ವಿಶೇಷ ಲೇಖನ; ಚಿಕೂನ್​ಗುನ್ಯಾ ರೋಗ ಲಕ್ಷಣಗಳು, ಪರಿಹಾರೋಪಾಯಗಳು

ಚಿಕೂನ್​ಗುನ್ಯಾ ವೈರಸ್​ ಸೋಂಕು ತಗುಲಿದ ವ್ಯಕ್ತಿಗೆ ಕೆಲ ದಿನಗಳವರೆಗೆ ನಿರಂತರವಾಗಿ ಜ್ವರ ಬರಬಹುದು ಹಾಗೂ ಮುಂದಿನ ಕೆಲ ವಾರ ಅಥವಾ ತಿಂಗಳುಗಳವರೆಗೆ ಸ್ನಾಯು, ಕೀಲು ನೋವು ಬಾಧಿಸಬಹುದು. ಡೆಂಗ್ಯೂ ಜ್ವರದ ರೀತಿಯಲ್ಲೇ ಚಿಕೂನ್​ಗುನ್ಯಾ ಜ್ವರದ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ.

ಮಳೆಗಾಲದಲ್ಲಿ ಸೊಳ್ಳೆಗಳ ಸಂತಾನೋತ್ಪತ್ತಿ ಹೆಚ್ಚಾಗುವುದರಿಂದ ಸಹಜವಾಗಿಯೇ ಈ ಅವಧಿಯಲ್ಲಿ ಸೊಳ್ಳೆಗಳಿಂದ ಹರಡುವ ರೋಗಗಳೂ ಹೆಚ್ಚಾಗುತ್ತವೆ. ಮಳೆಗಾಲದಲ್ಲಿಯೇ ಹೆಚ್ಚಾಗಿ ಕಾಣಿಸಿಕೊಳ್ಳುವ ಚಿಕೂನ್​ಗುನ್ಯಾ ರೋಗ ಲಕ್ಷಣಗಳು ಹಾಗೂ ಪರಿಹಾರೋಪಾಯಗಳ ಬಗ್ಗೆ ತಿಳಿದುಕೊಳ್ಳುವುದು ಆರೋಗ್ಯದ ದೃಷ್ಟಿಯಿಂದ ಅತಿ ಮುಖ್ಯವಾಗಿದೆ. ಭಾರತದಲ್ಲಿ ಚಿಕೂನ್​ಗುನ್ಯಾ ಹರಡುವಿಕೆಯ ಪ್ರಮಾಣ, ರೋಗ ಲಕ್ಷಣಗಳು ಹಾಗೂ ಪರಿಹಾರೋಪಾಯಗಳನ್ನು ಇಲ್ಲಿ ತಿಳಿಸಲಾಗಿದೆ.

ಚಿಕೂನ್​ಗುನ್ಯಾ ಹರಡುವ ಏಡಿಸ್ ಅಲ್ಬೊಪಿಕ್ಟಸ್ ಸೊಳ್ಳೆ

ಏಡಿಸ್ ಅಲ್ಬೊಪಿಕ್ಟಸ್ ಎಂಬ ಜಾತಿಯ ಸೊಳ್ಳೆಯಿಂದ ಹರಡುವ ಚಿಕೂನ್​ಗುನ್ಯಾ ರೋಗವು ಮಾರಣಾಂತಿಕವಲ್ಲದ ಸಾಂಕ್ರಾಮಿಕ ಕಾಯಿಲೆಯಾಗಿದೆ. ನಿಂತ ನೀರಿನಲ್ಲಿ ಬೆಳೆಯುವ ಈ ಸೊಳ್ಳೆಗಳು ಮನುಷ್ಯರನ್ನು ರಾತ್ರಿ ಮಾತ್ರವಲ್ಲದೇ ಹಗಲಿನಲ್ಲಿಯೂ ಕಚ್ಚುತ್ತವೆ. ಚಿಕೂನ್​ಗುನ್ಯಾ ಪದದ ಅರ್ಥವು ಬಾಗಿಸುವುದು ಅಥವಾ ಮಣಿಸುವುದು ಎಂದಾಗಿದೆ. ಈ ರೋಗ ಬಂದಾಗ ಮೈಯಲ್ಲಿ ಸಂಧಿವಾತ ರೂಪದ ತೀವ್ರ ಸ್ನಾಯು ಹಾಗೂ ಕೀಲು ನೋವು ಉಂಟಾಗುವುದರಿಂದ ಚಿಕೂನ್​ಗುನ್ಯಾ ಎಂಬ ಹೆಸರು ಬಂದಿದೆ.

