋಗಿಗಳ ಫಲಿತಾಂಶಗಳನ್ನು ವಿಶ್ಲೇಷಿಸಿದೆ.
ಈ 800 ರೋಗಿಗಳ ಪೈಕಿ 169 ಕೊರೊನಾ ಪೀಡಿತ ಕ್ಯಾನ್ಸರ್ ರೋಗಿಗಳನ್ನು ಹೊರತುಪಡಿಸಿದ್ರೆ, ಇನ್ನುಳಿದ ಯಾವ ರೋಗಿಯಲ್ಲೂ ಸಹ ಥೆರಪಿ ಚಿಕಿತ್ಸೆಗಳಿಂದಾಗಿ ಫಲಿತಾಂಶಗಳು ಕಂಡು ಬಂದಿಲ್ಲ. ಕ್ಯಾನ್ಸರ್ ಚಿಕಿತ್ಸೆಯ ನಂತರವೂ ಸಹ 631 ರೋಗಿಗಳಲ್ಲಿ ಅಧಿಕ ರಕ್ತದೊತ್ತಡ, ಮಧುಮೇಹ, ಹೃದಯರಕ್ತನಾಳದ ಕಾಯಿಲೆ ಮತ್ತು ದೀರ್ಘಕಾಲದ ಪ್ರತಿರೋಧಕ ಶ್ವಾಸಕೋಶದ ಕಾಯಿಲೆ ಕಾಣಿಸುತ್ತಿತ್ತು ಎಂದು ವರದಿ ಮಾಡಿವೆ.