ಲಾಕ್​ಡೌನ್​ ವೇಳೆ ಶ್ರೀಮಂತರಿಗೆ ಸಂಚರಿಸಲು ಅನುಮತಿ: ಪೊಲೀಸ್​​ ಗೃಹ ಕಾರ್ಯದರ್ಶಿ ಮನೆಗೆ

ಮಹಾರಾಷ್ಟ್ರ ರಾಜ್ಯ ದೇಶದಲ್ಲೇ ಅತ್ಯಧಿಕ ಸಂಖ್ಯೆಯಲ್ಲಿ ಕೊರೊನಾ ಸೋಂಕಿತರನ್ನು ಹೊಂದಿದೆ. ಸಾವುನೋವುಗಳ ಪ್ರಮಾಣವೂ ಇಲ್ಲಿ ಹೆಚ್ಚುತ್ತಿದೆ. ಅಲ್ಲಿನ ಸರ್ಕಾರ ವೈರಸ್‌ನಿಂದ ಪಾರಾಗುವ ಕುರಿತ ಪರಿಹಾರೋಪಾಯಗಳನ್ನು ಕಂಡುಹಿಡಿಯುವ ವಿಚಾರದಲ್ಲಿ ತಲೆಕೆಡಿಸಿಕೊಳ್ಳುತ್ತಿದ್ದರೆ ಇತ್ತ ಅದೇ ಸರ್ಕಾರದ ಗೃಹ ಕಾರ್ಯದರ್ಶಿ ಲಾಕ್‌ಡೌನ್‌ ವೇಳೆ ಶ್ರೀಮಂತರಿಗೆ ಹೊರಗೆ ಸಂಚರಿಸಲು ಅನುಮತಿ ಮಾಡಿಕೊಡುತ್ತಿದ್ದರು.

ಮುಂಬೈ: ಶ್ರೀಮಂತ ಕುಟುಂಬ ಸದಸ್ಯರು ತಾವು ಇಷ್ಟ ಬಂದ ಕಡೆಗೆ ಪ್ರಯಾಣಿಸಲು ಅನುಮತಿ ನೀಡಿದ್ದಕ್ಕಾಗಿ ಗೃಹ ಕಾರ್ಯದರ್ಶಿಗೆ ಕಡ್ಡಾಯ ರಜೆಯ ಶಿಕ್ಷೆ ನೀಡಿ ಅವರನ್ನು ಮಹಾರಾಷ್ಟ್ರ ಸರ್ಕಾರ ಮನೆಗೆ ಕಳುಹಿಸಿದೆ.

ಏಪ್ರಿಲ್​ 23ರಂದು ಡಿಎಚ್​ಎಫ್​ಎಲ್​ ಸಂಸ್ಥೆಯ ವಾಧವನ್​​ ಕುಟುಂಬದ 23 ಮಂದಿಗೆ ಮುಂಬೈನ ಖಂಡಾಲ್​ ಪ್ರದೇಶದಿಂದ ಮಹಾಬಲೇಶ್ವರ್​ಗೆ ತೆರಳುವುದಕ್ಕೆ ಪೊಲೀಸ್​ ಗೃಹ ಕಾರ್ಯದರ್ಶಿ ಅಮಿತಾಬ್​ ಗುಪ್ತಾ ಅನುಮತಿ ನೀಡಿದ್ದರು.

ಈ ಕುಟುಂಬದವರು ತಮಗೆ ಪರಿಚಯವಿದ್ದರು. ತುರ್ತು ಭೇಟಿ ನೀಡಬೇಕಾದ ಕಾರಣ ತೆರಳಲು ಸಹಕರಿಸಬೇಕು ಎಂದು ಮನವಿ ಸಲ್ಲಿಸಿದ್ದರು ಗುಪ್ತಾ ತಿಳಿಸಿದ್ದಾರೆ.

ಆದ್ರೆ, ಮಹಾಬಲೇಶ್ವರ್​ಗೆ ಕುಟುಂಬ ಸದಸ್ಯರು ತಲುಪುತ್ತಿದ್ದಂತೆ ಅಲ್ಲಿನ ಪೊಲೀಸರು, 'ನೀವು ಹೇಗೆ ಇಲ್ಲಿಗೆ ಬಂದಿರಿ..' ಎಂದೆಲ್ಲಾ ಪ್ರಶ್ನಿಸಿದ್ದಾರೆ. ಈ ವೇಳೆ ಗೃಹ ಕಾರ್ಯದರ್ಶಿ ನೀಡಿದ ಪತ್ರ ತೋರಿಸಿದ್ದಾರೆ. ಆದರೆ ಇದಕ್ಕೆ ಮಣಿಯದ ಪೊಲೀಸರು ಅವರನ್ನು ಮುಲಾಜಿಲ್ಲದೆ ಕ್ವಾರಂಟೈನ್​ ಶಿಬಿರಕ್ಕೆ ಹಾಕಿದ್ದರು.

ಅಲ್ಲಿನ ಪೊಲೀಸರು ನೀಡಿದ ಮಾಹಿತಿ, ದಾಖಲೆಗಳ ಆಧಾರದ ಮೇಲೆ ಇದೀಗ ಅಮಿತಾಬ್​ ಗುಪ್ತಾ ಅವರಿಗೆ ಕಡ್ಡಾಯ ರಜೆ ನೀಡಿ ಸೇವೆಯಿಂದ ತಾತ್ಕಾಲಿಕ ಮುಕ್ತಿ ನೀಡಲಾಗಿದೆ. ಸರ್ಕಾರ ಇದೀಗ ಹಿರಿಯ ಅಧಿಕಾರಿಗೆ ಪೊಲೀಸ್​ ಗೃಹ ಇಲಾಖೆ ಕಾರ್ಯದರ್ಶಿ ಜವಾಬ್ದಾರಿ ವಹಿಸಿದೆ.