ಭಾರತದಲ್ಲಿ ವ್ಯಾಪಕವಾಗಿ ಹರಡಿರುವ ಚಿಕೂನ್​ಗುನ್ಯಾ !

2005 ರಿಂದ 2018 ರ ಅವಧಿಯಲ್ಲಿ ಭೌಗೋಳಿಕವಾಗಿ ಚಿಕೂನ್​ಗುನ್ಯಾ ಹರಡುವಿಕೆ ಹಾಗೂ ಬೆಳವಣಿಗೆಯ ಕುರಿತಾಗಿ ಪುಣೆಯ ರಾಷ್ಟ್ರೀಯ ವೈರಾಲಜಿ ಸಂಸ್ಥೆಯ ತಂಡ ಇತ್ತೀಚೆಗೆ ಅಧ್ಯಯನ ನಡೆಸಿದೆ. ಭಾರತದಲ್ಲಿ ಚಿಕೂನ್​ಗುನ್ಯಾ ವ್ಯಾಪಕವಾಗಿ ಹರಡಿದ್ದು, ವಿಶ್ವದ ಇತರ ರಾಷ್ಟ್ರಗಳಿಗೂ ವ್ಯಾಪಿಸುತ್ತಿದೆ. ಅದರಲ್ಲೂ ನೆರೆಯ ಶ್ರೀಲಂಕಾ, ಬಾಂಗ್ಲಾದೇಶ ಹಾಗೂ ಚೀನಾಗಳಲ್ಲೂ ಚಿಕೂನ್​ಗುನ್ಯಾ ಹರಡುತ್ತಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

2015 ರಿಂದ ಭಾರತದ ರಾಜ್ಯಗಳಲ್ಲಿ ಚಿಕೂನ್​ಗುನ್ಯಾ ಜ್ವರದ ಪ್ರಕರಣಗಳ ಅಂಕಿ ಸಂಖ್ಯೆಗಳು

Sl. No.	States/UTs	2015	2016	2017	2018	2019
No. Susp. Chikungunya cases	No. of conf. cases	No. Susp. Chikungunya cases	No. of conf. cases	No. Susp. Chikungunya cases	No. of conf. cases	No. Susp. Chikungunya cases	No. of conf. cases	No. of conf. cases	No. of conf. cases
1	ಆಂಧ್ರ ಪ್ರದೇಶ	817	83	960	147	1162	108	622	79	700	67
2	ಅರುಣಾಚಲ ಪ್ರದೇಶ	35	6	239	8	133	0	507	1	332	55
3	ಅಸ್ಸಾಂ	0	0	40	40	41	41	3	3	0	0
4	ಬಿಹಾರ	3	1	566	566	1251	1251	156	156	532	532
5	ಗೋವಾ	561	32	337	49	509	48	455	77	796	319
6	ಗುಜರಾತ	406	42	3285	847	7953	1363	10601	1290	6491	496
7	ಹರಿಯಾಣ	1	1	5394	1970	220	6	62	3	0	0
8	ಜಮ್ಮು ಕಾಶ್ಮೀರ	0	0	1	1	0	0	1	1	0	0
9	ಜಾರ್ಖಂಡ್	21	0	47	14	269	17	3405	851	1679	166
10	ಕರ್ನಾಟಕ	20763	2099	15666	1528	32831	3511	20411	2546	35366	2970
11	ಕೇರಳ	175	152	129	129	78	74	77	77	52	52
12	ಮಧ್ಯ ಪ್ರದೇಶ	67	11	2280	862	2477	858	3211	1609	2248	620
13	ಮೇಘಾಲಯ	78	15	360	68	236	45	44	2	9	1
14	ಮಿಜೋರಾಂ	0	0	0	0	0	0	93	10	0	0
15	ಮಹಾರಾಷ್ಟ್ರ	391	207	7570	2949	8110	1438	9884	1009	4382	1378
16	ಮಣಿಪುರ	0	0	0	0	0	0	2	0	40	3
17	ಒಡಿಶಾ	81	46	51	15	0	0	0	0	0	0
18	ಪಂಜಾಬ್	180	18	4407	2054	3251	201	736	25	243	2
19	ರಾಜಸ್ಥಾನ್	7	7	2506	2215	1612	1612	254	254	169	169
20	ಸಿಕ್ಕಿಂ	0	0	30	5	130	8	384	28	641	62
21	ತಮಿಳು ನಾಡು	329	329	86	86	131	131	\284	284	345	345
22	ತೆಲಂಗಾಣ	2067	149	611	71	1277	58	1954	489	4816	1078
23	ತ್ರಿಪುರಾ	180	7	311	70	574	64	683	75	953	106
24	ಉತ್ತರ ಪ್ರದೇಶ	0	0	2458	2458	103	103	58	58	5	5
25	ಉತ್ತರಾಖಂಡ್	0	0	35	10	0	0	29	7	1	1
26	ಪಶ್ಚಿಮ ಬಂಗಾಳ	1013	61	1071	117	2103	577	52	23	-	-
27	ಅಂಡಮಾನ್ ನಿಕೋಬಾರ್	68	3	18	0	93	17	205	27	702	53
28	ಚಂಡೀಗಢ	1	1	2857	272	1810	54	357	4	82	0
29	ದಾದ್ರಾ ನಗರ್ ಹವೇಲಿ	0	0	0	0	0	0	0	0	0	0
30	ದೆಹಲಿ	64	64	12279	9793	940	940	407	407	442	442
31	ಲಕ್ಷದ್ವೀಪ	0	0	0	0	0	0	-	-	-	-
32	ಪುದುಚೇರಿ	245	8	463	20	475	23	2876	361	4191	555
	ಒಟ್ಟು	27553	3342	64057	26364	67769	12548	57813	9756	65217	9477

ಚಿಕೂನ್​ಗುನ್ಯಾ ಜ್ವರದ ಲಕ್ಷಣಗಳು

ಚಿಕೂನ್​ಗುನ್ಯಾ ವೈರಸ್​ ಸೋಂಕು ತಗುಲಿದ ವ್ಯಕ್ತಿಗೆ ಕೆಲ ದಿನಗಳವರೆಗೆ ನಿರಂತರವಾಗಿ ಜ್ವರ ಬರಬಹುದು ಹಾಗೂ ಮುಂದಿನ ಕೆಲ ವಾರ ಅಥವಾ ತಿಂಗಳುಗಳವರೆಗೆ ಸ್ನಾಯು, ಕೀಲು ನೋವು ಬಾಧಿಸಬಹುದು. ಡೆಂಗ್ಯೂ ಜ್ವರದ ರೀತಿಯಲ್ಲೇ ಚಿಕೂನ್​ಗುನ್ಯಾ ಜ್ವರದ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ವೈರಸ್​ ಹರಡುವ ಸೊಳ್ಳೆ ಕಚ್ಚಿದ ಕೆಲ ದಿನಗಳಲ್ಲಿ ಈ ಕೆಳಗಿನ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ:

* ಜ್ವರ (ಕೆಲ ಬಾರಿ 104 ಡಿಗ್ರಿಯಷ್ಟು ಹೆಚ್ಚಾಗಬಹುದು)

* ಕೀಲು ನೋವು

* ತಲೆನೋವು

* ಸ್ನಾಯುಗಳಲ್ಲಿ ಸೆಳೆತ

* ಕೀಲುಗಳ ಸುತ್ತ ಬಾವು ಬರುವುದು

ಕೆಲ ವಿರಳ ಪ್ರಕರಣಗಳಲ್ಲಿ ಮೈಮೇಲೆ ದದ್ದುಗಳಾಗುವುದು, ಕಂಜಕ್ಟಿವಿಟೀಸ್ (ಕಣ್ಣು ಬೇನೆ), ವಾಂತಿ ಮುಂತಾದ ಲಕ್ಷಣಗಳು ಸಹ ಕಾಣಿಸಿಕೊಳ್ಳುತ್ತವೆ.

ಚಿಕೂನ್​ಗುನ್ಯಾ ಕಾಯಿಲೆಯ ಚಿಕಿತ್ಸಾ ವಿಧಾನ

ಈ ಕಾಯಿಲೆ ಮಾರಣಾಂತಿಕವಾಗಿಲ್ಲದಿದ್ದರೂ ತೀವ್ರ ರೀತಿಯ ನೋವು ಅನುಭವಿಸಬೇಕಾಗಬಹುದು. ಬಹುತೇಕ ರೋಗಿಗಳ ಜ್ವರ ಕೆಲ ದಿನಗಳಲ್ಲೇ ಕಡಿಮೆಯಾದರೂ, ಕೀಲು ನೋವು ಮಾತ್ರ ತಿಂಗಳುಗಟ್ಟಲೇ ಬಾಧಿಸುತ್ತದೆ. ಶೇ 20 ರಷ್ಟು ಜನರಲ್ಲಿ ರೋಗ ವಾಸಿಯಾಗಿ ಒಂದು ವರ್ಷದ ನಂತರವೂ ಕೀಲು ನೋವು ಬಾಧಿಸುವ ಸಾಧ್ಯತೆ ಇರುತ್ತದೆ.

ಔಷಧಿ ಅಂಗಡಿಗಳಲ್ಲಿ ದೊರಕುವ ಕೆಲ ಔಷಧಿಗಳ ಮೂಲಕ ಜ್ವರ ಹಾಗೂ ಕೀಲು ನೋವುಗಳನ್ನು ಕೆಲ ಮಟ್ಟಿಗೆ ಕಡಿಮೆ ಮಾಡಿಕೊಳ್ಳಬಹುದು. ಆ ಔಷಧಿಗಳ ಪಟ್ಟಿ ಇಲ್ಲಿದೆ:

* ನ್ಯಾಪ್ರೊಕ್ಸೆನ್ (Naproxen)

* ಐಬುಪ್ರೊಫೆನ್ (Ibuprofen)

* ಅಸಿಟಾಮಿನೊಫೆನ್ (Acetaminophen)

ದೀರ್ಘಾವಧಿಯವರೆಗೆ ಕೀಲು ನೋವು ಇದ್ದರೆ ಫಿಸಿಯೋಥೆರಪಿ ಮಾಡಿಸಿಕೊಳ್ಳುವುದು ಸೂಕ್ತ.

ಚಿಕೂನ್​ಗುನ್ಯಾ ನಿಯಂತ್ರಣಕ್ಕೆ ಮುಂಜಾಗ್ರತಾ ಕ್ರಮಗಳು

* ಡೈ ಇಥೈಲ್ ಮೆಟಾ ಟೊಲಾಮೈಡ್​ (DEET (N, N-Diethyl-meta-toluamide)) ಅಥವಾ ಪಿಕಾರಿಡಿನ್ ಇರುವ ಕೀಟ ನಿವಾರಕಗಳನ್ನು ಚರ್ಮ ಅಥವಾ ಬಟ್ಟೆಗಳಿಗೆ ಸವರುವುದು.

* ಸಂಪೂರ್ಣ ಶರೀರ ಮುಚ್ಚುವಂತೆ ಬಟ್ಟೆ ಧರಿಸುವುದು.

* ಬೆಳಗ್ಗೆ ಹಾಗೂ ಸಂಜೆ ಸಮಯದಲ್ಲಿ ಸೊಳ್ಳೆ ಕಚ್ಚದಂತೆ ಮನೆಯಲ್ಲಿಯೇ ಇರುವುದು.

* ಚಿಕೂನ್​ಗುನ್ಯಾ ವ್ಯಾಪಿಸಿರುವ ಪ್ರದೇಶಗಳಿಗೆ ಹೋಗದಿರುವುದು.

* ಏರ್​ ಕಂಡೀಶನರ್ ಉಪಯೋಗಿಸುವ ಮೂಲಕ ಸೊಳ್ಳೆಗಳು ಬರದಂತೆ ತಡೆಯುವುದು.

* ಮಲಗುವಾಗ ಸೊಳ್ಳೆ ಪರದೆ ಬಳಸುವುದು.

* ಮಾಸ್ಕಿಟೊ ಕಾಯ್ಲ್ ಬಳಸುವುದು ಹಾಗೂ ಇತರ ಸೊಳ್ಳೆ ಓಡಿಸುವ ವಿಧಾನಗಳನ್ನು ಅನುಸರಿಸುವುದು.